“వివాహము” (పార్ట్ - 03) Wedlock

 

“వివాహము” (పార్ట్ - 03) Wedlock

సహోదరీ, సహోదరులకు మన ప్రభువైన యేసు నామములో వందనములు. 

            మునుపు వ్రాయబడిన రెండు  అంశములలో వివాహము అనగా ఏమిటి?,  వివాహము ఎందుకు?  వివాహం ఎవరెవరికి? (వివాహము పార్ట్ 01) మరియు వివాహములో ప్రాముఖ్యతలు (వివాహము పార్ట్ 02) అనే విషయాలను గూర్చి గ్రంధానుసారమైన ఆధారాలతో నేర్చుకోగలిగాము. అవి మీ దైవిక జీవితమునకు ఉపయోగపడుతున్నాయని మన ప్రభువునందు విశ్వసిస్తున్నాము. 

ఇప్పుడు (వివాహము పార్ట్ 03) ఈ అంశములో వివాహానికి ముందు జరుగుతున్న లేదా జరుపబడుతున్న లోపాలను గూర్చి మరియు వాటి యొక్క పరిణామాలు గూర్చి క్లుప్తముగా పరిశుద్ధ గ్రంథ ఆధారాలతో నేర్చుకుందాము. 

వివాహానికి మునుపు జరుగుచున్న క్రియలు లేక లోపాలు :

1) మనస్సుకు నచ్చిన వారిని చేసుకోవడం 
2) అన్యులను(అవిశ్వాసులను) చేసుకోవడం 
3) ప్రేమించి/ఇష్టపడి చేసుకోవడం 
4) అందం, ఆస్తి, కులం, ధనము చూసి చేసుకోవడం 
5) వివాహానికి ముందు భార్యభర్తలుగా వ్యవహరించడం 

1). మనస్సుకు నచ్చిన వారిని చేసుకోవడం :

ప్రస్తుతమున్న ఈ కాలములో మనస్సుకు వచ్చిన వారిని చేసుకోవాలనే ఆలోచన చాలామంది యవనస్తులలో చూడగలము. అయితే ఇందులో తప్పేముంది మనసుకు నచ్చితేనే కదా జీవితాంతము కలిసి ఉండగలం అనే వాదన కూడా వినిపిస్తుంది. అలా ఆలోచించే క్రైస్తవుడా నీకు నువ్వే ఒక ప్రశ్న వేసుకో. నీ మనసు ఎటువంటి వారిని కోరుతుంది దైవికమైన వ్యక్తినా?, నిన్ను తనతో పాటు నిత్యత్వంలోకి నడిపే వ్యక్తినా?, లేక నిన్ను తనతో పాటు ఈ లోకానికి బానిస చేసే వ్యక్తినా? 

"దేవుని కుమారులు నరుల కుమార్తెలు చక్కనివారని చూచి వారందరిలో తమకు మనస్సువచ్చిన స్త్రీలను వివాహము చేసికొనిరి.౹" (ఆది. కాం. 6:2).

ఇది దైవ చిత్తమా?  కేవలం పైరూపాన్ని  చూచి లేదా మాటలు ద్వారా నీవు ఇష్టపడి చేసుకుంటే అది దైవిక వివాహం కాబడదు. నోవాహు కాలములో యావత్తు భూమి మీదనున్న నరులు ఇదే కార్యక్రమం జరిగించారు. దాని పరిణామం వారి ఊహకు కూడా అందలేదు. 

పరిణామం : 

"దేవుడు సంతాపం నొంది, తన హృదయములో నొచ్చుకొనెను దానికి ఫలితమే మహా జలప్రళయం ద్వారా తన ఉగ్రతను చూపారు". (ఆది. కాం. 6వ అధ్యాయం నుండి 8వ అధ్యాయం వరకు). 

దేవుని సంబంధులు లోక సంబందులతో వివాహం చేసుకోవడం(mixed marriages), లేదా తమ మనస్సుకు నచ్చిన వారిని చేసుకోవడం జల ప్రళయం (దేవుని ఉగ్రతకు) మూల కారణం.

2) అన్యులను(అవిశ్వాసులను) చేసుకోవడం :

ఈ విషయము గురించి ప్రత్యేకముగా మాట్లాడాల్సిన పనిలేదు ఎందుకనగా నీవు క్రైస్తవుడవైతే నీవు ఎవరిని వివాహమాడాలో ఈపాటికే నీకు తెలిసుండాలి. అలా కాకుండా నీవు అన్యులతో వివాహానికి సిద్ధపడితే అది దేవునికి విరోధమైన పనియే. నేను అన్యుడిని/అన్యురాలిని చేసుకుని అ వ్యక్తిని మార్చుకుంటాను నాకు అట్టి విశ్వాసం ఉందని నీకు నీవు సర్దిచెప్పుకోకు. నీవు నిజముగా విశ్వాసుడివి అయితే అసలు అన్యుల జోలికే పోవు. 

