"వివాహము" (పార్ట్ - 06) Wedlock

మన ప్రభువైన యేసుక్రీస్తు నామములో మీకు వందనములు 🙏🏻 

*పరిచయం* 

వివాహము మానవ జీవితంలో ఒక ముఖ్యమైన బంధము. అయితే బైబిల్ దృష్టిలో వివాహము కేవలం ఇద్దరు వ్యక్తులు కలిసి జీవించడానికి చేసుకునే సామాజిక ఒప్పందం కాదు. అది దేవుని ఉద్దేశంలో ఏర్పడిన నిబంధనాత్మక బంధము. అందువల్ల వివాహానికి సంబంధించిన విషయాలను మనుష్యుల అభిప్రాయాలు, సంప్రదాయాలు లేదా సమాజపు ఆచారాల ఆధారంగా కాకుండా దేవుని వాక్యము ఆధారంగా పరిశీలించాలి కదూ. మునుపే అట్టి విషయాలను 5 భాగాలుగా వ్రాసితిని వాటిని ఈ అంశము చివరిగా పొందుపరుస్తాము వీలైతే వాటిని క్లిక్ చేసి చదివి ఆలోచన చేయగలరు.

వివాహం అంటే కేవలం ఇద్దరు మనుషులు కలిసి జీవించడం మాత్రమేనా?, లేక దేవుని సన్నిధిలో ఏర్పడే పవిత్రమైన నిబంధనా?, ఒకసారి ఏర్పడిన వివాహ బంధాన్ని మనిషి తన ఇష్టానుసారంగా ముగించి, మరొక వివాహంలోకి అనగా రెండో వివాహంలోకి ప్రవేశించగలడా?, ఒకరు విడాకులు తీసుకున్నప్పుడు రెండో వివాహానికి అర్హుడవుతాడా?, భార్యాభర్తలు విడిగా జీవిస్తే వారి వివాహ బంధం ముగిసినట్టేనా?, భర్త లేదా భార్య మరణించినప్పుడు పరిస్థితి ఎలా ఉంటుంది?, అవిశ్వాసి అయిన జీవిత భాగస్వామి విడిచిపోతే విశ్వాసి ఏమి చేయాలి?, యేసు చెప్పిన “వ్యభిచార నిమిత్తము తప్ప” అనే మాటకు అర్థం ఏమిటి?, రెండో వివాహానికి బైబిల్‌లో ఉన్న పరిస్థితులు ఏమిటి? ఈ విధంగా మొత్తం వాటిని బైబిల్ బోధను సమగ్రంగా పరిశీలించినప్పుడే, వివాహము ఎందుకు ఘనమైనదో, వివాహ బంధం విషయంలో ఎందుకు జాగ్రత్త అవసరమో, రెండో వివాహం విషయంలో ఎందుకు తొందరపడి నిర్ణయం తీసుకోకూడదో స్పష్టమవుతుంది. వీటితో పాటు మరికొన్ని విషయాలను జాగ్రత్తగా నేర్చుకొనుటకు ప్రయత్నము చేద్దాం..

1️⃣. *వివాహ బంధము — దేవుని ముందు ఏర్పడిన బంధము*

పురుషుడు + స్త్రీ = ఏక శరీరము అవ్వటం పరిశుద్ధ వివాహం బంధము. ఈ వివాహంలో నిబంధన అనే భావన ఉంది. "....నీవు చేసిన నిబంధనకు పాత్రురాలు గదా, నీ పెండ్లి భార్య గదా.౹" (మలాకీ 2:14) కాబట్టి పురుషుడు తన తండ్రిని తన తల్లిని విడిచి తన భార్యను హత్తుకొనును; వారు ఏక శరీరమైయుందురు." (ఆదికాండము 2:24) "ఆయన— సృజించినవాడు ఆదినుండి వారిని పురుషునిగాను స్త్రీనిగాను సృజించెననియు –ఇందు నిమిత్తము పురుషుడు తలిదండ్రులను విడిచి తన భార్యను హత్తుకొనును, వారిద్ద రును ఏకశరీరముగా ఉందురని చెప్పెననియు మీరు చదువలేదా? కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను." (మత్తయి 19:4–6) యేసుక్రీస్తు ఇదే సృష్టి క్రమాన్ని ఇలా ధృవీకరించాడు. కాబట్టి వివాహాన్ని మనుష్యుల అభిప్రాయాల ప్రకారం కాకుండా దేవుని వాక్య ప్రకారం మనం పరిశీలించాలి.

అలాగే "వివాహము అన్ని విషయములలో ఘనమైనదిగాను, పానుపు నిష్కల్మషమైనదిగాను ఉండవలెను; వేశ్యా సంగులకును వ్యభిచారులకును దేవుడు తీర్పు తీర్చును.౹" (హెబ్రీయులకు 13:4). ఈ వాక్యం వివాహానికి దేవుడు ఇచ్చిన ప్రాముఖ్యతను స్పష్టంగా తెలియజేస్తుంది. వివాహము ఘనమైనదిగా ఉండాలి; వివాహ పాన్పు నిష్కల్మషమైనదిగా ఉండాలి. కాబట్టి వివాహ బంధంలోకి ప్రవేశించడం ఎంత ముఖ్యమో, ఆ బంధాన్ని దేవుని నియమాల ప్రకారం కొనసాగించడం కూడా అంతే ముఖ్యము.

వివాహము అనేది దేవుని ముందు భార్యాభర్తల మధ్య ఏర్పడే ఒక పరిశుద్ధ నిబంధన. ఆ నిబంధనలో ఇద్దరూ పాల్గొంటారు. ఒక ఒప్పందానికి షరతులు ఉన్నట్లే, వివాహ నిబంధనకు కూడా షరతులు ఉన్నాయి. ఆ నిబంధనలో ఇద్దరికీ ఒకే బాధ్యత ఉంటుంది. ఈ నిబంధన వారిమధ్య ఒక్కసారే. భార్య అయినా, భర్త అయినా బ్రతికి ఉన్నంతకాలం ఈ వివాహ బంధము కొనసాగుతుంది. భార్యాభర్తలలో ఒకరు మరణించినప్పుడు మాత్రమే ఆ వివాహ బంధము ముగుస్తుంది. 

ఇక్కడ మనం గుర్తుంచుకోవలసిన ముఖ్య విషయాలు:

✅  దేవుడే వివాహాన్ని ఏర్పాటు చేశాడు.

✅ నిబంధన చొప్పున భార్యాభర్తలు ఏకశరీరమవుతారు.

✅ వివాహ పాన్పు నిష్కల్మషమైనదిగా చూసుకోవాలి

✅ దేవుని నియమాల ప్రకారం వివాహ నిబంధనను మరణం వరకు జాగ్రత్తగా కొనసాగించడం

✅ ఏ ఒక్కరూ మరణానికి ముందే తనకి ఇష్టానుసారంగా ఆ వివాహ బంధాన్ని తెంచకూడదు సుమీ!! అప్పుడే అది దేవుని యెదుట ఏర్పడిన వివాహ బంధం అనబడును.

👉 ఇప్పుడు అసలైన ప్రశ్నలోకి వద్దాం…

“అట్టి వివాహ బంధంలో ఉన్న వ్యక్తి ఎప్పుడు రెండో వివాహం చేసుకోవడానికి అర్హుడు? ఎప్పుడు అనర్హుడు?”

2️⃣. *రెండో వివాహమునకు అర్హతలు*

రెండో వివాహమునకు అనుమతికి మనము ముఖ్యంగా రెండు పరిస్థితులను పరిశీలిస్తున్నాము. 

1.  భార్య లేదా భర్త మరణించినప్పుడు

2. ఇంతవరకు వివాహం చేసుకోని వ్యక్తులు

🔴  భార్య లేదా భర్త మరణించినప్పుడు :

1 కొరింథీయులు 7:39 మరియు రోమా 7:2–3లో పౌలు భార్యాభర్తల సంబంధాన్ని వివరిస్తూ, భర్త/భార్య జీవించి ఉన్నంతకాలం భార్య/భర్త అతనికి బద్ధురాలై ఉంటుందని, భర్త/భార్య మరణించినప్పుడు ఆ బంధం నుండి విడుదల పొందుతుందని తెలియజేస్తున్నాడు. 

"భర్తగల స్త్రీ, భర్త బ్రదికియున్నంతవరకే ధర్మశాస్త్రమువలన అతనికి బద్ధురాలుగాని, భర్త చనిపోయినయెడల భర్త విషయమైన ధర్మశాస్త్రమునుండి ఆమె విడుదల పొందును.౹ కాబట్టి భర్త బ్రదికియుండగా ఆమె వేరొక పురుషుని చేరినయెడల వ్యభిచారిణియనబడును గాని, భర్త చనిపోయినయెడల ఆమె ధర్మశాస్త్రము నుండి విడుదల పొందెను గనుక వేరొక పురుషుని వివాహము చేసికొనినను వ్యభిచారిణి కాకపోవును.౹" (రోమా 7:2-3)

"భార్య తన భర్త బ్రదికియున్నంతకాలము బద్ధురాలైయుండును, భర్త మృతిపొందినయెడల ఆమె కిష్టమైనవానిని పెండ్లి చేసికొనుటకు స్వతంత్రురాలై యుండునుగాని ప్రభువునందు మాత్రమే పెండ్లిచేసికొనవలెను.౹" (1 కొరింథీయులు 7:39)

ఈ వాక్యాన్ని బట్టి, మొదటి భర్త మరణించిన స్త్రీకి మరొకరిని వివాహం చేసుకునే స్వాతంత్ర్యం ఉందని తెలుస్తుంది. ఇదే సూత్రం భార్య మరణించిన పురుషునికీ వర్తిస్తుంది.

