"ప్రభురాత్రి భోజనము" (Lord's Supper)

"ప్రభురాత్రి భోజనము"

పరిశుద్ధులుగా  ఉండుటకు పిలువబడినవారికందరికీ మన ప్రభువైన యేసుక్రీస్తు నామములో నా హృదయపూర్వక వందనములు.

 ప్రియులారా, నేటి సమాజములో అనేకమంది క్రైస్తవులు ప్రభురాత్రి భోజన విషయంలో వివిధ ఆలోచనలు, పద్దతులు కలిగియున్నారు. కొన్ని సంఘాల వారు ప్రభురాత్రి భోజనమును నెలకొకసారి తీసుకోవాలని, మరికొందరు సంవత్సరానికొకసారి తీసుకోవాలని, ఇంకొంతమంది క్రిస్టమస్ పండుగరోజు తీసుకోవాలని, పాప క్షమాపణ కలుగుటకు ప్రభువు బల్లలో చేయి పెట్టాలని సొంత అభిప్రాయాలు కలిగి 1 కొరింధి 11వ అధ్యాయము 23 నుండి 34 వచనములను సరిగ్గా అర్థము చేసుకోలేకపోతున్నారు.

ఈ ప్రభురాత్రి భోజనము అంశము ద్వారా పైన చెప్పబడిన విషయములను మరియు కొన్ని అతి ప్రాముఖ్యమైన సంగతులను గూర్చి  పరిశుద్ధ గ్రంధమును పరిశీలన చేసి అర్థము చేసుకునే ప్రయత్నము చేద్దాము.

★ "ప్రభురాత్రి భోజనము" అనగా రాజ్య సంబంధమైన భోజనము. రాజ వంశీకులకు మాత్రమే అనుగ్రహింపబడినది ఇంకా చెప్పుకోవాలంటే రాజు యొక్క సముఖములో ఆయనతో కలిసి పాలు పంచుకొనుటకు అర్హత కలిగిన భోజనము లేదా రాజుతో మరియు సంఘముతో  సహవాసము కలిగిన భోజనము.

ఉదాహరణకు :-

1) ఏ మాత్రము అర్హత లేని మెఫీబోషేతుకు రాజైన దావీదు సముఖములో భోజనము చేయుటకు కలిగిన అవకాశము.

 » అందుకు దావీదునీవు భయపడవద్దు, నీ తండ్రియైన యోనాతాను నిమిత్తము నిజముగా నేను నీకు ఉపకారము చూపి, నీ పితరుడైన సౌలు భూమి అంతయు నీకు మరల ఇప్పింతును; మరియు నీవు సదాకాలము నా బల్లయొద్దనే భోజనముచేయుదువని సెలవియ్యగా. అతడు నమస్క రించిచచ్చిన కుక్కవంటివాడనైన నాయెడల నీవు దయ చూపుటకు నీ దాసుడనగు నేను ఎంతటివాడను? అనెను. – (2 సమూయేలు. 9:7-8).

2) షేబదేశపు రాణి రాజైన సొలోమోను భోజన బల్లను చూసి ఆశర్యపడుట.

 » షేబరాణి సొలొమోనుయొక్క జ్ఞానమును అతడు కట్టించిన మందిరమును,అతని బల్లమీదనున్న భోజనద్రవ్యములను, అతని సేవకులు కూర్చుండు పీఠములను అతని ఉపచారులు కనిపెట్టుటను, వారి వస్త్రములను, అతనికి గిన్నె నందించువారిని, యెహోవా మందిరమందు అతడు అర్పించు దహనబలులను చూచి విస్మయమొందినదై. – (1 రాజులు. 10:4-5).

ఇటువంటి  గొప్ప రాజ విందులో పాలు పొందుటకు ఎటువంటి అర్హత లేని మనకు తండ్రియైన దేవుడు తన కుమారుడైన క్రీస్తు ద్వారా సహవాసమును ఏర్పాటు చేసి (1 కొరింధి. 1:9), తన కుమారుని రాజ్యములో వారసులునుగా చేసి (1 పేతురు. 2:9), ఆ రాజు యొక్క విందులో అనగా ప్రభురాత్రి భోజనములో చేయి పెట్టుటకు అవకాశమును దయచేసెను (1 కొరింధి. 11:23-32). కాని ప్రియ సహోదరుడా, పైన పేర్కొనబడిన రాజ విందులో పాలు పంచుకొనుట నామమాత్రమే గానీ క్రీస్తువారి ద్వారా మనకు అనుగ్రహింపబడిన ఈ రాజ విందు శాశ్వతమైనది, నిత్యమూ క్రమము తప్పకుండా కొనసాగించేదని క్రైస్తవులమైన మనము మొదట గ్రహించాలి.

NOTE:- మన ప్రభువైన యేసుక్రీస్తువారు తాను అప్పగింపబడిన రాత్రి తన శిష్యులతో కలిసి రెండు రకాల భోజనాలలో పాలు పొందుట మనము చూడగలము. 

● ఒకటి పస్కా భోజనము,
● రెండవది ప్రభురాత్రి భోజనము.

 » వారు భోజనము చేయుచుండగా యేసు ఒక రొట్టె పట్టుకొని, దాని నాశీర్వదించి, విరిచి తన శిష్యులకిచ్చి మీరు తీసికొని తినుడి; ఇది నా శరీరమని చెప్పెను. మరియు ఆయన గిన్నె పట్టుకొని కృతజ్ఞతాస్తుతులు చెల్లించి వారికిచ్చిదీనిలోనిది మీరందరు త్రాగుడి. – (మత్తయి. 26:26-27).

 » వారు భోజనము చేయుచుండగా, ఆయన యొక రొట్టెను పట్టుకొని, ఆశీర్వదించి విరిచి, వారికిచ్చిమీరు తీసికొనుడి; ఇది నా శరీరమనెను. పిమ్మట ఆయన గిన్నెపట్టుకొని కృతజ్ఞతాస్తుతులు చెల్లించి దాని వారి కిచ్చెను; వారందరు దానిలోనిది త్రాగిరి. – (మార్కు. 14:22-23).

ప్రభురాత్రి భోజనము ఎప్పుడు తీసుకోవాలి..?

ఈ ప్రభురాత్రి భోజనమును ఒక్కొక్క సంఘము ఒక్కోరోజు తీసుకుంటుంది. కాని ఆదిమ అపొస్తలులు "ప్రతి ఆదివారము" తీసుకున్నట్లు పరిశుద్ధ గ్రంధములో స్పష్టముగా కనబడుచున్నది..

 » "ఆదివారమున" మేము రొట్టె విరుచుటకు కూడినపుడు. - (అపొ.కార్య. 20:7).

ప్రియులారా, ఆదివారము నెలకొకసారి వస్తుందా లేక సంవత్సరానికొకసారి వస్తుందా లేదా వారమునకు ఒకసారి వస్తుందా నేటి క్రైస్తవులు గమనించాల్సిన అవసరము ఎంతైనా ఉంది.  చాలామంది ఆదివారము సెలవు దినము కాబట్టే ఆరోజు నిర్ణయింపబడిందనే ఆలోచనలో ఉన్నారు కాని ఆదివారమునకు ఉన్న ప్రాముఖ్యతను దేవుని గ్రంధములో చూడగలిగితే,

 » యేసు పునరుత్థానుడై తిరిగి లేపబడిన దినము "ఆదివారము". – (మత్తయి. 28:1; మార్కు. 16:2; లూకా. 24:1; యోహాను. 20:1). 

 » క్రీస్తు సంఘము ప్రారంభమైన దినము "ఆదివారము". – (అపొ.కార్య. 2:38-41).

 » క్రీస్తు వారు పరలోకమునకు కొనిపోబడిన పిమ్మట అపొస్తులులు, ఆదిమ సంఘస్థులు ప్రభురాత్రి భోజనము మొదటిగా తీసుకున్న దినము  "ఆదివారము". – (అపొ.కార్య. 20:7).

గమనిక : ప్రియులారా క్రింద వ్రాయబడిన వచనమును బట్టి కొందరు క్రైస్తవులు అనుదినము రొట్టె విరవాలని తప్పుగా అర్థము చేసుకుంటున్నారు కాని ఇక్కడ వారు చేసిన భోజనము అత్మానుసారమైనది కాదు శరీరమునకు కావలసిన ఆహారమని గ్రహించాలి.   

 » ప్రతిదినము దేవాలయములో కూడుకొనుచు ఇంటింట రొట్టె విరుచుచు, దేవుని స్థితించుచు. – (అపొ.కార్య. 2:46).

ప్రభురాత్రి భోజనము ఎవరు తీసుకోవాలి..? 

సహోదరులారా ప్రభురాత్రి భోజనమును ఎవరు పడితే వారు తీసుకునే కార్యక్రమమని పరిశుద్ధ గ్రంథము తెలియజేయట్లేదు. ఈ ఆర్హత కేవలము క్రీస్తు శరీరములోనికి అనగా క్రీస్తు సంఘములో (CHURCH OF CHRIST) బాప్తీస్మము పొందిన వారికే మాత్రమే అనుగ్రహింపబడిందని తెలుసుకోవాలి.

 » ఆ సంఘము ఆయన శరీరము. – (ఎఫెసీ. 1:23).

 » క్రీస్తు యేసులోనికి బాప్తిస్మము పొందిన మనమందరము ఆయన మరణములోనికి బాప్తిస్మము పొందితిమని మీరెరుగరా? – (రోమా. 6:3).

 » క్రీస్తు లోనికి బాప్తిస్మముపొందిన మీరందరు క్రీస్తును ధరించుకొనియున్నారు. – (గలతీ. 3:27).

» ఏలాగనగా, యూదులమైనను, గ్రీసుదేశస్థులమైనను, దాసులమైనను, స్వతంత్రులమైనను, మనమందరము ఒక్క శరీరములోనికి ఒక్క ఆత్మయందే బాప్తిస్మము పొందితివిు.మనమందరము ఒక్క ఆత్మను పానము చేసినవారమైతివిు. – (1 కొరింధి. 12:13).