పొలమును దున్నడానికి రెండు ఎద్దులను జంటగా కలిపి కాడిని కడతారు ఆ రెండు సమానముగా ఉండుటచేత చక్కగా భూమి అంతటిని దున్నుతాయి. అలా కాకుండా ఒక కుక్కకి ఒక ఎద్దుకి కాడిని కడితే ఆ కాడి నిలబడగలదా.. ఒక విశ్వాసి అన్యుడు/అవిశ్వాసిని చేసుకుంటే ఆ జీవితం కూడా అలాగే ఉంటుంది.

"కాబట్టి అన్యజనులు నడుచుకొనునట్లు మీరికమీదట నడుచుకొనవలదని ప్రభువునందు సాక్ష్యమిచ్చుచున్నాను.౹" (ఎపేసి. 4:17). 

"మీరు అవిశ్వాసులతో జోడుగా ఉండకుడి. నీతికి దుర్నీతితో ఏమి సాంగత్యము? వెలుగునకు చీకటితో ఏమి పొత్తు?౹ క్రీస్తునకు బెలియాలుతో ఏమి సంబంధము? అవిశ్వాసితో విశ్వాసికి పాలెక్కడిది?౹" (2 కోరింధి. 6:14-15)

"సొలొమోను ఐగుప్తురాజైన ఫరో కుమార్తెను పెండ్లిచేసికొని అతనికి అల్లుడాయెను". (మొదటి రాజులు  3:1). 

"ఐగుప్తు రాజైన ఫరో గెజెరుమీదికి వచ్చి దాని పట్టుకొని అగ్నిచేత కాల్చి ఆ పట్టణమందున్న కనానీయులను హతము చేసి దానిని తన కుమార్తెయైన సొలొమోను భార్యకు కట్నముగా ఇచ్చెను.౹" (1 రాజులు 9:16)

"మోయాబీయులు ఎదోమీయులు అమ్మోనీయులు సీదోనీయులు హిత్తీయులు అను జనులు మీ హృదయములను తమ దేవతలతట్టు త్రిప్పుదురు గనుక వారితో సహవాసము చేయకూడదనియు, వారిని మీతో సహవాసము చేయనియ్యకూడదనియు యెహోవా ఇశ్రాయేలీయులకు సెలవిచ్చియున్నాడు. అయితే రాజైన సొలొమోను ఫరో కుమార్తెనుగాక ఆ జనులలో ఇంక అనేక మంది పరస్త్రీలను మోహించి కామాతురత గలవాడై వారిని ఉంచుకొనుచు వచ్చెను. అతనికి ఏడు వందలమంది రాజకుమార్తెలైన భార్యలును మూడువందల మంది ఉపపత్నులును కలిగియుండిరి; అతని భార్యలు అతని హృదయమును త్రిప్పివేసిరి. సొలొమోను వృద్ధుడైనప్పుడు అతని భార్యలు అతని హృదయమును ఇతర దేవతలతట్టు త్రిప్పగా అతని తండ్రియైన దావీదు హృదయమువలె అతని హృదయము దేవుడైన యెహోవాయెడల యథార్థము కాక పోయెను. సొలొమోను అష్తారోతు అను సీదోనీయుల దేవతను మిల్కోము అను అమ్మోనీయుల హేయమైన దేవతను అనుసరించి నడిచెను. ఈ ప్రకారము సొలొమోను యెహోవా దృష్టికి చెడు నడత నడచి తన తండ్రియైన దావీదు అనుసరించినట్లు యథార్థహృదయముతో యెహోవాను అనుసరింపలేదు". (మొదటి రాజులు 11:1-6)

పరిణామం :

"నీవు ఇతర దేవతలను వెంబడింప వలదని అతనికి ఆజ్ఞాపించినను సొలొమోను హృదయము ఆయన యొద్ద నుండి తొలగిపోయెను. యెహోవా తన కిచ్చిన ఆజ్ఞను అతడు గైకొనకపోగా యెహోవా అతని మీద కోపగించి సెలవిచ్చినదేమనగా-నేను నీతో చేసిన నా నిబంధనను కట్టడలను నీవు ఆచరింపక పోవుట నేను కనుగొనుచున్నాను గనుక యీ రాజ్యము నీకుండ కుండ నిశ్చయముగా తీసివేసి నీ దాసునికిచ్చెదను". (మొదటి రాజులు 11:10,11)

3) ప్రేమించి/ఇష్టపడి చేసుకోవడం :

ఈ విషయమును గూర్చి ఏమి మాట్లాడాలో తెలియడం లేదు. ప్రస్తుతము నూటికి ఎనభైశాతం  మంది ప్రేమ వివాహాలు చేసుకుంటున్నారు. కొంతమంది తమ ప్రేమను పెద్దలకు తెలిపి ఒప్పించి చేసుకుంటున్నారు. సరే ఒక ప్రశ్న ప్రేమించి, పెద్దలను ఒప్పించి ఎంతో శ్రమపడి వివాహాము చేసుకుంటున్న క్రైస్తవుడా చివరి వరకు ఆ ప్రేమను దైవికంగా కొనసాగిస్తున్నావా? కొనసాగించే అవకాశాము నీ జీవిత భాగస్వామి ఇస్తున్నారా? 