🗣️ ఉదాహరణ 1: పుల్లయ్యకు పుల్లమ్మతో వివాహమైంది. వారిద్దరూ కలిసి జీవించారు. కొంతకాలానికి పుల్లమ్మ మరణించింది. పుల్లయ్య తన భార్య మరణించిన తరువాత ఒంటరిగా జీవిస్తున్నాడు. అతడు తిరిగి వివాహం చేసుకోవాలని నిర్ణయించుకుంటే, 1 కొరింథీయులకు 7:39లోని సూత్రం ప్రకారం, ప్రభువునందు మాత్రమే వివాహం చేసుకోవడానికి స్వాతంత్ర్యం ఉంది.

🗣️ ఉదాహరణ 2: సూరమ్మకి తన భర్త మరణించాడు. ఆమె కొంతకాలం ఒంటరిగా జీవించిన తరువాత మరొక వ్యక్తిని వివాహం చేసుకోవాలని కోరుకుంటుంది. భర్త మరణించినందున ఆమె మొదటి వివాహ బంధం నుండి విడుదల పొందింది. కాబట్టి ప్రభువునందు మాత్రమే వివాహం చేసుకోవచ్చు.

🔵 *గమనించవలసిన విషయం*: ఈ సందర్భంలో రెండవ వివాహానికి ఆధారం మొదటి జీవిత భాగస్వామి యొక్క మరణం. మొదటి వివాహం నుండి అవిశ్వాసం చేత పారిపోవడం లేదా మరొకరిని ఇష్టపడటం లేదా, వ్యభిచారము కారణమో లేదా అవిశ్వాసి అని కాదు. అలా విడిచి జరిగే రెండో వివాహాలు పరిశుద్ధ వివాహాలే కాదు.

🔴  ఇంతవరకు వివాహం చేసుకోని వ్యక్తులు:

వివాహము చేసుకోని వ్యక్తి వివాహము చేసుకోవడానికి సంబంధించిన విషయాలను క్రొత్త నిబంధనలో పరిశీలించవచ్చు.

"నావలెనుండుట వారికి మేలని పెండ్లికానివారితోను విధవరాండ్రతోను చెప్పుచున్నాను.౹ అయితే మనస్సు నిలుపలేనియెడల పెండ్లిచేసికొనవచ్చును; కామతప్తులగుట కంటె పెండ్లిచేసికొనుట మేలు.౹" (1కొరింథీయులు. 7:8-9) పెండ్లికాని వారిని, విధవరాండ్రను గురించి పౌలు మాట్లాడుతున్నాడు. వివాహం చేసుకోకుండా ఉండగలిగితే అలా ఉండవచ్చని, అయితే స్వీయనిగ్రహం లేకపోతే వివాహం చేసుకోవచ్చని తెలియజేస్తున్నాడు.

🗣️ ఉదాహరణ : ఒక యువకుడు/యువతి ఇంతవరకు వివాహం చేసుకోలేదు. అతడు ఒక యువతిని/యువకుడిని వివాహం చేసుకోవాలని కోరుకంటే. వారిద్దరూ క్రైస్తవులుగా ప్రభువునందు వివాహం చేసుకోవడానికి సిద్ధంగా ఉంటే, అతని/ఆమె గతంలో వివాహం లేనందున రెండవ వివాహానికి సంబంధించిన సమస్యే ఉండదు. అది అతనికి మొదటి వివాహం.

🔵 ముఖ్యమైన స్పష్టత: ఇంతవరకు వివాహం చేసుకోని వ్యక్తి వివాహం చేసుకోవడం మొదటి వివాహమే. అయితే గతంలో వివాహం చేసుకున్న వ్యక్తి విషయంలో మాత్రం మొదటి వివాహం బంధం ఎలా ముగిసిందో కాస్త జాగ్రత్తగా ఆలోచించి, పరిశీలించే రెండో వివాహం వైపు పోవాలి లేదంటే వ్యభిచారులు అయ్యే పరిస్థితి కలుగుతుంది. అది ఏలా అనేది ఈ క్రింది రెండవ వివాహం అనర్హతలలో చివరిలో వ్రాశాము.

3️⃣. రెండవ వివాహము -  అనర్హతలు*

🔴 వ్యక్తిగత ఇష్టాల కారణంగా విడాకులు తీసుకోవడం*

 "కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను." (మత్తయి. 19:6) "సృష్ట్యాదినుండి (దేవుడు) వారిని పురుషునిగాను స్త్రీనిగాను కలుగ జేసెను. ఈ హేతువుచేత పురుషుడు తన తలిదండ్రులను విడిచి పెట్టి తన భార్యను హత్తుకొనును; వారిద్దరు ఏకశరీరమై యుందురు, గనుక వారిక ఇద్దరుగా నుండక యేకశరీరముగా నుందురు. కాబట్టి దేవుడు జతపరచిన వారిని మనుష్యుడు వేరుపరచ కూడదని వారితో చెప్పెను." (మార్కు. 10:6-9)

🗣️ ఉదాహరణ: ఒక భర్తకు తన భార్య వంట చేసే విధానం నచ్చడం లేదు. మరొక భర్తకు తన భార్య తన మాటలన్నింటినీ అంగీకరించడం లేదని అసంతృప్తి ఉంది అని లేదా వివాహం అనంతరం వచ్చే సమస్యలు పరిష్కారం కొరకు విడాకులు పోవడం… Etc. ఈ కారణాలతో భార్యను విడిచిపెట్టి మరొక స్త్రీని వివాహం చేసుకోవాలని నిర్ణయించుకుంటే, అది వివాహ బంధాన్ని వ్యక్తిగత ఇష్టాల ఆధారంగా తేలికగా తీసుకున్నట్లవుతుంది. ఈ విషయములో రెండో వివాహం అనుమతి లేదు. 

🔴 *భార్యాభర్తలు విడిపోయినప్పుడు వెంటనే మరొకరిని వివాహం చేసుకోవడం*

"మరియు పెండ్లియైన వారికి నేను కాదు ప్రభువే ఆజ్ఞాపించునదేమనగా, భార్య భర్తను ఎడబాయకూడదు.౹ ఎడబాసినయెడల పెండ్లిచేసికొనకుండవలెను; లేదా, తన భర్తతో సమాధాన పడవలెను. మరియు భర్త తన భార్యను పరిత్యజింపకూడదు.౹" (1కొరింథీయులకు 7:10–11) విడిపోయిన భార్యాభర్తలు అవివాహితులుగానే ఉండాలని లేదా తిరిగి సమాధానపడాలని పౌలు బోధించాడు. ఈ విషయములో కూడా రెండో వివాహం అనుమతి లేదు. 

🗣️ ఉదాహరణ: ఒక భార్యాభర్తల మధ్య తరచుగా గొడవలు జరుగుతున్నాయి. చివరకు భార్య తన పుట్టింటికి వెళ్లిపోయింది. కొంతకాలం తరువాత భర్త మరొక స్త్రీని ఇష్టపడి, మొదటి భార్యతో తిరిగి సమాధానపడటానికి ప్రయత్నించకుండా రెండో వివాహం చేసుకోవాలని నిర్ణయించుకున్నాడు. విడిపోయినంత(విడాకులు తీసుకున్నంత) మాత్రాన వెంటనే రెండో వివాహానికి స్వాతంత్ర్యం వచ్చిందని భావించకూడదు. ఈ విషయములో కూడా రెండో వివాహం అనుమతి లేదు. 

🔴 భౌతిక/ఆత్మీయ సంబంధమైన ఇతర కారణాలను చూపించి విడనాడి రెండో వివాహం చేసుకోవడం

యేసు మాటల్లో... "అందుకాయన– తన భార్యను విడనాడి మరియొకతెను పెండ్లిచేసికొనువాడు తాను విడనాడిన ఆమె విషయమై వ్యభిచరించువాడగును. మరియు స్త్రీ తన పురుషుని విడనాడి మరియొకని పెండ్లిజేసికొనినయెడల ఆమె వ్యభిచరించునదగునని వారితో చెప్పెను." (మార్కు. 10:11-12). "తన భార్యను విడనాడి, మరియొకతెను వివాహము చేసికొను ప్రతివాడు వ్యభిచరించుచున్నాడు; భర్తను విడిచినదానిని వివాహము చేసికొనువాడు వ్యభిచరించుచున్నాడు." (లూకా 16:18) వివిధ కారణాలు చేత విడాకులు తీసుకొని మరొకరిని వివాహం చేసుకోవడం గురించి యేసుక్రీస్తు ఇలా హెచ్చరిక ఇచ్చాడు.

🗣️ ఉదాహరణ 1 : ఒక వ్యక్తి తన భార్యతో కొన్నేళ్లు జీవించిన తరువాత, మరొక స్త్రీ అందంగా ఉందని, ఆమెతో జీవిస్తే తనకు ఎక్కువ సంతోషం కలుగుతుందని భావించాడు. అందువల్ల మొదటి భార్యను విడిచిపెట్టి రెండో వివాహం చేసుకోవాలని నిర్ణయించుకున్నాడు. కొత్త వ్యక్తి నచ్చడం ఒక్కటే మొదటి వివాహ బంధాన్ని విడిచిపెట్టడానికి బైబిలు ఆధారంగా పరిగణించకూడదు.