ప్రభురాత్రి భోజనముయొక్క ముఖ్య ఉద్దేశ్యము :

అపొస్తులుడైన పౌలు గారు కొరింధి పట్టణములో  ఉన్న క్రీస్తు సంఘమును హెచ్చరిస్తూ, వారి లోపాలను వారికి గుర్తుచేస్తూ ప్రభువైన క్రీస్తు తాను అప్పగింపబడిన రాత్రి శిష్యులతో కలిసి పుచ్చుకున్న భోజన ప్రాముఖ్యతను వివరిస్తూ ప్రతి ఒక్క స్థానిక క్రీస్తు సంఘము ఇట్టిరీతిగానే ఆ క్రీస్తు సహవాస భోజనములో పాలు పొందాలని కొన్ని విశేష సంగతులను తెలియజేయడమైనది.

A). "జ్ఞాపకము" : (1 కొరింధి. 11:23-25).

 » నేను మీకు అప్పగించిన దానిని ప్రభువువలన పొందితిని. ప్రభువైన యేసు తాను అప్పగింప బడిన రాత్రి యొక రొట్టెను ఎత్తికొని కృతజ్ఞ తాస్తుతులు చెల్లించి. దానిని విరిచి యిది మీకొరకైన నా శరీరము; నన్ను జ్ఞాపకము చేసికొనుటకై దీనిని చేయుడని చెప్పెను. ఆ ప్రకారమే భోజనమైన పిమ్మట ఆయన పాత్రను ఎత్తికొనియీ పాత్ర నా రక్తమువలననైన క్రొత్తనిబంధన; మీరు దీనిలోనిది త్రాగునప్పుడెల్లనన్ను జ్ఞాపకము చేసికొనుటకై దీనిని చేయుడని చెప్పెను. ఆ ప్రకారమే భోజనమైన పిమ్మట ఆయన పాత్రను ఎత్తికొనియీ పాత్ర నా రక్తమువలననైన క్రొత్తనిబంధన; మీరు దీనిలోనిది త్రాగునప్పుడెల్లనన్ను జ్ఞాపకము చేసికొనుటకై దీనిని చేయుడని చెప్పెను.

★ జ్ఞాపకము అనగా స్మృతి, జ్ఞప్తి.

1). సమస్త మానవాళి తమ పాపములు విషయములో పరిహారము పొందాలంటే క్రీస్తు యొక్క పరిశుద్ధ రక్తము ద్వారానే సాధ్యమని మన తండ్రియైన దేవుడు  ముందుగానే ఎరిగి తాను నిర్ణయించిన సంకల్పమును ఆయన భవిష్యత్ జ్ఞానమును అనుసరించి ఆయనను నియమించెనని, ఇప్పుడు ఆయన ద్వారా విశ్వాసులైన మన నిమిత్తము కడవరి కాలమందు మనయెదుట ప్రత్యక్షపరచబడెనని దేవునికి కృతజ్ఞతలు చెల్లిస్తూ జ్ఞాపకము చేసుకోవాలి. – (అపొ.కార్య. 2:23, 1 పేతురు. 1:18-21).     

2). మన పాపముల నిమిత్తమై మరణించుటకు రక్తమాంసములలో పాలివాడై, ఎంతమాత్రమును దేవదూతల స్వభావమును ధరించుకొనక, అపవాదిని నశింపజేసి, మరణభయము నుండి  విడిపించి,  సకల ప్రజల పాపములకు పరిహారము కలుగజేసి, సిలువపై ఎంతో శ్రమ పొంది, తనతో సమాన వారసత్వమును కలుగజేసి, మనలను రక్షించిన  క్రీస్తు మరణ త్యాగమును బట్టి దేవునికి కృతజ్ఞతలు చెల్లిస్తూ జ్ఞాపకము చేసుకోవాలి. – (హెబ్రీ. 2:14-17). 

3). యేసు తాను చేయని తప్పుకి మనకొరకు ఎన్నో శ్రమలనుభవించి, కొరడాలతో కొట్టబడి, ఎన్నో గాయములనొంది, తనను చెంపమీద కొట్టినా, తనను హేళన  చేసినా,  చివరికి తనపై ఉమ్మివేసినా ఒక్క మాట కూడా మాట్లాడకుండా మౌనముగా తండ్రి చిత్తము చొప్పున సిలువ భారమును భరించాడంటే అది కేవలము నీ కోసము నాకోసమే అని గ్రహించి ఆయనను జ్ఞాపకము చేసుకోడానికే ప్రభురాత్రి భోజనమని  తెలుసుకోవాలి. – (యెషయా. 50:6; 53:3-10, మత్తయి. 26:27; 27:26-31, మార్కు. 14:65, యోహాను. 18:22; 19:1, 1 పేతురు. 3:21-24).

4). మనలను ఎలాగైతే అపవాది లోబరుచుకున్నాడో అలాగే, యేసు ఈ లోకములో శరీరధారిగా నివసించినప్పుడు అపవాది చేత ఎన్నో రకాలుగా శోధించిబడినప్పటికీ తాను ఎంతమాత్రము లోబడక అపవాదిని దైర్యముగా ఎదుర్కొని ఈ లోకములో ఉన్నంత కాలము మనకొరకు అపవాదితో మహాయుద్ధము చేసి మనకు జయమును కలుగజేసాడన్న విశేష సంగతిని జ్ఞాపకము చేసుకోవాలి. – (లూకా. 11:21, యోహాను. 1:14; 13:1-17, హెబ్రీ. 2:15).

5). దేవుని స్వరూపము కలిగినవాడైనప్పటికీ, ఆయనతో సమానముగా ఉండే గొప్ప బాగ్యమును విడనాడి, దేవదూతలకంటే కొంచెము తక్కువ వాడిగా చేయబడి, మనుష్య పోలికగా పుట్టి, దాసుని రూపము ధరించుకుని, తనను తాను ఎంతమాత్రము హెచ్చించుకొనక శిష్యుల పాదములను సైతము కడిగి, అంధకార సంబంధమైన అధికారము నుండి మనలను విడుదల చేయుటకు సిలువ మరణము పొందునంతగా విధేయత చూపినవాడై, తనను తాను ఎంతగానో తగ్గించుకుని, మనలను బ్రతికించిన ఆ యేసుని హృదయపూర్వకముగా జ్ఞాపకము చేసుకోవాలి. – (ఫిలిప్పి. 2:5-8, ఎఫెసీ. 2:1, హెబ్రీ. 2:9).

6). మనము పాపము విషయమై చనిపోయి నీతి విషయమై జీవించుటకు అనగా ఇహలోక మాలిన్యమును ఎంతమాత్రమును మనకంటకుండా ఆయనను పోలి నడుచుకోవాలని మనకు మాదిరి చూపించిన ఆ యేసుని జ్ఞాపకము చేసుకోవాలి. – (1 పేతురు. 2:21-24, యాకోబు. 1:27).

NOTE: ఇటువంటి ఎన్నో విశేష సంగతులన్నిటిని జ్ఞాపకము చేసుకొని ప్రభురాత్రి భోజనములో పాలు పంపులు పొందాలి.

B). "యేసు మరణ ప్రచురము" : (1 కొరింధి. 11:26).

» మీరు ఈ రొట్టెను తిని, యీ పాత్రలోనిది త్రాగునప్పుడెల్ల ప్రభువు వచ్చువరకు ఆయన మరణమును ప్రచురించుదురు.

★ ప్రచురము అనగా ప్రకటించుట.

ప్రియులారా,  క్రీస్తులోనికి బాప్తీస్మము పొంది, ఆ ప్రభువు యొక్క బల్లలో పాలుపంచుకునే నీవు మనకు అప్పగింపబడిన సువార్త పనిలో కొనసాగుతున్నామో లేదో ఆలోచన చేసుకోవాలి.

సిలువను గూర్చిన వార్త మనకు దేవుని శక్తియై ఉన్నదని, నశించువారు రక్షింపబడుటకు క్రీస్తు సువార్తయే మార్గమని ఈ లోకములో ప్రకటన చేయాలి.

» సిలువనుగూర్చిన వార్త, నశించుచున్న వారికి వెఱ్ఱి తనము గాని రక్షింపబడుచున్న మనకు దేవుని శక్తి. – (1 కొరింధి. 1:18).

1). సిలువను గూర్చిన వార్త ఏమనగా, లేఖనముల ప్రకారము క్రీస్తు మన పాపముల నిమిత్తము మరణించారని, సమాధి చేయబడెనని, మూడవ దినమున లేపబడెనని అపోస్తులులు ఎలాగైతే ప్రకటన చేసారో మనము కూడా ఈ లోకములో ప్రకటన చేయాలి.

» సహోదరులారా, నేను మీకు ప్రకటించిన సువార్తను మీకు తెలియపరచుచున్నాను. మీరు దానిని అంగీకరించితిరి, దానియందే నిలిచియున్నారు. మీ విశ్వా సము వ్యర్థమైతేనే గాని, నేను ఏ ఉపదేశరూపముగా సువార్త మీకు ప్రకటించితినో ఆ ఉపదేశమును మీరు గట్టిగా పట్టుకొనియున్న యెడల ఆ సువార్తవలననే మీరు రక్షణపొందువారై యుందురు. నాకియ్యబడిన ఉపదేశమును మొదట మీకు అప్పగించితిని. అదేమనగా, లేఖనముల ప్రకారము క్రీస్తు మన పాపములనిమిత్తము మృతిపొందెను, సమాధిచేయబడెను, లేఖనముల ప్రకారము మూడవదినమున లేపబడెను. – (1 కొరింధి. 15:1-4).

2). క్రీస్తు ఈ లోకమునకు రాకమునుపు మరణము ప్రతి మనుష్యుని యేలెను కాని ఆ క్రీస్తు రాక ద్వారా మరణము ఓడించి, అపవాదికి అపజయమునిచ్చియున్నాడని, పాతాళపు నోరు కట్టియున్నాడని, సువార్త ద్వారా ఆయనను అంగీకరించువారికి జీవమును, అక్షయతను కలుగుజేయువాడు ఆయన మాత్రమే అని ప్రకటన చేయాలి. 