🗣️ ఉదాహరణ 2 : ఒక వ్యక్తి తన భర్తతో కొన్నేళ్లు జీవించిన తరువాత, నాకు తెలిసి తెలియని వయస్సు లో వివాహం అయ్యింది, వివాహం కోసం నాకేమి తెలియదు అంటూ, మరొక పురుషుడు అందంగా ఉన్నాడని, అతనితో జీవిస్తే తనకు ఎక్కువ సంతోషం కలుగుతుందని భావించి, అందువల్ల మొదటి భర్తను విడిచిపెట్టి రెండో వివాహం చేసుకోవాలని నిర్ణయించుకుంది. కొత్త వ్యక్తి నచ్చడం ఒక్కటే మొదటి వివాహ బంధాన్ని విడిచిపెట్టడానికి బైబిలు ఆధారంగా పరిగణించకూడదు. ఇక్కడ కూడా రెండో వివాహం అనుమతి లేదు.

🔴 *అవిశ్వాసియైన జీవిత భాగస్వామి ఉన్నారు అనే కారణంతోనే విడిపోవడం*

అవిశ్వాసియైన భాగస్వామి విశ్వాసితో కలిసి జీవించడానికి ఇష్టపడితే, విశ్వాసి అతనిని లేదా ఆమెను విడిచిపెట్టకూడదని పౌలు బోధించాడు.

"ప్రభువు కాదు నేనే తక్కినవారితో చెప్పున దేమనగా– ఏ సహోదరునికైనను అవిశ్వాసురాలైన భార్య యుండి, ఆమె అతనితో కాపురము చేయ నిష్టపడినయెడల, అతడు ఆమెను పరిత్యజింపకూడదు.౹ మరియు ఏ స్త్రీకైనను అవిశ్వాసియైన భర్తయుండి, ఆమెతో కాపురముచేయ నిష్టపడినయెడల, ఆమె అతని పరిత్య జింపకూడదు.౹ అవిశ్వాసియైన భర్త భార్యనుబట్టి పరిశుద్ధపరచబడును; అవిశ్వాసురాలైన భార్య విశ్వాసియైన భర్తనుబట్టి పరిశుద్ధపరచబడును. లేనియెడల మీ పిల్లలు అపవిత్రులైయుందురు, ఇప్పుడైతే వారు పవిత్రులు.౹ అయితే అవిశ్వాసియైనవాడు ఎడబాసిన ఎడబాయ వచ్చును; అట్టి సందర్భములలో సహోదరునికైనను సహో దరికైనను నిర్బంధము లేదు. సమాధానముగా ఉండుటకు దేవుడు మనలను పిలిచియున్నాడు.౹ ఓ స్త్రీ, నీ భర్తను రక్షించెదవో లేదో నీకేమి తెలియును? ఓ పురుషుడా, నీ భార్యను రక్షించెదవో లేదో నీకేమి తెలియును?౹ అయితే ప్రభువు ప్రతివానికి ఏస్థితి నియమించెనో, దేవుడు ప్రతివానిని ఏస్థితియందు పిలిచెనో, ఆ స్థితియందే నడుచుకొనవలెను; ఈ ప్రకారమే సంఘములన్నిటిలో నియమించుచున్నాను.౹" (1కొరింథీయులకు 7:13-17)

🗣️ ఉదాహరణ: ఒక స్త్రీ క్రీస్తును విశ్వసిస్తోంది. ఆమె భర్త మాత్రం క్రైస్తవ విశ్వాసాన్ని అంగీకరించడం లేదు. అయినప్పటికీ అతడు ఆమెతో శాంతియుతంగా జీవించడానికి సిద్ధంగా ఉన్నాడు/లేకపోయినా సరి భర్త అవిశ్వాసి అనే ఒక్క కారణంతోనే అతనిని విడిచిపెట్టి రెండో వివాహం చేసుకోవాలని ఆమె నిర్ణయించుకోకూడదు. ఇక్కడ రెండో వివాహం అనుమతి లేదు.

🔴 *జీవిత భాగస్వామి జీవించి ఉండగానే మరొకరిని వివాహం చేసుకోవడం*

మొదటి వివాహం బంధం నుండి ఎప్పుడూ విడుదల కలుగుతుందో తెలియక అజ్ఞానంతో, మానవ యోచనలతో, పెద్దల ఇష్టా ఇష్టాలతో మరొకరిని వివాహం చేసుకోవాలనేది వ్యభిచారముతో సమానం. భర్త జీవించి ఉన్నంతకాలం భార్య అతనికి బద్ధురాలిగా ఉంటుందనేది సత్యం.

"భర్తగల స్త్రీ, భర్త బ్రదికియున్నంతవరకే ధర్మశాస్త్రమువలన అతనికి బద్ధురాలుగాని, భర్త చనిపోయినయెడల భర్త విషయమైన ధర్మశాస్త్రమునుండి ఆమె విడుదల పొందును.౹ కాబట్టి భర్త బ్రదికియుండగా ఆమె వేరొక పురుషుని చేరినయెడల వ్యభిచారిణియనబడును గాని, భర్త చనిపోయినయెడల ఆమె ధర్మశాస్త్రము నుండి విడుదల పొందెను గనుక వేరొక పురుషుని వివాహము చేసికొనినను వ్యభిచారిణి కాకపోవును.౹" (రోమీయులకు 7:2–3)

🗣️ ఉదాహరణ: ఒక వ్యక్తి తన భార్యతో విభేదాల కారణంగా విడిగా నివసిస్తున్నాడు. అయితే అతని భార్య ఇంకా జీవించి ఉంది. ఈ సమయంలో మరొక స్త్రీని వివాహం చేసుకుంటే, విడిగా నివసించడం మాత్రమే తనకు రెండో వివాహానికి స్వాతంత్ర్యం ఇచ్చిందని అతడు భావించినట్లవుతుంది కానీ దాని తుది ఫలితం వ్యభిచారము. 

🔴 విడాకులు తీసుకున్నంత మాత్రాన రెండో వివాహానికి అనుమతి వచ్చిందని భావించడం

"మరియు పెండ్లియైన వారికి నేను కాదు ప్రభువే ఆజ్ఞాపించునదేమనగా, భార్య భర్తను ఎడబాయకూడదు.౹ ఎడబాసినయెడల పెండ్లిచేసికొనకుండవలెను; లేదా, తన భర్తతో సమాధాన పడవలెను. మరియు భర్త తన భార్యను పరిత్యజింపకూడదు.౹" (1కొరింథీయులకు. 7:10-11)

భార్య భర్తను ఎడబాయకూడదు ❌

ఎడబాసినయెడల రెండో వివాహం ❌

సమాధాన పడవలెను ✅

పరిత్యజింపకూడదు ✅

🗣️ ఉదాహరణ: ఒక దంపతులు కోర్టు ద్వారా విడాకులు పొందారు. ఆ తరువాత భర్త, “ఇప్పుడు చట్టపరంగా నా వివాహం ముగిసింది కాబట్టి నేను ఎవరినైనా వివాహం చేసుకోవచ్చు” అని నిర్ణయించుకున్నాడు. కానీ కోర్టు ఇచ్చిన విడాకుల పత్రం ఒక్కటే కానీ దేవుని వాక్యప్రకారం రెండో వివాహానికి అనుమతి ఉందని నిరూపించదు. ఇక్కడ కూడా రెండో వివాహం అనుమతి లేదు.

"కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను." (మత్తయి. 19:6)అందుకాయన– తన భార్యను విడనాడి మరియొకతెను పెండ్లిచేసికొనువాడు తాను విడనాడిన ఆమె విషయమై వ్యభిచరించువాడగును. మరియు స్త్రీ తన పురుషుని విడనాడి మరియొకని పెండ్లిజేసికొనినయెడల ఆమె వ్యభిచరించునదగునని వారితో చెప్పెను." (మార్కు. 10:11-12). 

🔴 *వ్యభిచారము జరిగిన సందర్భంలో తొందరపడి నిర్ణయం తీసుకోవడం*

"నేను మీతో చెప్పునదేమనగా– వ్యభిచారకారణమునుబట్టిగాక, తన భార్యను విడనాడు ప్రతివాడును ఆమెను వ్యభిచారిణిగా చేయుచున్నాడు; విడనాడబడినదానిని పెండ్లాడువాడు వ్యభిచరించుచున్నాడు." (మత్తయి. 5:32) "మరియు వ్యభిచారము నిమిత్తమే తప్ప తన భార్యను విడనాడి మరియొకతెను పెండ్లిచేసికొనువాడు వ్యభిచారము చేయుచున్నాడనియు, విడనాడబడినదానిని పెండ్లిచేసికొనువాడు వ్యభిచారము చేయుచున్నాడనియు మీతో చెప్పుచున్నానని వారితోననెను."(మత్తయి. 19:9).

నిజమే… యేసు మాటల్లో "వ్యభిచారకారణమునుబట్టిగాక & వ్యభిచారము నిమిత్తమే తప్ప" అనే రెండు విషయాలు చూడగలం వీటిని చూపిస్తూ చాలామంది అదిగో వ్యభిచారము బట్టి రెండో వివాహం చేసుకోవచ్చు అని దుర్బోధ చేసేవారు లేకపోవచ్చు. మన ప్రభువు అక్కడ రెండవ వివాహం కోసం ఏ మాత్రం చెప్పుట లేదని గుర్తించుము. 