» క్రీస్తు యేసను మన రక్షకుని ప్రత్యక్షతవలన బయలుపరచబడినదియునైన తన కృపనుబట్టియు, మనలను రక్షించి పరిశుద్ధమైన పిలుపుతో ఆయన మనలను పిలిచెను. ఆ క్రీస్తుయేసు, మరణమును నిరర్థకము చేసి జీవమును అక్షయతను సువార్తవలన వెలుగులోనికి తెచ్చెను. – (2 తిమోతి. 1:10).

★ జీవము అనగా క్రీస్తునందు విశ్వాసముంచువాడు చని పోయినను బ్రదుకునని,

★ అక్షయత అనగా బ్రదికి క్రీస్తునందు విశ్వాసముంచు ప్రతివాడును ఎన్నటికిని చనిపోడని ప్రకటన చేయాలి.

» అందుకు యేసుపునరుత్థానమును జీవమును నేనే; నాయందు విశ్వాసముంచువాడు చని పోయినను బ్రదుకును; బ్రదికి నాయందు విశ్వాస ముంచు ప్రతివాడును ఎన్నటికిని చనిపోడు. – (యోహాను. 11:25,26).

3). మృతులు అనగా యేసుక్రీస్తు సువార్తకు లోబడనివారు. ఆయన సువార్తకు లోబడనివారికి నీవు తెలియజేయవలసినది ఏమనగా “పాపముల విషయములో చనిపోయిన నీవు క్రీస్తు సువార్త ద్వారానే బ్రతుకుతావని అలా చెప్పుటకు సాక్షిని నేనే అని చెప్తూ, ఆ మృతుడు క్రీస్తు రాజ్యములో (CHURCH OF CHRIST) ప్రవేశించు వరకూ  ఆయన మరణమును గూర్చి ప్రకటన చేయాలి.”

» మృతులు దేవుని కుమారుని శబ్దము విను గడియ వచ్చుచున్నది, ఇప్పుడే వచ్చియున్నది, దానిని వినువారు జీవింతురని మీతో నిశ్చయముగా చెప్పుచున్నాను. – (యోహాను. 5:25).

C). "స్వపరీక్ష" : (1 కొరింధి. 11:27-28).

» కాబట్టి యెవడు అయోగ్యముగా ప్రభువు యొక్క రొట్టెను తినునో, లేక ఆయన పాత్రలోనిది త్రాగునో, వాడు ప్రభువుయొక్క శరీరమును గూర్చియు రక్తమును గూర్చియు అపరాధియగును. కాబట్టి ప్రతి మనుష్యుడు తన్ను తాను పరీక్షించుకొనవలెను; ఆలాగుచేసి ఆ రొట్టెను తిని, ఆ పాత్రలోనిది త్రాగవలెను.

★ స్వపరీక్ష అనగా తనకు తాను పరీక్షించుకొనుట

మనస్సు మార్పునొంది, దుష్టత్వాన్ని మానుకొని చెడు కార్యములను విడిచి పెట్టుటకు, తన మనసాక్షి నిమిత్తము  తప్పులను సరిచేసుకుని, క్రీస్తులాంటి జీవితమును జీవించాలని ఆలోచన కలిగి హృదయపూర్వకముగా కోరుకునేవారికి ప్రభురాత్రి భోజనము ఒక గొప్ప అవకాశము.

ప్రియ సహోదరుడా,  క్రీస్తువారు కూడా ఈ లోకములో ఉన్నప్పుడు తనని సిలువకు అప్పగించిన ఇస్కరియోతు యూదా యొక్క ఆలోచన ముందుగానే ఎరిగి, మనస్సు మార్చుకునే అవకాశమును ఇవ్వడము జరిగింది కాని యూదా మాత్రము అయోగ్యముగానే క్రీస్తు బల్లలో పాలు పొందాడు, చివరికి క్షమాపణ లేకుండానే మరణించాడు. ఆనాడు యూదాకి ఎలాగైతే అవకాశామునిచ్చాడో  ఈనాడు మనకు కూడా ప్రభురాత్రి భోజనము ద్వారా అవకాశమును కల్పించాడు. అయినప్పటికీ దానిని నీవు ఎంతమాత్రము లెక్క చేయకుండా అయోగ్యముగానే అందులో పాలు పొందితే  ఇస్కరియోతు యూదాలాంటి స్థితిని కొరి కొనితెచ్చుకుంటున్నావేమో అని నిన్ను నీవు పరీక్షించుకుని ఆ బల్లలో పాలుపొందాలని కొరింధి పత్రికలో వ్రాయబడిన మాటల సారాంశమని గ్రహించాలి.

» సాయంకాలమైనప్పుడు ఆయన పండ్రెండుమంది శిష్యులతోకూడ భోజనమునకు కూర్చుం డెను. వారు భోజనము చేయుచుండగా ఆయన మీలో ఒకడు నన్ను అప్పగించునని మీతో నిశ్చయముగా చెప్పుచున్నాననెను. అందుకు వారు బహు దుఃఖపడి ప్రతివాడును ప్రభువా, నేనా? అని ఆయన నడుగగా ఆయన నాతోకూడ పాత్రలో చెయ్యి ముంచినవాడెవడో వాడే నన్ను అప్పగించువాడు. మనుష్యకుమారునిగూర్చి వ్రాయబడిన ప్రకారము ఆయన పోవు చున్నాడు గాని యెవనిచేత మనుష్యకుమారుడు అప్పగింపబడుచున్నాడో ఆ మనుష్యునికి శ్రమ; ఆ మనుష్యుడు పుట్టియుండనియెడల వానికి మేలని చెప్పెను. ఆయనను అప్పగించిన యూదా బోధకుడా, నేనా? అని అడుగగా ఆయన నీవన్నట్టే అనెను. – (మత్తయి. 26:20-25).

D). "వివేచన" : (1 కొరింధి. 11:29).

» ప్రభువు శరీరమని వివేచింపక తిని త్రాగువాడు తనకు శిక్షావిధి కలుగుటకే తిని త్రాగుచున్నాడు. ఇందువలననే మీలో అనేకులు బలహీనులును రోగు లునై యున్నారు; చాలమంది నిద్రించుచున్నారు.

★ వివేచన అనగా ఆలోచించుట లేక గ్రహించుట.

◆ సహోదరులారా, ప్రభురాత్రి భోజనములో భాగంగా రొట్టెను తీసుకునేటప్పుడు అది క్రీస్తు శరీరముకు సాదృశ్యమని, ద్రాక్షారసమును తీసుకునేటప్పుడు అది క్రీస్తు రక్తమునకు సాదృశ్యమనే భావన కలిగియున్నారు కాని వాస్తవానికి రొట్టె క్రీస్తు శరీరముకు, ద్రాక్షారసము ఆయన రక్తముకు చిహ్నమని గ్రహించలేకపోతున్నారు.

◆ నేటి సంఘాలలో చాలామంది ప్రభురాత్రి భోజనము కార్యక్రమము చేస్తున్నపుడు రొట్టెను, ద్రాక్షారసమును పంచిపెడుతూ అవి క్రీస్తు శరీరముకు మరియు రక్తముకు సాదృశ్యముగా చెప్తుంటారు కాని సహోదరుడా ప్రభురాత్రి భోజన కార్యక్రమంలో సాదృశ్యమనే పదము వాడుట సరియైనది కాదు ఎందుకనగా సాదృశ్యము (figure ) అనగా ఆకారము, ఆకృతి, స్వరూపము, బింబము అని అర్థము వసున్నది. దీనినిబట్టి ఆలోచన చేయగలిగితే రొట్టె క్రీస్తు శరీర ఆకారము కాదు మరియు ద్రాక్షారసము ఆయన రక్తము కాదు కనుక సాదృశ్యమనే భావనతో ఆయన బల్లలో చేయి పెట్టకూడదు.

◆ ప్రభురాత్రి భోజనములో పాలు పొందే ప్రతి క్రైస్తవుడు గుర్తుపెట్టుకోవాల్సిన విషయమేమిటంటే, రొట్టె అనగా సిలువలో నలుగగొట్టబడిన క్రీస్తు శరీరముకు చిహ్నమని, ద్రాక్షారసమనగా ఆయన ఎన్నో గాయములనొంది సిలువలో కార్చిన రక్తముకు చిహ్నమని ఆలోచన కలిగియుండాలి, వివేచనతో ఆ పాత్రలో చేయి పెట్టాలి.  (చిహ్నము అనగా గుర్తు).

◆ క్రీస్తు శరీరము అనగా సంఘము కాని రొట్టె కాదు. అపోస్తలుడైన పౌలుగారు శరీరమంటే సంఘమనే ఉద్దేశముతోనే మాట్లాడటం జరిగిందని గ్రహించాలి. ఎందుకనగా కొరింధిలో ఉన్న క్రీస్తు సంఘములో వివిధ భావాలు ఏర్పడి కక్ష్యలు, పేద, ధనిక అనే  భేధాలు కలిగియున్నారు కనుక వారిని హెచ్చరిస్తూ ఈలాగు చెప్పెను..

◆ మనమంతా క్రీస్తు శరీరములో అనగా క్రీస్తు సంఘములో (CHURCH OF CHRIST) అవయవములుగా చేర్చబడ్డామని, ఆయన శరీరమములో అవయవములన్ని ఏలాగైతే ఒక్కటిగా కలిసియున్నాయో  అలాగే క్రీస్తు సంఘములో చేర్చబడిన మనము ఏక మనస్సును, ఏక ప్రేమ, ఏక భావము, ఏక తాత్పర్యమును కలిగియుండాలని, ఒకరితో ఒకరు సమాధానము కలిగి దేవునితో సమాధానపరచవలెనని అందుకే క్రీస్తు ఈ లోకములో మరణించాడని వారికి గుర్తుచేస్తూ  ప్రభురాత్రి భోజనము యొక్క ప్రాముఖ్యతను వారికి తెలియజేయడమైనది. 

 » ఆ సంఘము ఆయన శరీరము. – (ఎఫేసీ. 1:23).

 » కావున నీవు బలిపీఠమునొద్ద అర్పణము నర్పించుచుండగా నీమీద నీ సహోదరునికి విరోధ మేమైననుకలదని అక్కడ నీకు జ్ఞాపకము వచ్చినయెడల అక్కడ బలిపీఠము నెదుటనే నీ యర్పణము విడిచిపెట్టి, మొదట వెళ్లి నీ సహోదరునితో సమాధానపడుము; అటు తరువాత వచ్చి నీ యర్పణము నర్పింపుము. – (మత్తయి. 5:22-24).

 » ఆయన మన సమాధానమైయుండి మీకును మాకును ఉండిన ద్వేషమును, అనగా విధిరూపకమైన ఆజ్ఞలుగల ధర్మశాస్త్ర మును తన శరీరమందు కొట్టివేయుటచేత మధ్యగోడను పడగొట్టి, మన ఉభయులను ఏకముచేసెను. ఇట్లు సంధిచేయుచు, ఈ యిద్దరిని తనయందు ఒక్క నూతన పురుషునిగా సృష్టించి, తన సిలువవలన ఆ ద్వేషమును సంహరించి, దాని ద్వారా వీరిద్దరిని ఏకశరీరముగా చేసి, దేవునితో సమాధానపరచవలెనని యీలాగు చేసెను గనుక ఆయనయే మనకు సమాధానకారకుడై యున్నాడు. మరియు ఆయన వచ్చి దూరస్థులైన మీకును సమీపస్థులైన వారికిని సమాధాన సువార్తను ప్రకటించెను. – (ఎఫెసీ. 2:14-17).

 » ఏలాగు శరీరము ఏకమైయున్నను అనేకమైన అవయవ ములు కలిగియున్నదో, యేలాగు శరీరముయొక్క అవ యవములన్నియు అనేకములైయున్నను ఒక్కశరీరమై యున్నవో, ఆలాగే క్రీస్తు ఉన్నాడు. – (1 కొరింధి. 12:12).

కాబట్టి, ప్రతి ఆదివారము ప్రభురాత్రి భోజనములో చేయి పెడుతున్న నీవు నీ సహోదరునితో సమాధానము కలిగియున్నావా?, అన్ని విషయములలో, అన్ని సమయాలలో  క్రీస్తు సంఘముతో ఏకీభవిస్తున్నావా? అని వివేచన కలిగి  ఆ పాత్రలో చేయి పెట్టాలనేది ఆ వచనముల ఉద్దేశమైయున్నది కాని బాప్తీస్మము తీసుకున్నాను కదా అందులో పాలు పంచుకోవాలి కదా అని వివేచన లేకుండా నిన్ను నీవు పరీక్షించుకొనకుండా ఒక ఆచారముగా తీసుకోవాలని సిద్ధపడితే అది శిక్షావిదికే కారకమగును కనుక ఆలోచన చేసి జాగ్రత్తగా ఆయన ఆజన ప్రకారము ప్రభువు బల్ల కార్యక్రమమును నెరవేర్చాలని నన్ను నేను హెచ్చరిక చేసుకొనుచూ మీకు మనవి చేయుచున్నాను.

మీ ఆత్మీయులు,

నవీన మనోహర్.  

"విధేయత" (Obey)

విధేయత 

ప్రియమైన సహోదరీ, సహోదరులకు మన ప్రభువైన యేసుక్రీస్తు నామములో నా హృదయపూర్వక వందనములు.

★ విధేయత అనగా "లోబడుట, భయము కలిగి యుండుట, చెప్పిన పని చేయుట".  

ప్రియులారా నేటి క్రైస్తవులలో అనేకమంది దేవునికి విధేయత చూపించే విషయములో చాలా వెనకబడి ఉన్నారు. మన జీవితాలలో విధేయత చాలా ప్రాముఖ్యమైనది. ఉదా: ఒక ఉద్యోగి తన అధికారికి విధేయత చూపిస్తేనే తన జీతము తాను పొందుకోగలడు, కుటుంబములో పిల్లలు తమ తలితండ్రుల యెడల విధేయత కలిగియుంటేనే తాము ఆశపడినవి అనుభవించగలరు. ఇలా చెప్పుకుంటూ పోతే అనేక ఉదాహరణలు కలవు. కేవలము ఈ భౌతిక సంబంధమైన జీవితమూ కొరకే ఈ లోకస్థుల యెడల మనము ఇంత విధేయత చూపించగలితే మనలను సృజించి, తన కుమారుని పంపి ఆయన ద్వారా రక్షణను అనుగ్రహించి, తన కుమారునితో సమాన వారసత్వాన్ని ఇచ్చిన దేవునికి మనమెంత విధేయత చూపించాలో ఆలోచించాల్సిన అవసరత ఎంతైనా ఉంది.  

మనము జ్ఞానయుక్తముగా ఉండాలని దేవుడు కోరుకుంటున్నాడు. దేవుడు ఏం కోరుకుంటున్నాడో ఆ విషయాలలో మనము విధేయత చూపించి, లోబడాలని ఆయన ఆశపడుతున్నాడు. దేవునికి విధేయత చూపించాల్సిన విషయాలలో అతి ప్రాముఖ్యమైన సంగతులను ఈ అంశము ద్వారా ఆలోచన చేద్దాము.

A). క్రీస్తు సువార్తకు విధేయత చూపాలి :

తన కుమారుడైన క్రీస్తు సువార్తకు లోబడాలని దేవుడు కోరుకుంటున్నాడు. మనము తన కుమారుని ద్వారా మరియు అపోస్తులుల బోధ ద్వారా ఏ ఏ సంగతులు పరిశుద్ధ గ్రంథములో వ్రాయబడియున్నవో వాటన్నిటికి విధేయత చూపి తండ్రిని సేవించాలని ఆశపడుతున్నాడు.

● నాకియ్యబడిన ఉపదేశమును మొదట మీకు అప్పగించితిని. అదేమనగా, లేఖనముల ప్రకారము క్రీస్తు మన పాపములనిమిత్తము మృతిపొందెను, సమాధిచేయబడెను, లేఖనముల ప్రకారము మూడవదినమున లేపబడెను. – (1 కొరింధి. 15:3-4).

● ఏలాగనగా క్రీస్తు సువార్తను అంగీకరింతుమని ఒప్పుకొనుటయందు మీరు విధేయులైనందుచేతను,... – (2 కొరింధి. 9:13).

● మీరు క్షయబీజమునుండి కాక, శాశ్వతమగు జీవముగల దేవునివాక్య మూలముగా అక్షయబీజమునుండి పుట్టింపబడినవారు గనుక నిష్కపటమైన సహోదరప్రేమ కలుగునట్లు, మీరు సత్యమునకు విధేయులవుటచేత మీ మనస్సులను పవిత్రపరచుకొనినవారైయుండి, యొకనినొకడు హృదయపూర్వకముగాను మిక్కటముగాను ప్రేమించుడి. – (1 పేతురు. 1:22).

●  మీరు పాపమునకు దాసులై యుంటిరి గాని యే ఉపదేశ క్రమమునకు మీరు అప్పగింపబడితిరో, దానికి హృదయపూర్వముగా లోబడిన వారై. – (రోమా. 6:17).

B). దేవుని వాక్యము చదువుటలోనూ, నేర్చుకొనుటలోనూ విధేయత చూపాలి :

మనలో అనేకమంది దేవుని వాక్యము చదివే విషయములోనూ, వాటిని అభ్యసించి నేర్చుకొను విషయములోను అశ్రద్ధ చూపిస్తూ, తమ సొంత పనుల నిమిత్తము దేవుని పనిని వాయిదా వేస్తున్నారు. దేవునికి విధేయత చూపలేకపోతున్నారు అలాంటి వారికి గ్రంథము చెప్పే సమాధానము,

● వారు తమ మనస్సులో దేవునికి చోటియ్యనొల్లకపోయిరి గనుక చేయరాని కార్యములు చేయుటకు దేవుడు భ్రష్ట మనస్సుకు వారినప్పగించెను. – (రోమా. 1:28).

● నా జనులు అవివేకులువారు నన్నెరుగరు, వారు మూఢు లైన పిల్లలు వారికి తెలివిలేదు, కీడుచేయుటకు వారికి తెలియును గాని మేలుచేయుటకు వారికి బుద్ధి చాలదు. – (యిర్మియా. 4:22).

● యెహోవాయందు భయభక్తులు కలిగియుండుట తెలివికి మూలము మూర్ఖులు జ్ఞానమును ఉపదేశమును తిరస్కరించుదురు. – (సామెతలు. 1:7).

● నీతి ప్రవర్తనగలవారై మేల్కొని, పాపము చేయకుడి; దేవునిగూర్చిన జ్ఞానము కొందరికి లేదు. మీకు సిగ్గు కలుగుటకై యిట్లు చెప్పుచున్నాను. – (1 కొరింధి. 15:34).

● దేవుని ఎరుగుదుమని వారు చెప్పుకొందురు గాని అసహ్యులును అవిధేయులును ప్రతి సత్కార్యము విషయము భ్రష్టులునైయుండి, తమ క్రియలవలన ఆయనను ఎరుగమన్నట్టున్నారు. – (తీతుకు. 1:16).

C). దేవుని మాటలను బోధించే విషయములో విధేయత చూపాలి :

ప్రియులారా ఈనాడు అనేకమంది క్రైస్తవులు దేవుని వాక్యమును నేర్చుకొనుటలో చూపించే ఆసక్తి ఇతరులకి బోధించే విషయములో చూపించలేకపొతున్నారు. కాని మనలో ప్రతీ ఒక్కరు దేవునికి విధేయత చూపించి, ఆయన మాటలను లోకమునకు తెలియజేయు విషయములో పాలిభాగస్థులమవ్వాలని గ్రంథము సెలవిస్తుంది.

● నీవు వచ్చునప్పుడు నేను త్రోయలో కర్పునొద్ద ఉంచి వచ్చిన అంగీని పుస్తకములను, ముఖ్యముగా చర్మపు కాగితములను తీసికొని రమ్ము. – (2 తిమోతి. 4:12).

● మీకు దేవుని వాక్యము బోధించి, మీపైని నాయ కులుగా ఉన్నవారిని జ్ఞాపకము చేసికొని, వారి ప్రవర్తన ఫలమును శ్రద్ధగా తలంచుకొనుచు, వారి విశ్వాసమును అనుసరించుడి. – (హెబ్రీ. 13:7).