వ్యభిచార నిమిత్తమే తప్ప (అంటే వ్యభిచారం జరగడం అనే కారణం తప్ప), తన భార్యను విడనాడి మరొకరిని పెళ్లి చేసుకునే ప్రతివాడు వ్యభిచరిస్తున్నట్లే అని అర్థం. అంటే, కేవలం వ్యభిచారం కారణంతో విడిపోవచ్చు అని చెప్పడం కాదు, ఒకవేళ అలా విడిపోయి రెండో వివాహం చేసుకుంటే అది దేవుని దృష్టిలో పాపమని(వ్యభిచారమని) ఆయన నొక్కి చెప్పారు. చూడండి.. అనే"మరియు వ్యభిచారము నిమిత్తమే తప్ప తన భార్యను విడనాడి మరియొకతెను పెండ్లిచేసికొనువాడు వ్యభిచారము చేయుచున్నాడనియు, విడనాడబడినదానిని పెండ్లిచేసికొనువాడు వ్యభిచారము చేయుచున్నాడనియు మీతో చెప్పుచున్నానని వారితోననెను."(మత్తయి. 19:9). 

వ్యభిచార కారణంతో మొదటి వివాహ బంధాన్ని విడిచిపెట్టి మరొకరిని వివాహం చేసుకోవడం వ్యభిచారంతో సంబంధం కలిగినదిగా యేసు బోధించారు. మిత్రమా!! నీ మదిలో కలిగే ఆలోచన నాకు అర్ధం అయ్యింది. ఇంకా అయిపోలేదు. ఈ క్రింది చూడుము 

మత్తయి 19:10–12లో శిష్యులు వివాహ సంబంధం గురించి “భార్యాభర్తలకుండు సంబంధము ఇట్టిదైతే పెండ్లి చేసికొనుట యుక్తము కాదు” అని స్పందించినప్పుడు, యేసుక్రీస్తు నపుంసకుల గురించి బోధించారు. అక్కడ ఆయన మూడు రకాల నపుంసకులను ప్రస్తావించారు 

1.   తల్లి గర్భమునుండి నపుంసకులుగా పుట్టినవారు గలరు, 

2. మనుష్యులవలన నపుంస కులుగా చేయబడిన నపుంసకులునుగలరు,

3. పరలోక రాజ్యమునిమిత్తము తమ్మును తామే నపుంసకులనుగా చేసికొనిన నపుంసకులునుగలరు. ✅

దేవుని నిబంధనను గౌరవించేవారు, విడిపోయిన(ఏ కారణమైన..) తర్వాత వివాహానికి దూరంగా(నపుంసకులుగా) ఉండటం ద్వారా పరలోక రాజ్యానికి అర్హులుగా ఉంటారని యేసుక్రీస్తు బోధన ఉద్దేశ్యం అని గుర్తించండి. నీకు సమాధానం దొరికిందని  అనుకుంటాను. ఇక్కడ కూడా రెండవ వివాహమునకు అనుమతి లేదు ❌ 

🗣️ ఉదాహరణకు: “ఇశ్రాయేలు అనేక వ్యభిచారములు చేసినప్పటికీ, ‘తిరిగిరమ్ము’ అని యెహోవా పిలిచాడు. పాపంలో కొనసాగడం కాదు, చేసిన దోషాన్ని ఒప్పుకొని దేవుని వైపు తిరిగి రావడమే ఆయన పిలుపు.” (యిర్మీయా 3:1–14) ఇశ్రాయేలు దేవుని నిబంధనను విడిచి విగ్రహారాధనలోకి(వ్యభిచారము వైపు) వెళ్లినప్పుడు, దేవుడు తన ప్రజలను ప్రవక్తల ద్వారా తిరిగి పిలిచాడు. యిర్మీయా ద్వారా ‘తిరిగిరమ్ము’ అని పిలిచాడు, హోషేయ ద్వారా తన ప్రేమను చూపించాడు, యెహెజ్కేలు ద్వారా మారుమనస్సు పొందాలని హెచ్చరించాడు. ఈ సంగతులు దేవుని నిబంధన ఎంత పవిత్రమైనదో, అవిశ్వాసం ఎంత తీవ్రమైనదో మనకు తెలియజేస్తున్నాయి కదూ. 

అలాగే వ్యభిచారం జరిగిందని భార్యను లేదా భర్తను విడిచిపెట్టి రెండవ వివాహం వైపు వెళ్లడమే పరిష్కారం కాదు. తప్పు చేసిన వ్యక్తి పాపాన్ని విడిచి పశ్చాత్తాపంతో తిరిగి రావడానికి, మొదటి వివాహ బంధాన్ని కాపాడుకోవడానికి అవకాశం ఉన్నప్పుడు, ‘తిరిగిరా’ అనే పిలుపుకు మొదటగా స్థానం ఇవ్వాలి. దేవుడు ఇశ్రాయేలును తన ద్రోహం నుండి తిరిగి రావాలని పిలిచినట్లే, భార్యాభర్తలు కూడా పాపాన్ని విడిచి, పశ్చాత్తాపంతో తమ బంధాన్ని పునరుద్ధరించుకోవడానికి ప్రయత్నించాలి. ఆమె/అతను రాకపోతే  ఎంత మాత్రం రెండో వివాహం వైపునకు పోకూడదు, పోతే అది దేవుని యెదుట వ్యభిచారం అగును.

🟣 *ముగింపు*

వివాహము అనేది చిన్న విషయం కాదు. రెండవ వివాహం — మనుష్యుల ఇష్టం కాదు, దేవుని వాక్యమే ప్రమాణం!  మొదటి జీవిత భాగస్వామి మరణించినవారు, ఇంతవరకు వివాహం చేసుకోనివారు/కామతప్తులగుట కంటె పెండ్లిచేసికొనుట మేలు అనే వీరి విషయంలో బైబిలు బోధనను స్పష్టంగా గుర్తించాలి. (1 కొరింథీయులకు 7:8–9, 39) భౌతిక/ఆత్మ సంబంధమైన విషయాలలో ఈ లోక చట్ట ప్రకారం విడాకులు తీసుకున్నంత మాత్రాన మరియు వ్యభిచారం చేస్తున్నారని రెండవ వివాహానికి అర్హత వచ్చినట్లు కాదు! మనుష్యుల అభిప్రాయాలకు కాదు దేవుని వాక్యానికే లోబడుదాం! 🙏

మీ ఆత్మీయులు

9705040236

వివాహము (పార్ట్ 01) ^{క్లిక్ చేయు}

వివాహము (పార్ట్ 02)^{క్లిక్ చేయు}

వివాహము (పార్ట్ 03)^{క్లిక్ చేయు}

వివాహము (పార్ట్ 04)^{క్లిక్ చేయు}

వివాహము (పార్ట్ 05)^{క్లిక్ చేయు}

"వివాహము" (పార్ట్ - 05) Wedlock

మన ప్రభువును, రక్షకుడైన యేసుక్రీస్తు వారి అతి శ్రేష్ఠమైన నామములో, ఎంతో ఆసక్తితో అపొస్తలుల బోధ అంశాలను చదువుతూ, ఆలోచిస్తూ, వాటిని తమ జీవితాలకు అన్వయించుకొని, తమ జీవితాలను దిద్దుబాటు చేసుకుంటున్న మీలో ప్రతివారికి హృదయపూర్వకమైన వందనాలు తెలియజేస్తున్నాము. 🙏🏻

*పరిచయం* 

వివాహం అంటే కేవలం ఇద్దరు వ్యక్తులు కలిసి జీవించడం మాత్రమేనా? లేక దేవుడు స్థాపించిన పవిత్రమైన బంధమా? దేవుడు ఒక పురుషునికి ఒక స్త్రీని జతపరిచినప్పుడు, మనిషి తన ఇష్టానుసారం ఆ బంధాన్ని విచ్ఛిన్నం చేయగలడా? “నాకు నచ్చలేదు”, “నా మాట వినడం లేదు”, “మా మధ్య విభేదాలు ఉన్నాయి”, “ఆర్థిక సమస్యలు ఉన్నాయి”, “మా తల్లిదండ్రులతో కలిసి జీవించడం లేదు”, “భౌతికంగా సహకరించుటలేదు”, “తిడుతున్నారు, కొడుతున్నారు, హింసిస్తున్నారు, కోపగిస్తున్నారు, ప్రేమించడం లేదు” వంటి కారణాలు వివాహ బంధాన్ని తెంచుకోవడానికి దేవుని దృష్టిలో సముచితమైనవా? లేక “దేవుడు జతపరచిన వారిని మనుష్యుడు వేరుపరచకూడదు” అనే యేసుక్రీస్తు మాటే మనకు ప్రమాణమా? (మత్తయి 19:6). సమస్య వచ్చినప్పుడు మనం విడిపోవడానికి కారణం వెతుకుతున్నామా? లేక సమాధానపడడానికి మార్గం వెతుకుతున్నామా? క్రైస్తవుని హృదయం కఠినంగా ఉండాలా? లేక క్షమించి, ప్రేమించి, దేవుని వాక్యానికి లోబడాలా?అయితే వివాహము (పార్ట్ - 05) గా “విడనాడుట న్యాయమా?” అనే ఈ ప్రశ్నకు మనుష్యుల యొక్క వివిధ అభిప్రాయాలు/కారణాలు బట్టి కాక దీని విషయమై మన ప్రభువైన యేసుక్రీస్తు బోధ ఏమిటో, ఆది నుండి దేవుని సంకల్పం ఏమిటో, మోషే పరిత్యాగ పత్రిక(divorcement/Certificate of divorce) ఎందుకు చెప్పాడో, కొత్త నిబంధనలో భార్యాభర్తల బాధ్యత ఏమిటో, లేఖనమంతటి సాక్ష్యాన్ని దృష్టిలో పెట్టుకొని పరిశీలిద్దాం.