● ఇందునిమిత్తము ప్రభువునందు నాకు ప్రియుడును నమ్మకమైన నా కుమారుడునగు తిమోతిని మీ యొద్దకు పంపియున్నాను. అతడు క్రీస్తునందు నేను నడుచుకొను విధమును, అనగా ప్రతి స్థలములోను ప్రతి సంఘములోను నేను బోధించు విధమును, మీకు జ్ఞాపకము చేయును. – (1 కొరింధి. 4:12).

● పుర్రు కుమారుడును బెరైయదేశస్థుడునైన సోపత్రును, థెస్సలొనీకైయలలో అరిస్తార్కును, సెకుందును, దెర్బే పట్టణస్థుడైన గాయియును, తిమొథెయును, ఆసియ దేశస్థులైన తుకికును, త్రోపిమును అతనితో కూడ వచ్చిరి. – (అపొ.కార్య. 20:4).

● క్రీస్తుయేసునందు నాతోటి ఖైదియైన ఎపఫ్రాయు, నా జతపనివారైన మార్కు, అరిస్తార్కు, దేమా, లూకాయు వందనములు చెప్పుచున్నారు. – (ఫిలోమోను. 1:24).

● తీతు ఎవడని ( యెవరైన అడిగినయెడల) - అతడు నా పాలివాడును మీ విషయములో నా జత పనివాడునైయున్నాడనియు; - మన సహోదరులెవరని ( అడిగినయెడల) - వారు సంఘముల దూతలును క్రీస్తు మహిమయునై యున్నారనియు నేను చెప్పుచున్నాను. – (2 కొరింధి. 8:23).

D). క్రీస్తు నిమిత్తము శ్రమలు పొందే విషయములో విధేయత చూపాలి :

సహోదరీ, సహోదరులారా నేటి క్రైస్తవులమైన మనము చాలా విషయాలలో విధేయత చూపగలుగుతున్నాము కాని చిన్న శోధన కలిగినా, శ్రమలు కలిగినా దేవునికి విధేయత చూపకుండా, ఆ శోధనను మహా ఆనందమని ఎంచుకొనక అపవాదికి లోబడిపోవుచున్నారు. క్రీస్తు వలె ప్రతి యొక్క శ్రమను జయించి, క్రీస్తు ఏలాగైతే దేవునికి విధేయుడై మరణమును జయించాడో అలాగే మనము ఉండాలని దేవుడు కోరుకుంటున్నాడు.

● తాను (యేసు) శోధింపబడి శ్రమ పొందెను గనుక శోధింపబడువారికిని సహాయము చేయ గలవాడై యున్నాడు. – (హెబ్రీ. 2:17).

● క్రీస్తు యేసునందు సద్భక్తితో బ్రదుక నుద్దేశించువారందరు హింస పొందుదురు. – (2 తిమోతి. 3:12).

క్రీస్తుకూడ మీకొరకు బాధపడి, మీరు తన అడుగుజాడలనుబట్టి నడుచుకొనునట్లు మీకు మాదిరి యుంచిపోయెను. – (1 పేతురు. 2:21).

● శిష్యుల మనస్సులను దృఢపరచి - విశ్వాసమందు నిలుకడగా ఉండవలెననియు, అనేక శ్రమలను అనుభవించి మనము దేవుని రాజ్యములో ప్రవేశింపవలెననియు వారిని హెచ్చరించిరి. – (అపొ.కార్య. 14:22).

● కాబట్టి ఇకను సహింపజాలక అతేనైలో మేమెంటిగానైనను ఉండుట మంచిదని యెంచి, యీ శ్రమల వలన ఎవడును కదిలింపబడకుండునట్లు మిమ్మును స్థిరపరచుటకును, మీ విశ్వాసవిషయమై మిమ్మును హెచ్చరించుటకును, మన సహోదరుడును క్రీస్తు సువార్త విషయములో దేవుని పరిచారకుడునైన తిమొథెయును పంపితిమి. మేము మీయొద్ద ఉన్నప్పుడు, మనము శ్రమను అనుభవింపవలసియున్నదని మీతో ముందుగా చెప్పితిమి గదా? ఆలాగే జరిగినది. ఇది మీకును తెలియును; అట్టి శ్రమలను అనుభవించుటకు మనము నియమింపబడినవారమని మీరెరుగుదురు. – (1 ధేస్సలోని. 3:3).

● మీరొకవేళ నీతినిమిత్తము శ్రమ పడినను మీరు ధన్యులే; వారి బెదరింపునకు భయపడకుడి కలవరపడకుడి. – (1 పేతురు. 3:14).

● క్షణమాత్రముండు మా చులకని శ్రమ మాకొరకు అంత కంతకు ఎక్కువగా నిత్యమైన మహిమ భారమును కలుగ జేయుచున్నది. ఏలయనగా దృశ్యమైనవి అనిత్యములు; అదృశ్యమైనవి నిత్యములు. – (2 కొరింధి. 4:18).

నా ప్రియ సహోదరులారా, మనము అడిగిన ప్రతీ ఈవిని దేవుడు మనకు దయజేస్తున్నాడు, మన కుటుంబములోను, పనులలోను, ఆరోగ్యములోను, ఇలా ఇహ సంబంధమైన ప్రతి విషయములోను మనకు అన్నియు సమకూరుస్తున్నాడు. అంతేకాదు మన ఆత్మ నశించిపోకుండా క్రీస్తును ఈ లోకమునకు పంపి (యోహాను. 3:16-17), ఆయన సిలువ మరణము ద్వారా మనలను విమోచించాడు (కొలస్సి. 1:14). అటువంటి దేవుడు మన నుండి విధేయత మాత్రము కోరుకుంటున్నాడు, తన మాటలకు లోబడాలని ఆశపడుతున్నాడు.  

కాబట్టి ప్రియులారా, ఈ సంగతులు మాకెందుకు అని అనుకుని దేవుని యెడల అవిధేయత చూపిస్తూ దేవుడు మన నుండి ఏం కోరుకుంటున్నాడో ఆ విషయములను ప్రక్కన పెట్టి దేవుని యెడల విధేయత లేకుండా ఆయనకు లోబడకుండా మనకు నచ్చినట్లుగా ప్రవర్తిస్తే ఒకానొక రోజున చాలా బాధపడే అవకాశము ఉంది కనుక పరిశుద్ధ గ్రంథములో చెప్పబడిన సంగతులను ఆలోచన చేయవలసినదిగా నన్ను నేను హెచ్చరిక చేసికొనుచున్నాను మీకు మనవి చేయుచున్నాను.

యేసు ఆకారమందు మనుష్యుడుగా కనబడి, మరణము పొందునంతగా, అనగా సిలువమరణము పొందునంతగా విధేయత చూపినవాడై, తన్నుతాను తగ్గించు కొనెను. – (ఫిలిప్పి. 2:8). 

మీ ఆత్మీయులు,

నవీన మనోహర్.  

"దేవుని క్రమములో పురుషుని పాత్ర". (Role of Men)

అంశము: "దేవుని క్రమములో పురుషుని పాత్ర". 

నా తోటి సహోదరీ, సహోదరులారా!!

మీకు మన ప్రభువైన యేసుక్రీస్తు  నామములో నా వందనములు.

(ఆదికాండము. 2: 7)
దేవుడైన యెహోవా నేలమంటితో నరుని నిర్మించి వాని నాసికా రంధ్రములలో జీవవాయువును ఊదగా నరుడు జీవాత్మ ఆయెను.

◆ నరుడు - దేవుని పోలిక దేవుని స్వరూపం - ఆత్మ

దేవుడు తన స్వరూపమందు నరుని సృజించెను; దేవుని స్వరూపమందు వాని సృజించెను; (ఆదికాండము. 1:27).

ఆది యందు మన తండ్రియైన దేవుడు స్త్రీ లేనప్పుడే అనగా ఆదాము ఒంటరిగా ఉన్న దినములలో(ఆదికాండము. 2:18) అయన తన ఆలోచనలను, ఆజ్ఞలను ఆదాముకి జారీచేశారు.

తండ్రియైన దేవుడు మొదటి మనుష్యుడు(నరుడు) ఒంటరిగా నుండుట మంచిది కాదు అని చూసి అతనికి సాటియైన సహాయము కొరకు దేవుడు ఆదాము నుండి తీసిన ప్రక్కటెముకను స్త్రీనిగా నిర్మించారు. (ఆది. 1:27; 2:18; 21-22).

● స్త్రీ ద్వారా శాపము కలుగకమునుపు వారు ఇరువురు దేవునితో మంచి ఆత్మీయ సంబంధములు కలిగి ఉండేవారు.
● దేవుడు వారిని ఆశీర్వదించి, ఫలించమని, అభివృద్ధిపొందమని, విస్తరించమని, భూమిని నిండించి దానిని లోబరచుకొనమని చెప్పెను. (ఆది. కాండ. 1:28).
● దేవుడు ఇచ్చిన ఆజ్ఞను మరచి స్త్రీకి లోబడుట వలననే ఆదాము ఆమె చేత మోసగింపబడ్డాడు. (ఆది. 2:17; 3:17; 1 తిమోతి. 2:14).

"పురుషుని నాయకత్వములో ఆశీర్వదింపబడిన కుటుంబాలు"

● "నోవహు కుటుంబము" - (ఆది. 7:13; హెబ్రీ. 11:7).
● "అబ్రాహాము కుటుంబము" - (ఆది. 18:18-19; హెబ్రీ. 11:8; 17).
● "ఇస్సాకు కుటుంబము" - (ఆది. 25:21-23; హెబ్రీ. 11;9; 20).
● "యాకోబు కుటుంబము" - (ఆది. 28:13-15; హెబ్రీ. 11:21).
● "యోసేపు కుటుంబము" - (ఆది. 39:23; 41:45-46; హెబ్రీ. 11:22).
● "మోషే కుటుంబము" - (నిర్గమ. 2:21-25; 3:12 హెబ్రీ. 11:23-26).
● "యెహోషువ కుటుంబము" - (యెహోషువ. 24:15)
● "దావీదు కుటుంబము" - (2 సమూయేలు. 7:29).
● "యోబు కుటుంబము" - (యోబు. 1:1-5).
● "పేతురు కుటుంబము" - (1 కొరింథీ. 9:5).
● "అకుల కుటుంబము" - (అపొ.కార్య. 18:26; రోమా.16:3).
● "కొర్నేలి కుటుంబము" - (అపొ.కార్య. 10:1-2).
● "చెరసాల నాయకుని కుటుంబము" - (అపొ.కార్య. 16:27; 31-33).

"స్త్రీకి లోబడిన పురుషుని యొక్క స్థితి"

● "హవ్వకి లోబడిన ఆదాము". - (ఆది. 3:6).
*ఫలితము - (ఆది. 3:9-21).
● "యెజెబెలుకి లోబడిన అహాబు" - (1 రాజులు. 21:6-8).  *ఫలితము - (1 రాజులు. 22:21-40).
● "భార్యలుకు లోబడిన సొలొమోను" - (1 రాజులు. 11:1-8).  *ఫలితము - (1 రాజులు. 11:11-14).
● "హేరోదియకు లోబడిన హేరోదు". - (మత్తయి. 14:3-11).
● "సప్పీరాతో ఆలోచనలో లోబడిన అననీయ" - (అపొ.కార్య. 5:1-4).  *ఫలితము - (అపొ.కార్య. 5:5-10).

 కుటుంబములో భార్య - భర్తల మధ్య పాత్ర 

A). భర్త భార్యకును అలాగుననే భార్య భర్తకును వారి వారి ధర్మములు నడుపవలెను. -
(1 కొరింథీ. 7:3).
B). పురుషులారా, మీరును మీ భార్యలను ప్రేమించుడి. - (ఎఫెసీ. 5: 25).
C). పురుషులు కూడ తమ సొంత శరీరములనువలె తమ భార్యలను ప్రేమింప బద్ధులైయున్నారు - (ఎఫెసీ. 5:28)
D). ఎక్కువ "బలహీనమైన ఘటమని" భార్యను సన్మానించి - (1 పేతురు 3:7a)
E). జ్ఞానము చొప్పున కాపురము చేయాలి. - (1పేతురు 3:7b).
F). భార్యను లేదా భర్తను దూరముగా పెట్టె కార్యక్రమమును దేవుడు అంగీకరించడు. -
(1 కొరింథీ. 7:5).
G). భర్త తన సొంత భార్యను పోషించి సంరక్షించుకొనవలెను. - ( ఎఫెసీ. 5:30).
H). అవిశ్వాసురాలైన భార్య యుండి, ఆమె అతనితో కాపురము చేయ నిష్టపడిన యెడల, అతడు ఆమెను పరిత్యజింపకూడదు. -
(1 కొరింథీ. 7:12).
I). అవిశ్వాసురాలైన భార్య విశ్వాసియైన భర్తనుబట్టి (మూలభాషలో-సహోదరుని బట్టి) పరిశుద్ధపరచబడును. - (1 కొరింథీ. 7:14).
J). "మీరు యోగ్య ప్రవర్తనులై, తొందర యేమియు లేక ప్రభువు సన్నిధాన వర్తనులైయుండవలెనని యిది మీ ప్రయోజనము నిమిత్తమే చెప్పుచున్నాను." - (1 కొరింథీ. 7:33-35).
K). "సత్యము కొరకు పోరాటము చేస్తున్న తన భార్యకి పురుషుడు మంచి సహకారై ( అకుల వలె) ఉండాలి." - (అపొ.కార్య 18:26; రోమా 16:4).
L). "పురుషుడు వచ్చి భార్యను హత్తుకొనిన యెడల వారు ఇరువురు ఏక శరీరమైయుందురు కావున వారి ఆలోచనలు, పనులు, నిర్ణయాలు ఒక్కటిగా ఉండాలి" - (ఆది. 2:24; మత్తయి. 19:5; మార్కు. 10:7; ఎఫెసీ. 5:31).
M). "పిల్లలును దేవునిలో పెంచే కార్యక్రమము భార్యభర్తలకు ఇవ్వబడినది". - (ద్వితీయో. 6:7-9; సామెతలు. 22:6; ఎపేసి. 5:31).
N). భార్యకు బద్ధుడవైయుంటివా? విడుదల కోరవద్దు. భార్యలేక విడిగానుంటివా? వివాహము కోరవద్దు. - (1 కొరింథీ. 7: 27).
O). పురుషుడు తన యింటి వారును బాగుగా ఏలువాడునై యుండాలి. - (1 తిమోతి. 3:4).
P). పురుషుడు తన యింటివారిని ఏలనేరక పోయినయెడల అతడు దేవుని సంఘమును ఏలాగు పాలించును? - (1 తిమోతి. 3:5).

Note:- కుటుంబములో లోకానుసారమైన సమస్యలు ఉంటే సంఘములో ఆ పురుషుడు పరిపాలన చేయుటకు అర్హత లేదు.

"సంఘములో పురుషుని యొక్క బాధ్యత"

● దేవునియెదుట యోగ్యునిగాను, సిగ్గుపడ నక్కరలేని పనివానిగాను, సత్యవాక్యమును సరిగా ఉపదేశించువానిగాను(సరిగా విభజించు వానిగాను) నిన్ను నీవే దేవునికి కనుపరచు కొనుటకు జాగ్రత్తపడుము. - (1 తిమోతి. 2:15; ఎజ్రా. 7:10).
● ప్రతి స్థలమందును పురుషులు కోపమును సంశయమును లేనివారై, పవిత్రమైన చేతులెత్తి ప్రార్థన చేయవలెనని కోరుచున్నాను. -
(1 తిమోతి. 2:8).
● వాక్చాతుర్యము లేకుండ సువార్త ప్రకటించాలి. - (1 కొరింథీ. 1:17; 2:1 9:16; ఎఫెసీ. 6;19 )
● మిక్కిలి అల్పులైన నీ తోటి సహోదరులకు మేలు చేయవలెను - (మత్తయి. 25:32-40; 2థెస్స. 3: 13).
● అపొస్తలుల ద్వారా వ్రాయబడిన ప్రతి పత్రికలో మనకి బోధింపబడిన విధులను(పారంపర్యములను) చేపట్టాలి. - (2థెస్స. 3:15; 2 తిమోతి 1:13).
● ఒకడు బోధించినయెడల దైవోక్తులను బోధించునట్టు బోధింపవలెను - (1 పేతురు. 4:11).
● సంఘములో అధ్యక్ష పదవిని ఆశించినయెడల (1 తిమోతి. 3:1-5) లో చెప్పబడిన లక్షణములు కలిగి ఉండవలెను.
● సంఘములో పెద్దగా ఉండగోరువారు (తీతుకు. 1:5-9) లో చెప్పబడిన లక్షణములు కలిగి ఉండవలెను.
● జారత్వమునకు దూరముగా ఉండాలి మరియు శరీరాశయు నేత్రాశయు జీవపుడంబము విషయములో జాగ్రత్త కలిగి ఉండాలి - ( 1థెస్స. 4: 3; 1యోహాను. 2:16).
● సమాజముగా కూడుట మానక, ఒకనినొకడు హెచ్చరించుచు, ఆ దినము (ప్రభువు దినము) సమీపించుట మీరు చూచినకొలది మరి యెక్కువగా అలాగు చేయుచు, ప్రేమ చూపుటకును సత్కార్యములు చేయుటకును ఒకనినొకడు పురికొల్పవలెనని(మూలభాషలో-లేపవలెనని) ఆలోచింతము. - (హెబ్రీ. 10:24-25).
● ఒకడు ఏ తప్పితములోనైనను చిక్కుకొనినయెడల ఆత్మసంబంధులైన మీలో ప్రతివాడు తానును శోధింపబడుదునేమో అని తన విషయమై చూచుకొనుచు, సాత్వికమైన మనస్సుతో అట్టివానిని మంచిదారికి తీసికొని రావలెను. -  (గలతీ. 6:1).
● సంఘములో పురుషులు మధ్య ఉపదేశము చేయుటకు తన భార్యకు అధికారము ఇవ్వకూడదు. - (1 కొరింథీ. 14:34-35; 1 తిమోతి. 2:12).
● పరిశుద్ధమును దేవునికి అనుకూలమునైన సజీవ యాగముగా మీ శరీరములను ఆయనకు సమర్పించుకొనవలెను. - (రోమా. 12:1).
● బలహీనుల దౌర్భల్యములను భరించుటకు మరియు సత్యమునకు సహాయకులమవునట్టు(జతపనివారమవునట్లు) అట్టివారికి ఉపకారము చేయ బద్ధులమై యున్నాము. - (రోమా. 15:1; 3 యోహాను. 1:8).
● సంఘములో వృద్ధుని - తండ్రి గాను,
సంఘములో వృద్ధ స్త్రీలను - తల్లులు గాను,
సంఘములో యౌవనులను - అన్నదమ్ములు గాను, సంఘములో యౌవన స్త్రీలను - అక్కచెల్లెండ్రలు గాను భావించి హెచ్చరిక చేయుము. ఇది దేవుని దృష్టికనుకూలమైయున్నది. - (1 తిమోతి. 5:1-5).

గమనిక

◆ కుటుంబములో ప్రతి పురుషుడు తన యొక్క బాధ్యత సక్రమముగా నిర్వర్తిస్తే ఏ కుటుంబము కూడా దేవునికి దూరము కాదు.
◆ సంఘములో ప్రతి పురుషుడు తన యొక్క బాధ్యత గూర్చి ఆలోచించగలిగి అట్టి రీతిగా నడుచుకోగలితే ఆ సంఘము అభివృద్ధి చెందే విషయములో ముందడుగులో ఉంటుంది.

హెచ్చరిక

◆ స్త్రీ పాత్ర లేనిదే పురుషుడు నాయకుడు కాలేడు.

◆ పురుషుడుకు మాత్రమే ఇవ్వబడిన నాయకత్వపు లక్షణములను స్త్రీ అనుసరిoచకూడదు.

* దేవుని క్రమములో స్త్రీ పాత్ర * Click HERE

మీ ఆత్మీయ సహోదరుడు,
మనోహర్ బాబు గుడివాడ

దేవుని క్రమములో స్త్రీ పాత్ర (Role of Women)

💌 అంశము: స్త్రీ పాత్ర (Role of women).

నా తోటి సహోదరీ, సహోదరులారా!
మీకు మన ప్రభువువైన యేసుక్రీస్తు  నామములో నా వందనములు.