"యేసు ఈ మాటలుచెప్పి చాలించిన తరువాత. గలిలయనుండి యొర్దాను అద్దరినున్న యూదయ ప్రాంతములకు వచ్చెను. బహుజనసమూహములు ఆయనను వెంబడింపగా, ఆయన వారిని అక్కడ స్వస్థపరచెను. పరిసయ్యులు ఆయనను శోధింపవలెనని ఆయనయొద్దకు వచ్చి ఏ హేతువుచేతనైనను పురుషుడు తన భార్యను విడనాడుట న్యాయమా? అని అడుగగా ఆయన— సృజించినవాడు ఆదినుండి వారిని పురుషునిగాను స్త్రీనిగాను సృజించెననియు –ఇందు నిమిత్తము పురుషుడు తలిదండ్రులను విడిచి తన భార్యను హత్తుకొనును, వారిద్ద రును ఏకశరీరముగా ఉందురని చెప్పెననియు మీరు చదువలేదా? కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను. అందుకు వారు– ఆలాగైతే పరిత్యాగ పత్రికనిచ్చి ఆమెను విడనాడుమని మోషే యెందుకు ఆజ్ఞాపించెనని వారాయనను అడుగగా ఆయన మీ హృదయకాఠిన్యమునుబట్టి మీ భార్యలను విడనాడ మోషే సెలవిచ్చెను, గాని ఆదినుండి ఆలాగు జరుగలేదు. మరియు వ్యభిచారము నిమిత్తమే తప్ప తన భార్యను విడనాడి మరియొకతెను పెండ్లిచేసికొనువాడు వ్యభిచారము చేయుచున్నాడనియు, విడనాడబడినదానిని పెండ్లిచేసికొనువాడు వ్యభిచారము చేయుచున్నాడనియు మీతో చెప్పుచున్నానని వారితోననెను. ఆయన శిష్యులు– భార్యాభర్తలకుండు సంబంధము ఇట్టిదైతే పెండ్లి చేసికొనుట యుక్తము కాదని ఆయనతో చెప్పిరి. అందుకాయన అనుగ్రహము నొందినవారు తప్ప మరి ఎవరును ఈ మాటను అంగీకరింపనేరరు." (మత్తయి. 19:1-11)

^🛑 1️⃣. దేవుని సంకల్పంలో వివాహం యొక్క మూలం.

వివాహం మనుష్యులు తమ అవసరాల కోసం ఏర్పరచుకున్న ఒక సామాజిక ఒప్పందం కాదు. వివాహానికి మూలం దేవుడే. సృష్టి ప్రారంభంలోనే దేవుడు పురుషుని సృష్టించి, అతడు ఒంటరిగా ఉండటం మంచిది కాదని చూసి, అతనికి తగిన సహాయకురాలిగా స్త్రీని ఏర్పరచాడు. ఆ తరువాత పురుషుడు తన భార్యతో ఏకమై, ఇద్దరూ ఒక శరీరంగా ఉండాలని దేవుని సంకల్పం వెల్లడైంది. (ఆదికాండము 2:18, 21-24). యేసుక్రీస్తు కూడా వివాహం గురించి బోధించేటప్పుడు మనుష్యుల అభిప్రాయాల వైపు కాకుండా సృష్టి ఆరంభం వైపు మన దృష్టిని తిప్పాడు. “సృష్టించినవాడు ఆది నుండే వారిని పురుషునిగాను స్త్రీగాను సృష్టించెను” అని చెప్పి, “ఇద్దరూ ఏకశరీరమై యుందురు” అనే దేవుని యొక్క ఉద్దేశాన్ని గుర్తుచేశాడు (మత్తయి 19:4-6cf). అందువల్ల వివాహం యొక్క అసలు ఉద్దేశం కేవలం కలిసి జీవించడం కాదు దేవుని సమక్షంలో ఒకరికి ఒకరు నిబద్ధులై, ప్రేమతో, విశ్వాసంతో, పవిత్రతతో, ఒక్కటై, మంచి మనస్సు కలిగి, పరిశుద్ధతతో దేవుని నిబంధన ప్రకారం జీవించడం. భార్యాభర్తలు తమ ఇష్టాల ప్రకారం ఈ బంధాన్ని ఏర్పరచుకోలేదు వారు దేవుని సంకల్పంలో ఏర్పడిన వివాహ బంధంలోకి వారు ప్రవేశించారని ఎల్లప్పుడూ గుర్తుంచుకోవలసిన సంగతి. కాబట్టి మనం ముందుగా అడగాల్సిన ప్రశ్న “విడాకులు తీసుకోవచ్చా?” లేదా “విడనాడుట న్యాయమా?” అనేది కాదు. “వివాహాన్ని దేవుడు ఎందుకు ఏర్పరచాడు? దేవుని సంకల్పం ఏమిటి?” అనేదే.

ఎందుకంటే వివాహం యొక్క మూలాన్ని అర్థం చేసుకున్నప్పుడే, “దేవుడు జతపరచిన వారిని మనుష్యుడు వేరుపరచకూడదు” అనే యేసు మాట యొక్క స్పష్టత మనకు అర్థమవుతుంది (మత్తయి 19:6). ఇక్కడ ప్రధానమైన విషయమేంటంటే  “దేవుడు జతపరచిన” అనే సత్యం. మనుష్యులు ఒక వివాహాన్ని సామాజికంగా నమోదు చేయవచ్చు. చట్టపరమైన పత్రాలు ఉండవచ్చు. కానీ క్రైస్తవుడు తన వివాహాన్ని కేవలం చట్టపరమైన సంబంధంగా చూడకూడదు. అది దేవుని ముందు బాధ్యతతో కూడిన పరిశుద్ధమైన జీవిత బంధంగా చూడాలి కదా!

^🛑 2️⃣. భర్త మరియు భార్య యొక్క ధర్మాలు మరియు వారి బాధ్యతలు

వివాహంలో హక్కుల గురించి మాత్రమే ఆలోచిస్తే కుటుంబంలో సమస్యలు పెరుగుతాయి. కానీ “నా భర్తగా నా ధర్మం ఏమిటి? నా భార్యగా నా ధర్మం ఏమిటి?” అని ఆలోచిస్తే కుటుంబంలో ప్రేమ, సమాధానం, దైవ క్రమం, గౌరవం, మంచి బంధం ఏర్పాటు చేయబడతాయి. పరిశుద్ధ గ్రంథంలో భార్యాభర్తలకు కేవలం ధర్మాలను మాత్రమే కాకుండా, ఒకరిపట్ల ఒకరు నిర్వహించవలసిన బాధ్యతలను కూడా స్పష్టంగా బోధిస్తుంది.

👤 భర్త యొక్క బాధ్యత :

భర్త తన భార్యను కేవలం కుటుంబాన్ని చూసుకునే వ్యక్తిగా కాకుండా, దేవుడు తనకు అప్పగించిన అమూల్యమైన ముత్యంగా, సహచారిగా, తన్ను ప్రేమించి, సంరక్షించి, పోషించి గౌరవించవలసిన వ్యక్తిగా చూడాలి. "పురుషులారా, మీరును మీ భార్యలను ప్రేమించుడి. అటువలె క్రీస్తు కూడ సంఘమును ప్రేమించి, అది కళంకమైనను ముడతయైనను అట్టిది మరి ఏదైనను లేక, పరిశుద్ధమైనదిగాను, నిర్దోషమైనదిగాను మహిమగల సంఘముగాను ఆయన తన యెదుట దానిని నిలువబెట్టుకొనవలెనని, వాక్యముతో ఉదకస్నానముచేత దానిని పవిత్రపరచి, పరిశుద్ధపరచుటకై దానికొరకు తన్ను తాను అప్పగించుకొనెను.౹" (ఎఫెసీయులకు 5:25) అంటే భర్త ప్రేమ అనేది మాటల్లో మాత్రమే ఉండకూడదు. త్యాగం చేయగల ప్రేమ, క్షమించగల ప్రేమ, అర్థం చేసుకునే ప్రేమ, కష్టకాలంలో తోడుగా నిలిచే ప్రేమ, అనారోగ్య పరిస్థితిలో ప్రేమ కావాలి. భర్త తన భార్యను తనకు నచ్చిన విధంగా కాకుండా క్రీస్తు సంఘమును ప్రేమించిన విధంగా ప్రేమించాలి. భార్య తన మాట వినడం లేదని కోపపడటం సులభం కానీ భార్యను క్రీస్తు ప్రేమించినట్లుగా ప్రేమించడం నిజమైన భర్త యొక్క ధర్మం.

అలాగే భర్త తన భార్యను గౌరవించాలి, సన్మానించాలి, పర సంబంధమైన జ్ఞానము చొప్పున తనతో కాపురము చేయాలి. "అటువలెనే పురుషులారా, జీవమను కృపావరములో మీ భార్యలు మీతో పాలివారైయున్నారని యెరిగి, యెక్కువ బలహీనమైన ఘటమని భార్యను సన్మానించి, మీ ప్రార్థనలకు అభ్యంతరము కలుగకుండునట్లు, జ్ఞానము చొప్పున వారితో కాపురము చేయుడి." (1 పేతురు 3:7) భార్యను అవమానించడం, నిర్లక్ష్యం చేయడం, మాటలతో గాయపరచడం, భయపెట్టడం భర్త బాధ్యత కాదు. భార్యను గౌరవించడం కూడా దేవుని ముందు భర్త యొక్క ఆత్మీయ బాధ్యత. 