నా ప్రియులారా!!
ఆది యందు మన తండ్రియైన దేవుడు స్త్రీ లేనప్పుడే అనగా ఆదాము ఒంటరిగా ఉన్న దినములలో(ఆది. కాండము. 2:18) అయన తన ఆలోచనలను, ఆజ్ఞలను ఆదాముకి జారీచేశారు.

● (ఆది. కాండము. 2:17).
"నీవు"(ఆదాము) మంచి చెడ్డల తెలివినిచ్చు వృక్ష ఫలములను తినకూడదు.

● (ఆది. కాండము. 3: 17).
"నేను(దేవుడు) నీకు(ఆదామునకు)  ఆజ్ఞాపించిన....."

∆ ఆదాముకి మాత్రమే ఇవ్వబడిన ఈ ఆజ్ఞను కాస్తా స్త్రీ నిర్మాణము (ఆది.2:21-23) పిమ్మట...
అపవాది(ఘట సర్పము) ఇలా కలిపేశాడు. అదేమనగా, "మీరు తినకూడదా అని". (ఆది. కాండము. 3:1) మరియు "మీరు చావనే చావరు" అని (ఆది. కాండము. 3:4).

∆ అప్పుడే దేవుని ఆలోచనలకు, ఆజ్ఞకి కల్పితము జరిగింది అంటే వాస్తవానికి ఆదాము హవ్వ కి చెప్పి ఉండవచ్చు కారణము "మేము తినవచ్చు"(ఆది.కాండము. 3:2); " మీరు చావకుండునట్లు".(ఆది. కాండము.3:3).

∆ దేవుడైన యెహోవా ఈ ఆజ్ఞను "స్త్రీ"(హవ్వ) కి ఇచ్చినట్టుగా చూడలేము.

∆ "హవ్వకి దేవుని యొక్క ఆజ్ఞను ఆదాము చెప్పాడు".  దీనిని బట్టి మన తండ్రియైన దేవుడు ఆత్మ సంబంధమైన విషయాలలో స్త్రీ నడిపింపు మీద లేదా స్త్రీ మీద నాయకత్వ కార్యక్రమము  పురుషుడులో పెట్టాడు.

∆ మంచి చెడ్డల తెలివినిచ్చు వృక్ష ఫలములను హవ్వ(స్త్రీ) మాత్రమే తిని ఉంటే ఇంత సమస్య ఉండేది కాదేమో. హవ్వ తిన్నాక కూడా ఏమి జరగలేదు.
" ఆమె దాని ఫలములలో కొన్ని తీసికొని తిని తనతోపాటు ఆదామునకు ఇచ్చెను, అతడుకూడ తినెను" (ఆది. కాండము 3:6)

 ∆ ఆదామునకు మాత్రమే ఇవ్వబడిన ఆ ఆజ్ఞను మీరి దేవునికి లోబడక, స్త్రీకి లోబడుట చేతనే "వారిద్దరి కన్నులు తెరవబడి, వారు తాము దిగంబరులమని తెలుసుకున్నారు" (ఆది. కాండము. 3:7).

★ ఫలాలను తినకూడదు అనే విషయములో స్త్రీ(హవ్వ) ఎక్కడ తనని  తిరస్కరిస్తాదేమోనని ఆలోచన చేసిన పురుషుడు(ఆదాము) తన నాయకత్వమును స్త్రీకి అప్పగించేసాడు.
★ పురుషుడు మీద నాయకత్వమును చేసే కార్యక్రమము స్త్రీకి దేవుడు ఇవ్వలేదు.
★ ఆదాము తన దోషములును దాచిపెట్టాడు - (యోబు. 31:33).
★ "ఆదాము నిబంధన మీరినాడు". - (హోషేయా. 6: 7).
★ ఆదాము, హవ్వ ఇరువురు అవిధేయ స్థితిలోనికి వెళ్లిపోయారు.

■ భర్త అవిధేయుడు అయినచో భార్య అతని మీద నాయకత్వము చేయకూడదు.
"ఆమె పవిత్ర ప్రవర్తన బట్టియు, వాక్యము లేకుండనే తమ భార్యల నడవడివలన అతనిని రాబట్టబడవచ్చును. - (1 పేతురు 3:2).
■ ఆదిలో స్త్రీ(హవ్వ) తన భర్తను(ఆదాము) నడిపించే అధికారమును తీసుకొంది.
■ పురుషుడును మాటలతో ఆకర్షించడానికి, మాటలతో అధికారము చేయుటకు, మాటలతో నడిపించుటకు స్త్రీని అలా ఉద్దేశించి దేవుడు రూపకల్పన చేయలేదు.

★ "స్త్రీ పురుషునికి  ఉపదేశము చేయుటకు, పురుషుడు మీద అధికారము చేయుటకు సెలవు లేదు" - (1 తిమోతి 2:12). ఆదిలో స్త్రీ చేత ఆదాముకి ఉపదేశము, అధికారము ఏదెను తోటలో జరిగింది.
★ ఆదాము మోసపరచబడలేదు గాని, స్త్రీ మోసపరచబడి అపరాధములోపడెను. (1 తిమోతి. 2:14).

* ఏదెను తోటలో సర్పము(అపవాది) ఆదామును మోసపరచలేకపోయాడు.

∆  ఇందుచేతనే స్త్రీ ఉపదేశము చేయుటకు, అధికారము చేయుటకు ఆమెకు సెలవు లేదు అని దేవుని ఆత్మ మనకి తేటగా తెలియపరిచారు.

■ "స్త్రీ నాయకత్వములో శాపము" ■

లోకమునకు శాపమును కొని తెచ్చినది స్త్రీ నాయకత్వమే.


​*"మీరు ఆ ఆజ్ఞను ఆలకింపకయు", నా నామమును ఘనపరచునట్లు మనఃపూర్వకముగా "దానిని ఆలోచింపకయు ఉండినయెడల నేను మీ మీదికి శాపము తెప్పించి మీకు కలిగిన ఆశీర్వాద ఫలమును శపింతును". - (మలాకీ. 2:2).

A). హవ్వ యొక్క కుటుంబమునకు శాపము కొని తెచ్చింది. - (ఆది. 3:15)
B). ఆదామునకు శాపము కొని తెచ్చింది - (ఆది. 3:19)
C). తనకు శాపము కొని తెచ్చుకుంది - (ఆది. 3:16).
D). భూమికి శాపము కొని తెచ్చింది - (ఆది. 3:17-18).


* పురుషుడు మీద స్త్రీ నాయకత్వము చేస్తే ఆ కుటుంబమునకు శాపము వస్తుంది కాని దీవెన రాదు. పురుషుడు నాయకత్వములో మాత్రమే దేవుని యొక్క దీవెన కలదు *


∆ యెహోవా దేవుడు ఏదెను తోటలో స్త్రీని ఒక విధముగా రూపకల్పన చేస్తే ఆమె పురుషుడుకు ఉపదేశము, అధికారము చేయుట వలనే ఆమె ద్వారా అందరికి శాపము వచ్చింది.

■ భార్య - భర్తల మధ్య పాత్ర ■

A). అటువలె స్త్రీలారా, మీరు మీ స్వపురుషులకు లోబడియుండుడి - (1పేతురు. 3:1).

B). సంఘము క్రీస్తునకు లోబడినట్టుగా భార్యలుకూడ ప్రతి విషయములోను తమ పురుషులకు లోబడవలెను. - (ఎఫెసీ. 5: 24).

C). పురుషులారా, మీరును మీ భార్యలను ప్రేమించుడి. - (ఎఫెసీ. 5: 25).

D). పురుషులు కూడ తమ సొంత శరీరములనువలె తమ భార్యలను ప్రేమింప బద్ధులైయున్నారు - (ఎఫెసీ. 5:28)

E). యెక్కువ "బలహీనమైన ఘటమని" భార్యను సన్మానించి - (1 పేతురు 3:7)

F). జ్ఞానము చొప్పున కాపురము చేయాలి. - (1 పేతురు 3:7).

G). భార్యను లేదా భర్తను దూరముగా పెట్టె కార్యక్రమమును దేవుడు అంగీకరించడు. - (1 కోరింది 7:5).

∆ ఇక్కడ కూడా భర్తకి లోబడమని వాక్యము సెలవు ఇస్తుంది. కాని అధికారము లేదా నాయకత్వము చేయమని సెలవు ఇవ్వడము లేదు.


★ ఒక వేళ భర్త అవిశ్వాసి అయినచో వాక్యము చూడు "(1 కోరింది 7:13-14)" వచనములు.
★ ఒక వేళ భర్త అవిధేయుడు అయినచో వాక్యము చూడు "(1 పేతురు. 3:2)" చూడుము.

■ కుటుంబములో స్త్రీ పాత్ర ■

A). స్త్రీ ఇంట ఉండి పనిచేసికొనువారుగా ఉండాలి. (తీతుకు. 2:4).

* (జాబ్ చేయాలా, వద్దా అనేది గ్రంథము సెలవు ఇవ్వలేదు) *

B). భర్తకి లోబడాలి, నాయకత్వము చేయకూడదు. - (1 పేతురు 3:1).

C). పిల్లలును మాత్రమే దేవునిలో "నడిపించే" కార్యక్రమమును తీసుకోవాలి. - (ద్వితీయో. 6:7-9; సామెతలు. 22:6; తీతుకు. 2:4-5).

D). సత్యము కొరకు పోరాటము చేస్తున్న తన భర్తకు స్త్రీ మంచి సహకారై (ప్రిస్కిల్ల వలె) ఉండాలి. - (అపొ.కార్య 18:26; రోమా 16:4).

E). "పురుషుడు వచ్చి భార్యను హత్తుకొనిన యెడల వారిరువురు ఏక శరీరమైయుందురు కావున వారి ఆలోచనలు, పనులు, నిర్ణయాలు ఒక్కటిగా ఉండాలి" - (ఆది. 2:24; మత్తయి. 19:5; మార్కు. 10:7; ఎపేసి. 5:31).

∆ ఏదెను తోటలో ఆదాము కుటుంబము "ఒక్క ఆలోచన యందు, ఒక్క పని యందు, ఒక్క నిర్ణయము యందు" స్థిరముగా లేకపోవటం వలెనే వారు ఏదెను తోట నుండి బహిష్కరించబడ్డారు.

■ "సంఘము 'లో' స్త్రీ పాత్ర" ■ 

★ సంఘము - దేవుని మందిరము - (1 తిమోతి. 3:15)
★ ఉపదేశము అనగా బోధ చేయుట.
★ అధికారము అనగా బాధ్యత, దొరతనము చేయుట, ఆధిపత్యము కోరుట.

★  "ఏదెను తోటలో అనగా పండ్లు తినక ముందు స్త్రీకి పురుషునికి సృష్టి మీద సమాన అధికారాలిచ్చాడు". - (ఆది కాండము 1:28) కాని ఒకరి మీద ఒకరికి అధికారం ఇవ్వలేదు.

★ ఎప్పుడైతే హవ్వ(స్త్రీ) పురుషుని(ఆదాము) మీద అధికారం చేసి దేవుని ఆజ్ఞను తృణీకరించిందో ఆనాడే దేవుడు స్త్రీ మీద అధికారం పురుషునికి ఇచ్చాడు. పురుషుని యెడల స్త్రీకి వాంఛ కలుగజేసాడు. - (ఆది. కాండము. 3:16).

A). సంఘము 'లో' స్త్రీలు ఏమి అలంకరించుకోకూడదో, ఏమి అలంకరించుకోవాలో దేవుని ఆత్మ మనకి తేటగా తెలియపరుస్తున్నారు - (1 తిమోతి. 2:9-10; 1 పేతురు. 3:3-4).

B). సంఘము 'లో' స్త్రీలు మౌనముగా ఉండి, సంపూర్ణ విధేయతతో నేర్చుకొనవలెను. - (1 తిమోతి. 2:11; 1 కోరింది. 14:35).

C). సంఘము 'లో' స్త్రీలు మౌనముగా ఉండాలి, ఉపదేశము చేయుటకు, పురుషుడు మీద అధికారము చేయుటకు ఆమెకి సెలవు లేదు - (1 కోరింది. 14:34; 1 తిమోతి. 2:12).


★ స్త్రీకి సంఘము 'లో' ఉపదేశము, అధికారము చేయుటకు సెలవు లేదని ధర్మశాస్త్రము కూడా చెప్పుచున్నది. - (1 కొరింది. 14:34).

* ఉదా: లేవి గోత్రములో ఉండే మూడు వంశస్థులు మాత్రమే దేవుని మందిరము పై అధికారము కలదు.

1) గెర్షోను - (సంఖ్యా. 3:17-18,21; 3:25-26)
2) కహాతు - (సంఖ్యా. 3:17,19; 3:29-32)
3) మెరారి - (సంఖ్యా. 3:17,20; 3:36-38)
మన తండ్రియైన దేవుడు "ఆ ముగ్గురుకి ఆయా వంశస్థుల వారికి" మూడు రకాల పనులు ఇచ్చారు.

నా సహోదరులారా!! ధర్మశాస్త్రములో ఏ స్త్రీ కూడా దేవుని పరిశుద్ధ స్థలము మరియు అతి పరిశుద్ధ స్థలము లోనికి వెళ్లి సేవ చేసినట్టుగా గ్రంథములో రుజువులు లేవు కారణము అవి లేవి యాజకులకు(పురుషులు) మాత్రమే అప్పగింపబడింది.

పాత నిబంధనలో భక్తిపరులైన స్త్రీలు, ప్రవక్తిలు ఉండవచ్చు కానీ వారు పురుషులు మీద నాయకత్వము వహించినట్టుగా రుజువులు లేవు. ప్రవక్తిరాండ్రుకి దేవుడు ఎలా చెపుతే అలాగునే చేసారు తప్ప పురుషులు మీద అధికారము చేయలేదు.

D) భయభక్తులుగలవారై యుండవలెననియు, దేవుని వాక్యము దూషింపబడకుండునట్లు స్త్రీ జాగ్రత్త వహించాలి - (తీతుకు. 2:3).

E). సంఘములో యవ్వన స్త్రీలు, తమ పిల్లలకి ఉపదేశము చేయవచ్చు - (తీతుకు. 2:4-5).

F) క్రీస్తులోనికి బాప్తిస్మము పొందు కార్యక్రమములో స్త్రీ, పురుషుడు అని బేధము లేదు - ( గలతి. 3:27-28).

F). స్త్రీ ఉపదేశము చేయుటకు సెలవు లేదు అంటే సంఘము 'లో' పురుషుడు మాత్రమే అనే సంగతిని గుర్తుపెట్టుకోవాలి.



★ "స్త్రీ ఎందుకు మౌనము వహిస్తూ, సంఘములో ఉపదేశమును, అధికారము చేయకూడదు.."?.

1) మొదట ఆదామును తరువాత హవ్వయును నిర్మింపబడిరి కారా? - (1 తిమోతి 2:13).
2) ఆదాము మోసపరచబడలేదు గాని, స్త్రీ మోసపరచబడి అపరాధములోపడెను. - (1 తిమోతి 2:14).
3) "స్త్రీకి శిరస్సు పురుషుడు" - ఇది దేవుని క్రమము (శిరస్సు అనగా అధికారమునకు సూచన) - (1 కొరింది. 11:3)


★ మొదటి సృష్టిలో జరిగిన పరిస్థితి అనగా " స్త్రీ నాయకత్వములో శాపము కలిగింది". మరల క్రీస్తు నందు నూతన సృష్టిలో (2 కొరింది. 5:17) అలా జరుగకూడదు అనే దృష్టితో దేవుడు ఆమెకి సెలవు ఇవ్వలేదు.

■ "సువార్త 'లో' స్త్రీ పాత్ర" ■

Note:- స్త్రీ ఉపదేశము చేయుటకు సెలవు లేదు అంటే సంఘము 'లో' పురుషుడుకు మాత్రమే అనే విశేషమైన సంగతిని గుర్తుపెట్టుకోవాలి.

A) ప్రిస్కిల్ల తన భర్తయైన అకులతో పౌలుకొరకు సువార్త విషయములో ప్రాణం యివ్వడానికైనా తెగించింది - (రోమా 16:4).
ప్రిస్కిల్ల అకులయు ఒక సువార్తకునికి బోధ చేస్తున్నారు. ఇది సంఘము యొక్క పరిస్థితి కాదు. ప్రిస్కిల ఇంటి వాతావరణములో జరిగిన కార్యక్రమము. - (అపో.కార్య. 18:24-26).
B) యూనీయ - (రోమా 16:7)
C) త్రుపైనాకు, త్రుఫోసాకు, పెర్సిసు - (రోమా 16:12)
D) యూలియా - (రోమా 16:15)
E) నేరియకు సహోదరి - (రోమా 16:15)
F) ప్రభువైన యేసును సేవించడంలో తనతో ప్రయాసపడిన యువొదియ, సుంటుకే సహాయము చేయుడని పౌలు కోరాడు - (ఫిలిప్పీ 4:2, 3)
G) నుంఫాకు తన యింటిని సంఘ కూడిక స్థలంగా యిచ్చింది - (కొలొస్స 4:15).


★ అన్యులైన పురుషులుకి స్త్రీలకు ఆమె సువార్త ప్రకటన చేయచ్చు (మత్తయి 28:19). కానీ దేవుని మందిరములో బోధ చేయుటకు ఆమెకి సెలవు లేదు

ప్రభువును సేవించడంలో అతడు వారితో కలిసి పని చేశాడు అందుకు వాత్సల్యముతో పౌల్ గారు వారికి వందన వచనాలను పంపారు.

ఆనాడు స్త్రీలు యేసుతో మరియు అపొస్తలతో కలసి సమానముగా సంఘములో ఉపదేశము(బోధ) చేసినట్టుగాని, పురుషులపై వారు అధికారం చేశారనిగాని, సంఘపు ఆరాధనలో నడిపించారనిగాని, పురుషులుతో కూడా సమానముగా నాయకత్వము వహించారు అని గాని నేటి క్రైస్తవ్యం తీర్మానించకూడదు.
 - (లూకా. 6:6; లూకా. 4:21; మత్తయి. 13:53; యోహాను. 6:59; మత్తయి. 21:23 యోహాను. 7:14; యోహాను. 8:2; అపో.కార్య. 5:21; 13:15; 16:31; 1 తిమోతి 2:8).

【 గమనిక 】

◆ పురుషులుకి అసాధ్యమైనది స్త్రీలకు మాత్రమే సాధ్యమైనది దేవుడు ఇచ్చిన వరమే గర్భఫలము. - (కీర్తన 127:3)
◆ పరిశుద్ధ గ్రంథములో స్త్రీ యొక్క పరిచారము  అమోఘమైనది.
◆ కుటుంబము పాత్రలో, తోటి పరిశుద్ధలకు(సంఘము) పరిచారము చేయుటలో, పిల్లలను పెంచే విషయములో, సువార్త పాత్రలో స్త్రీలకి సాటియైన వారు ఎవరు లేరు.

★ స్త్రీ పాత్ర లేకుండా పురుషుడు నాయకుడు కాలేడు.
★ పిల్లలు భక్తిపరులుగా తీర్చిదిద్దబడాలి అనుకుంటే స్త్రీ పాత్ర ఎంతో ఉంది.
★ ఆమె గృహము ఆశీర్వాదించబడాలి అంటే స్త్రీ పాత్ర ఎంతో ఉంది.
★ భర్త నుండి ప్రేమను పొందుకోవాలి అనుకుంటే స్త్రీ పాత్ర ఉంది.

【 హెచ్చరిక 】

 దేవుడు ఒకేఒక్క విషయములోనే అనగా పురుషుడు మీద అధికారము, ఉపదేశము చేయుటకు ఆమెకి నాయకత్వము ఇవ్వలేదు.

● నా ప్రియమైన సహోదరి, దయచేసి దేవుడు ప్రభువుసంఘములో  ఇవ్వని నాయకత్వమును నీవు తీసుకొని, నీవు మరియు నీ కుటుంబము శాపమునకు గురి కావద్దు.

"దేవుని క్రమములో పురుషుడు పాత్ర" Click HERE 

మీ ఆత్మీయ సహోదరుడు,
💌 మనోహర్ బాబు గుడివాడ