👤 భార్య యొక్క బాధ్యత :

భార్య తన భర్తను తన్ను/కుటుంబాన్ని సంరక్షించే, పోషించే, అధికారి అని కేవలం అలా చూసుకునే వ్యక్తిగా కాకుండా, ప్రతీ విషయములో లోబడే వ్యక్తిగా, ప్రేమించే వ్యక్తిగా, యజమానుడిగా, భయము కలిగి యుండునట్లు చూడాలి. "స్త్రీలారా, ప్రభువునకువలె మీ సొంతపురుషులకు లోబడియుండుడి.౹ క్రీస్తు సంఘమునకు శిరస్సై యున్న లాగున పురుషుడు భార్యకు శిరస్సై యున్నాడు. క్రీస్తే శరీరమునకు రక్షకుడైయున్నాడు.౹" (ఎఫెసీయులకు 5:22-24). ఇక్కడ లోబడటం అంటే భయంతో జీవించడం లేదా అన్యాయాన్ని సహించడం కాదు దేవుని క్రమాన్ని గౌరవిస్తూ భర్తకు తగిన గౌరవం చూపించడం. కాబట్టి భార్య భర్తను తక్కువ చేసి మాట్లాడటం, ఎప్పుడూ అవమానించడం, ఇతరులతో పోల్చడం లేదా అతని లోపాలను ఎగతాళి చేయడం దేవుని ఉద్దేశానికి సరిపోదు. గౌరవం, సహకారం, నమ్మకత్వం, విశ్వాసం, ప్రేమతో కుటుంబాన్ని నిర్మించడంలో భార్యకు కూడా ముఖ్యమైన పాత్ర ఉంది.

👤 ఇద్దరి బాధ్యత 👤

అయితే వివాహంలో బాధ్యతలు ఒకరి మీద మాత్రమే ఉండవు. భార్యాభర్తలు ఇద్దరూ ఒకరినొకరు ప్రేమించాలి, గౌరవించాలి, క్షమించాలి, సహించాలి, ఒకరి బలహీనతలను మరొకరు భరించాలి. (కొలస్సయులకు 3:13cf) కాబట్టి భార్యాభర్తలు ప్రతిరోజూ ఒక ప్రశ్న వేసుకోవాలి. “నా భాగస్వామి నాకు ఏమి చేయాలి?” అని కాదు.. “దేవుని వాక్యం ప్రకారం నేను నా భాగస్వామి కోసం ఏమి చేయాలి?” అని. భర్త తన భార్యను క్రీస్తు ప్రేమించినట్లుగా ప్రేమించాలి. భార్య తన భర్తను గౌరవించాలి. ఇద్దరూ దేవునికి విధేయులై ఒకరినొకరు క్షమించుకుంటూ, ప్రేమించుకుంటూ, సమాధానంతో జీవించాలి. అప్పుడు వివాహం కేవలం ఒక బంధంగా కాకుండా, దేవుని సంకల్పాన్ని ప్రతిబింబించే పవిత్రమైన జీవనంగా మారుతుంది.

^🛑 3️⃣. పరిసయ్యుల ప్రశ్నలు మరియు యేసుక్రీస్తు సమాధానం

^🔴 పరిసయ్యుల మొదటి ప్రశ్న*

మత్తయి 19:3లో పరిసయ్యులు యేసుక్రీస్తు దగ్గరకు వచ్చి, “ఏ హేతువు చేతనైనను పురుషుడు తన భార్యను విడనాడుట న్యాయమా?” అని అడిగారు. వారి ప్రశ్న కేవలం వివాహం గురించి తెలుసుకోవడానికి కాదు యేసును శోధించడానికి వారు ఈ ప్రశ్న వేశారు. ముఖ్యంగా “ఏ హేతువు చేతనైనా” అని అడగడం గమనించాలి. అంటే భార్యలో ఏదైనా తప్పు కనిపించినా, తనకు నచ్చకపోయినా, ఏ కారణమైనా చూపించి భార్యను విడనాడవచ్చా? అనే ఆలోచన ఉంది. 

^🟢 యేసు యొక్క సమాధానం*

కానీ యేసుక్రీస్తు వారి ప్రశ్నకు వెంటనే “అవును” లేదా “కాదు” అని చెప్పకుండా, వారిని వివాహం ప్రారంభమైన దేవుని సంకల్పం వైపు తీసుకెళ్లాడు. "ఆయన— సృజించినవాడు ఆదినుండి వారిని పురుషునిగాను స్త్రీనిగాను సృజించెననియు”(మత్తయి. 19:4) అన్నాడు. అంతే యేసు మత్తయి 19:4-5లో ఆదికాండము 1:27, 2:24లోని సత్యాన్ని గుర్తుచేశాడు. దేవుడు పురుషుని, స్త్రీని సృష్టించి, వారిద్దరూ ఏకమై ఒక శరీరంగా ఉండేలా వివాహాన్ని ఏర్పరచాడు.

అందువల్ల యేసు చెప్పిన మొదటి విషయం ఏమిటంటే “వివాహాన్ని అర్థం చేసుకోవాలంటే మనుష్యుల ఆలోచనలతో కాదు, దేవుని ఆది సంకల్పంతో ప్రారంభించాలనీ”. తరువాత యేసు ఎంతో పవిత్రమైన మాట చెప్పాడు "కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను."(మత్తయి 19:6) ఇక్కడ యేసు పరిశుద్ధమైన వివాహాన్ని సాధారణమైన మానవ ఒప్పందంగా కాకుండా, దేవుని సమక్షంలో ఏర్పడిన పవిత్రమైన బంధంగా చూపిస్తున్నాడని మనం గుర్తించాలి.

 ^🔴 పరిసయ్యుల రెండో ప్రశ్న*

పరిసయ్యులు వెంటనే యేసును మరొక్క ప్రశ్న అడిగారు అదేమనగా "అందుకు వారు– ఆలాగైతే పరిత్యాగ పత్రికనిచ్చి ఆమెను విడనాడుమని మోషే యెందుకు ఆజ్ఞాపించెనని వారాయనను అడుగగా" (మత్తయి..19:7)

^🟢 యేసు యొక్క సమాధానం :

"ఆయన మీ హృదయకాఠిన్యమునుబట్టి మీ భార్యలను విడనాడ మోషే సెలవిచ్చెను, గాని ఆదినుండి ఆలాగు జరుగలేదు." (మత్తయి. 19:8)

ఇక్కడ రెండు విషయాలను వేరు చేస్తూ యేసు బోధించాడు. 

1. ఆదినుండి ఆలాగు జరుగలేదు అంటే సృష్టి ప్రారంభం నుండి ఇది దేవుని ఉద్దేశ్యం కాదని

2. మనుష్యుల హృదయ కాఠిన్యం కారణంగా మోషే కాలంలో నియంత్రించబడిన పరిస్థితని.

📝 హృదయ కాఠిన్యం అంటే దేవుని మాట విన్నప్పటికీ తన ఇష్టానుసారం జీవించడం, క్షమించడానికి ఇష్టపడకపోవడం, పశ్చాత్తాపపడకపోవడం, మారుమనస్సు లేకపోవడం, తన తప్పును అంగీకరించకపోవడం, దిద్దుబాటు చేసుకోకపోవడం, ఎదుటివారి తప్పును మాత్రమే చూస్తూ ఉండటం. యిర్మీయా 16:12లో ఇశ్రాయేలీయులు తమ దుష్ట హృదయ కాఠిన్యాన్ని అనుసరించి నడుచుకుంటున్నారని దేవుడు చెప్పాడు. అలాగే ఎఫెసీయులు 4:17-18లో అన్యజనులు తమ హృదయ కాఠిన్యము వలన దేవుని వలన కలుగు జీవము నుండి వేరుపరచబడిన స్థితిలో ఉన్నారని పౌలు చెబుతున్నాడు. కానీ క్రీస్తులోకి వచ్చిన మనిషి అదే కఠినమైన హృదయంతో కొనసాగడానికి పిలువబడలేదు.

మోషే పరిత్యాగ పత్రిక గురించి అర్థం చేసుకోవాలంటే ద్వితీయోపదేశకాండము 24:1-4 మరియు మత్తయి 19:7-8 రెండింటినీ కలిసి చూడాలి. మోషే పరిత్యాగ పత్రికను ఇచ్చినది అట్టి వివాహాన్ని ప్రోత్సహించడానికి కాదు అప్పటికే ఉన్న హృదయ కాఠిన్యాన్ని నియంత్రించడానికి. "ఒకడు స్త్రీని పరిగ్రహించి ఆమెను పెండ్లిచేసికొనిన తరువాత ఆమెయందు మానభంగసూచన ఏదో ఒకటి అతనికి కనబడినందున ఆమెమీద అతనికి ఇష్టము తప్పినయెడల, అతడు ఆమెకు పరిత్యాగ పత్రము వ్రాయించి ఆమెచేతికిచ్చి తన యింటనుండి ఆమెను పంపివేయవలెను.౹ ఆమె అతని యింటనుండి వెళ్లినతరువాత ఆమె వేరొక పురుషుని పెండ్లిచేసికొనవచ్చును.౹ ఆ రెండవ పురుషుడు ఆమెను ఒల్లక ఆమెకు పరిత్యాగ పత్రము వ్రాయించి ఆమె చేతికిచ్చి తన యింటనుండి ఆమెను పంపివేసినయెడల నేమి, ఆమెను పెండ్లిచేసికొనిన పిమ్మట ఆ రెండవ పురుషుడు చనిపోయినయెడలనేమి ఆమెను పంపివేసిన ఆమె మొదటి పెనిమిటి ఆమెను పెండ్లిచేసికొనుటకై ఆమెను మరల పరిగ్రహింపకూడదు. ఏలయనగా ఆమె తన్ను అపవిత్రపరచుకొనెను, అది యెహోవా సన్నిధిని హేయము గనుక నీ దేవుడైన యెహోవా నీకు స్వాస్థ్యముగా ఇచ్చుచున్న దేశమునకు పాపము కలుగకుండునట్లు మీరు ఆలాగు చేయకూడదు." (ద్వితీయోపదేశకాండము 24:1-4) అందుకే యేసు “ఆది నుండి ఆలాగు జరుగలేదు” అని చెప్పాడు.(మత్తయి. 19:8)

అయితే ఇక్కడ ఒక ముఖ్యమైన తేడాను గుర్తించాలి “మోషే విడాకులకు అనుమతి ఇచ్చాడు” అనేది ఒక విషయం. “పరమదేవుడు ఆది నుండే విడాకులను కోరుకున్నాడు” అనేది మరో విషయం. అందుకే యేసు “ఆది నుండి ఆలాగు జరుగలేదు” అని చెప్పాడు (మత్తయి 19:8). అంటే దేవుని అసలు ఉద్దేశం వివాహం కాబడిన పురుషుడు, స్త్రీ ఏక శరీరంగా ఐక్యంగా తమ జీవితాంతం జీవించవలసిందే కానీ విడనాడకూడదు. కావున నేటి క్రైస్తవ్యము మోషే పరిత్యాగ పత్రికను విడాకులకు స్వేచ్ఛా అనుమతిగా ఉపయోగించకూడదు.

 ^🟢 యేసు చెప్పిన మరొక్క సమాధానం*

"మరియు వ్యభిచారము నిమిత్తమే తప్ప తన భార్యను విడనాడి మరియొకతెను పెండ్లిచేసికొనువాడు వ్యభిచారము చేయుచున్నాడనియు, విడనాడబడినదానిని పెండ్లిచేసికొనువాడు వ్యభిచారము చేయుచున్నాడనియు మీతో చెప్పుచున్నానని వారితోననెను." (మత్తయి. 19:9)

ఈ మత్తయి 19:9 వచనంలో యేసు తన బోధను మరింత స్పష్టంగా చెప్పాడు. “తన భార్యను విడనాడి మరొకరిని వివాహం చేసుకునే విషయాన్ని ప్రభువు వ్యభిచారంతో సంబంధపరచి బోధించాడు. అక్కడ లైంగిక దుర్నీతి విషయంలో ప్రత్యేకంగా పేర్కొన్నాడు. అలాగే మత్తయి 5:31-32లో కూడా యేసు పరిత్యాగ పత్రికకు సంబంధించిన ధర్మశాస్త్ర నియమాన్ని ప్రస్తావించి, భార్యను విడనాడే విషయాన్ని తీవ్రంగా హెచ్చరించాడు. కావున నచ్చలేదని భార్యను విడనాడడం కాదు, మాట వినడం లేదని విడనాడడం కాదు, అందంగా లేదని విడనాడడం కాదు, డబ్బు విషయంలో సమస్య ఉందని విడనాడడం కాదు, నా తల్లిదండ్రుల మాట వినడం లేదని విడనాడడం కాదు, వ్యక్తిగత అభిప్రాయ భేదాల కారణంగా విడిపోవడం కాదు.

వివాహ బంధాన్ని తేలికగా చూడకూడదు. అందువల్ల “ఏ కారణమైనా సరే విడాకులు తీసుకోవచ్చు” అనే బోధ యేసు మాటలకు సరిపోదు. అదే సమయంలో మత్తయి 19:9లోని మినహాయింపు వాక్యాన్ని పూర్తిగా పక్కన పెట్టి “బైబిలులో ఏ పరిస్థితిలోనూ ఎటువంటి మినహాయింపూ లేదు” అని చెప్పడం కూడా ఆ వచనాన్ని సరిగ్గా చదవడం కాదు. కాబట్టి ఈ విషయాన్ని మొత్తం సందర్భంతోనే అర్థం చేసుకోవాలి. మత్తయి 5:31-32లో కూడా యేసు పరిత్యాగ పత్రిక విషయాన్ని ప్రస్తావిస్తూ, వ్యభిచార కారణము కాకుండా భార్యను విడనాడే విషయాన్ని తీవ్రమైన హెచ్చరికతో చెప్పాడు. అంటే ఒక వ్యక్తి తన భార్యను కేవలం తన ఇష్టానికి విరుద్ధంగా ఉందని విడనాడి, తరువాత మరొక వివాహంలోకి ప్రవేశించడం సాధారణమైన, నిరపరాధమైన విషయం కాదని ప్రభువు బోధించాడు. ఇందు కోసమే వివాహము పార్ట్ 4 లో వివాహము అనంతరం సమస్యలు పరిష్కారం విషయాలను ముందుగా వ్రాయడం జరిగింది. 

అలాగే పౌలు గారు 1 కొరింథీయులు 7:10-11లో మరింత స్పష్టంగా చెప్పారు. "మరియు పెండ్లియైన వారికి నేను కాదు ప్రభువే ఆజ్ఞాపించునదేమనగా, భార్య భర్తను ఎడబాయకూడదు.౹ ఎడబాసినయెడల పెండ్లిచేసికొనకుండవలెను; లేదా, తన భర్తతో సమాధాన పడవలెను. మరియు భర్త తన భార్యను పరిత్యజింపకూడదు.౹ ప్రభువు కాదు నేనే తక్కినవారితో చెప్పున దేమనగా– ఏ సహోదరునికైనను అవిశ్వాసురాలైన భార్య యుండి, ఆమె అతనితో కాపురము చేయ నిష్టపడినయెడల, అతడు ఆమెను పరిత్యజింపకూడదు.౹ మరియు ఏ స్త్రీకైనను అవిశ్వాసియైన భర్తయుండి, ఆమెతో కాపురముచేయ నిష్టపడినయెడల, ఆమె అతని పరిత్య జింపకూడదు.౹ అవిశ్వాసియైన భర్త భార్యనుబట్టి పరిశుద్ధపరచబడును; అవిశ్వాసురాలైన భార్య విశ్వాసియైన భర్తనుబట్టి పరిశుద్ధపరచబడును. లేనియెడల మీ పిల్లలు అపవిత్రులైయుందురు, ఇప్పుడైతే వారు పవిత్రులు.౹" “నేను కాదు ప్రభువే ఆజ్ఞాపించినది” అని చెప్పి, “భార్య భర్తను ఎడబాయకూడదు”, ఒకవేళ ఎడబాసినయెడల మరల పెండ్లి చేసుకోకుండా ఉండాలని లేదా భర్తతో సమాధానపడాలని, అలాగే “భర్త తన భార్యను పరిత్యజింపకూడదు” అని చెబుతున్నాడు. ఇక్కడ ఎడబాటు జరిగినా వెంటనే మరొక వివాహం చేసుకోవడమే పరిష్కారంగా చెప్పబడలేదు సమాధానపడటానికి మార్గం ఉంచబడింది అని గుర్తించగలరు. 🙏🏻

^🔴 పరిసయ్యుల మూడో ప్రశ్న*

"ఆయన శిష్యులు– భార్యాభర్తలకుండు సంబంధము ఇట్టిదైతే పెండ్లి చేసికొనుట యుక్తము కాదని ఆయనతో చెప్పిరి." (మత్తయి. 19:10)

^🟢 యేసు యొక్క సమాధానం*

"అందుకాయన అనుగ్రహము నొందినవారు తప్ప మరి ఎవరును ఈ మాటను అంగీకరింపనేరరు." (మత్తయి. 19:11) యేసు, వివాహం అందరికీ ఒకే విధంగా సులభమైన విషయం కాదని, దేవుని పిలుపు మరియు కృపకు సంబంధించిన విషయం అని వివరించాడు. 

పరిసయ్యులు “విడాకులు తీసుకోవడానికి ఏ కారణం సరిపోతుంది?” అని అడిగారు.

యేసు “వివాహాన్ని దేవుడు ఆది నుండి ఎందుకు ఏర్పరచాడు?” అనే అసలు విషయానికి వారిని తీసుకెళ్లాడు. అందుకే మనం కూడా వివాహ సమస్య వచ్చినప్పుడు మొదటి ప్రశ్నగా “నేను ఎలా విడిపోవాలి?” అని కాకుండా, “ఈ పరిస్థితిలో దేవుని సంకల్పం ఏమిటి? నేను ఎలా ప్రేమించాలి? ఎలా క్షమించాలి? ఎలా సమాధానపడాలి?” అని ఆలోచించాలి. మత్తయి 19లో యేసు ఇచ్చిన ప్రధాన సమాధానం ఇదే. మిత్రమా.... వివాహం మనిషి ఇష్టానుసారం ఏర్పడి, మనిషి ఇష్టానుసారం ముగిసే బంధం కాదు దేవుని సంకల్పాన్ని గౌరవించవలసిన పవిత్రమైన బంధం సుమీ!!

^🛑 4️⃣. భర్త/భార్య అవిశ్వాసి ఐతే… విడనాడుట?

"మరియు ఏ స్త్రీకైనను అవిశ్వాసియైన భర్తయుండి, ఆమెతో కాపురముచేయ నిష్టపడినయెడల, ఆమె అతని పరిత్య జింపకూడదు.౹ అవిశ్వాసియైన భర్త భార్యనుబట్టి పరిశుద్ధపరచబడును; అవిశ్వాసురాలైన భార్య విశ్వాసియైన భర్తనుబట్టి పరిశుద్ధపరచబడును. లేనియెడల మీ పిల్లలు అపవిత్రులైయుందురు, ఇప్పుడైతే వారు పవిత్రులు.౹ అయితే అవిశ్వాసియైనవాడు ఎడబాసిన ఎడబాయ వచ్చును; అట్టి సందర్భములలో సహోదరునికైనను సహో దరికైనను నిర్బంధము లేదు. సమాధానముగా ఉండుటకు దేవుడు మనలను పిలిచియున్నాడు.౹" (1 కొరింథీయులు 7:13-15)

అపొస్తలుడైన పౌలు, భార్యాభర్తలలో ఒకరు విశ్వాసిగా, మరొకరు అవిశ్వాసిగా ఉన్న పరిస్థితిని గురించి బోధిస్తున్నాడు. ఒకరు క్రీస్తును విశ్వసించినంత మాత్రాన, వారి భర్త లేదా భార్య ఇంకా అవిశ్వాసిగా ఉన్నారని వివాహ బంధాన్ని తెంచుకోవాలని పౌలు చెప్పడం లేదు. దీనికి విరుద్ధంగా, అవిశ్వాసి భాగస్వామి విశ్వాసితో కలిసి జీవించడానికి ఇష్టపడితే, “ఆమె అతని పరిత్యజింపకూడదు” అని స్పష్టంగా చెబుతున్నాడు. అదే సూత్రం అవిశ్వాసి భార్య ఉన్న విశ్వాసి భర్తకు కూడా వర్తిస్తుంది. ఇక్కడ ఒక ముఖ్యమైన విషయాన్ని అర్థం చేసుకోవాలి. భర్త లేదా భార్య అవిశ్వాసి కావడం మాత్రమే విడాకులకు కారణం కాదు. ఒకరు క్రైస్తవులుగా మారి, మరొకరు ఇంకా విశ్వాసంలోకి రాకపోయినా, ఆ అవిశ్వాసి వ్యక్తి వివాహ బంధంలో కొనసాగడానికి సిద్ధంగా ఉంటే, విశ్వాసి తన భాగస్వామిని విడిచిపెట్టకూడదు. తన విశ్వాసాన్ని నిజమైన ప్రేమతో, మంచి ప్రవర్తనతో, దేవునికి విధేయమైన జీవితంతో చూపించాలి.

13వ వచనంలో అవిశ్వాసి భర్త భార్యను బట్టి “పరిశుద్ధపరచబడును” అని, 14వ వచనంలో అవిశ్వాసి భార్య విశ్వాసి భర్తను బట్టి “పరిశుద్ధపరచబడును” అని చెప్పబడింది. దీని అర్థం అవిశ్వాసి వ్యక్తి తన జీవిత భాగస్వామి విశ్వాసం వల్ల స్వయంగా రక్షణ పొందుతాడని కాదు. కానీ ఆ వివాహ బంధం దేవుని దృష్టిలో అపవిత్రమైనదిగా పరిగణించబడదు; విశ్వాసి భాగస్వామి కారణంగా ఆ కుటుంబ జీవితం దేవుని కృపకు సంబంధించిన ఒక ప్రత్యేకమైన స్థితిలో ఉంటుంది. అందుకే వారి పిల్లల గురించి కూడా పౌలు “ఇప్పుడైతే వారు పవిత్రులు” అని చెబుతున్నాడు.

అయితే 15వ వచనంలో మరో పరిస్థితిని పౌలు ప్రస్తావిస్తున్నాడు. అవిశ్వాసి వ్యక్తి స్వయంగా విడిపోయి వెళ్లిపోవాలని నిర్ణయించుకుంటే, విశ్వాసి అతనిని లేదా ఆమెను బలవంతంగా పట్టుకుని ఉంచాలని పౌలు చెప్పడం లేదు. “అవిశ్వాసియైనవాడు ఎడబాసిన ఎడబాయ వచ్చును” అని చెబుతూ, అలాంటి సందర్భంలో సహోదరునికైనా సహోదరికైనా “నిర్బంధము లేదు” అని చెప్పాడు. వెంటనే “సమాధానముగా ఉండుటకు దేవుడు మనలను పిలిచియున్నాడు” అని కారణాన్ని కూడా తెలియజేశాడు. “ప్రభువు మిమ్మును క్షమించినలాగున మీరును క్షమించుడి.” (కొలొస్సయులు 3:13) అయితే “నిర్బంధము లేదు” అంటే వెంటనే మరొక వివాహం చేసుకోవడానికి స్పష్టమైన అనుమతి ఇచ్చాడు అని చెప్పడం వాక్య విరుద్ధమైన బోధ. ఈ వచనం ప్రధానంగా అవిశ్వాసి స్వయంగా విడిపోవడానికి వెళ్లినప్పుడు విశ్వాసిని బలవంతపు వివాహ బంధంలో ఉంచకూడదనే విషయాన్ని చెబుతుంది. పునర్వివాహం విషయంలో 1 కొరింథీయులకు 7లోని 10-11 వచనాలను కూడా కలిపి చూడాలి. అక్కడ  ఎడబాసిన వ్యక్తి అవివాహితగా ఉండడం లేదా తిరిగి సమాధానపడడం గురించి పౌలు చెబుతున్నాడు.

భార్య లేదా భర్త ఇంకా క్రీస్తును విశ్వసించలేదని వారిని శత్రువులుగా చూడకూడదు. విశ్వాసి తన వివాహ జీవితంలో క్రీస్తు ప్రేమను, సహనాన్ని, పవిత్రతను చూపించాలి. అదే సమయంలో హింస, ప్రాణహాని లేదా తీవ్రమైన దుర్వినియోగం వంటి పరిస్థితులను “అవిశ్వాసి కాబట్టి భరించాలి” అని చెప్పడం కూడా ఈ వచనానికి సరైన అన్వయం కాదు. అలాంటి సందర్భాల్లో తమ ఆత్మీయ భద్రతకు ప్రాధాన్యత ఇచ్చి, విశ్వసనీయమైన ఆత్మీయ మరియు అవసరమైన చట్టపరమైన(విశ్వాస పెద్దల/వాక్య అనుభవం కలిగినవారిని) సహాయం కచ్చితంగా పొందాలి. అప్పటికి ఆమె/అతను వినకపోతే రెండో వివాహమునకు అనుమతి లేదు. నీ వివాహము మరణం వరకు ఏర్పాటు చేయబడిన గట్టి బంధం. భర్త బ్రతికి ఉన్నంతకాలం భార్య భర్తకు బద్ధురాలై ఉంటుందని అని గుర్తించాలి(రోమీయులు 7:2-3) భర్త బ్రదికియున్నంతకాలము భార్య బద్ధురాలు(1 కొరింథీయులు 7:39).

ముగింపు 

మనుష్యుల చట్టాలు మారవచ్చు. సమాజపు ఆచారాలు మారవచ్చు. కుటుంబ సభ్యుల అభిప్రాయాలు మారవచ్చు. కానీ దేవుని వాక్యం మారదు. వివాహాన్ని దేవుడు జతపరిచిన బంధంగా చూస్తున్నప్పుడు దానిని తేలికగా తీసుకోకూడదు. “దేవుడు జతపరచిన వారిని మనుష్యుడు వేరుపరచకూడదు.” (మత్తయి 19:6). మోషే పరిత్యాగ పత్రిక గురించి చెప్పిన విషయాన్ని యేసుక్రీస్తు స్వయంగా హృదయ కాఠిన్యంతో సంబంధపరిచాడు. కాబట్టి క్రైస్తవుని జీవితం హృదయ కాఠిన్యంతో ఉండకూడదు. 

ఒకరినొకరు - క్షమించాలి, ప్రేమించాలి. సహించాలి, సమాధానపడాలి, తప్పు జరిగితే పశ్చాత్తాపపడాలి, తప్పిదం నుండి తిరిగి దేవుని వైపు రావాలి, వైవాహిక పరిశుద్ధతను కాపాడుకోవాలి, భార్యాభర్తలు తమ పిల్లలకు కూడా దేవుని రాజ్యానికి తగిన కుటుంబ జీవితాన్ని చూపించాలి, ఒకవేళ ఎవరైనా తప్పిదంలో ఉన్నట్లయితే, ఆ తప్పిదాన్ని సమర్థించుకోవడం కాదు మారుమనస్సు పొంది, పశ్చాత్తాపంతో దేవుని వైపు తిరిగి రావాలి.

విడాకులు(ఒకరినొకరు విడనాడుట) తీసుకోవడానికి కారణాలను వెతకడం కంటే, కుటుంబాన్ని కాపాడుకోవడానికి దేవుని వాక్యంలో మార్గాన్ని వెతకాలి.

లోకపు చట్టం ఏదైనా అనుమతించినప్పటికీ, క్రైస్తవుని తుది ప్రమాణం దేవుని వాక్యమే. అందువల్ల వైవాహిక పరిశుద్ధతలో జీవిద్దాం. కుటుంబాలను కాపాడుకుందాం. మన పిల్లలకు మంచి మాదిరిగా నిలుద్దాం. మన కుటుంబాల ద్వారా క్రీస్తు ప్రేమను చూపిద్దాం. వివాహం తాత్కాలికమైన ఇష్టం కాదు. అది జీవితాన్ని పంచుకునే పవిత్రమైన బంధం. అందుకే దానిని కోపంతో లేదా తాత్కాలిక సమస్యలతో తేలికగా విరిచివేయకూడదు అనేది మా మనవి 🙏🏻

మీ ఆత్మీయులు

9705040236

వివాహము (పార్ట్ 01) ^{క్లిక్ చేయు}

వివాహము (పార్ట్ 02)^{క్లిక్ చేయు}

వివాహము (పార్ట్ 03)^{క్లిక్ చేయు}

వివాహము (పార్ట్ 04)^{క్లిక్ చేయు}

వివాహము (పార్ట్ 06)^{క్లిక్ చేయు}