"సమ్సోను తిమ్నాతునకు వెళ్లి తిమ్నాతులో ఫిలిష్తీ యుల కుమార్తెలలో ఒకతెను చూచెను. అతడు తిరిగి వచ్చితిమ్నాతులో ఫిలిష్తీయుల కుమార్తెలలో ఒకతెను చూచితిని, మీరు ఆమెను నాకిచ్చి పెండ్లి చేయవలెనని తన తలిదండ్రులతో అనగా వారునీ స్వజనుల కుమార్తెల లోనేగాని నా జనులలోనేగాని స్త్రీ లేదను కొని, సున్నతి పొందని ఫిలిష్తీయులలోనుండి కన్యను తెచ్చుకొనుటకు వెళ్లు చున్నావా? అని అతని నడిగిరి. అందుకు సమ్సోనుఆమె నాకిష్టమైనది గనుక ఆమెను నాకొరకు తెప్పించుమని తన తండ్రితో చెప్పెను". (న్యాయాధిపతులు 14:1 - 3)

 పరిణామం :

"సంసోను జీవితంలో జరిగిన ప్రతి సంఘటన ఇక్కడ వ్రాయడం కష్టతరము కనుక ఆ వచనములను తెలుపుతున్నాము చదవగలరు". (న్యాయాధిపతులు 14, 15, 16 అధ్యాయములు) 

4) అందం, ఆస్తి, కులం, ధనము చూసి చేసుకోవడం : 

ఒక క్రైస్తవుడు ఇటువంటి వాటికొరకు ఆశపడి వివాహము చేసుకోవడం ఎంతవరకు సమంజసము నీవే ఆలోచించు. అయినా కూడా నాకు ఇవే ముఖ్యము అనే ధోరణిలో నీవుంటే వాటియొక్క పరిణామాలు ఎలా ఉంటాయో ఉదాహరణలతో వివరించాల్సిన అవసరత లేదు. 

"గుణవతియైన భార్య దొరుకుట అరుదు అట్టిది ముత్యముకంటె అమూల్యమైనది. అందము మోసకరము, సౌందర్యము వ్యర్థము యెహోవాయందు భయభక్తులు కలిగిన స్త్రీ కొనియాడబడును".  (సామెతలు 31:10,30)

"సుబుద్ధిగల భార్య యెహోవాయొక్క దానము". (సామెతలు 19:14)

"ఆస్తిగలవారు దేవుని రాజ్యములో ప్రవేశించుట ఎంతో దుర్లభము." (లూకా 18:24)

"మనమీలోకములోనికి ఏమియు తేలేదు, దీనిలోనుండి ఏమియు తీసికొని పోలేము. కాగా అన్నవస్త్రములుగలవారమై యుండి వాటితో తృప్తిపొందియుందము.౹ ధనవంతులగుటకు అపేక్షించువారు శోధనలోను, ఉరిలోను, అవివేక యుక్తములును హానికరములునైన అనేక దురాశలలోను పడుదురు. అట్టివి మనుష్యులను నష్టములోను నాశనములోను ముంచివేయును.౹ ఎందుకనగా ధనాపేక్షసమస్తమైన కీడులకు మూలము; కొందరు దానిని ఆశించి విశ్వాసమునుండి తొలగిపోయి నానాబాధలతో తమ్మును తామే పొడుచుకొనిరి." (1 తిమోతి. 6:7-10)

"కాబట్టిమునుపు శరీరవిషయములో అన్యజనులైయుండి, శరీరమందు చేతితో చేయబడిన సున్నతి గలవారు అనబడిన వారిచేత సున్నతిలేనివారనబడిన మీరు౹ ఆ కాలమందు ఇశ్రాయేలుతో సహపౌరులుకాక, పరదేశులును, వాగ్దాన నిబంధనలు లేని పరజనులును, నిరీక్షణలేనివారును, లోకమందు దేవుడులేనివారునైయుండి, క్రీస్తుకు దూరస్థులైయుంటిరని మీరు జ్ఞాపకము చేసికొనుడి.౹ అయిననుమునుపు దూరస్థులైన మీరు ఇప్పుడు క్రీస్తుయేసునందు క్రీస్తు రక్తమువలన సమీపస్థులై యున్నారు.౹ ఆయన మన సమాధానమైయుండి మీకును మాకును ఉండిన ద్వేషమును, అనగా విధిరూపకమైన ఆజ్ఞలుగల ధర్మశాస్త్రమును తన శరీరమందు కొట్టివేయుటచేత మధ్యగోడను పడగొట్టి, మన ఉభయులను ఏకముచేసెను.౹ ఇట్లు సంధిచేయుచు, ఈ యిద్దరిని తనయందు ఒక్క నూతన పురుషునిగా సృష్టించి,౹ తన సిలువవలన ఆ ద్వేషమును సంహరించి, దాని ద్వారా వీరిద్దరిని ఏకశరీరముగా చేసి, దేవునితో సమాధానపరచవలెనని యీలాగు చేసెను గనుక ఆయనయే మనకు సమాధానకారకుడై యున్నాడు.౹"  (ఎపేసి. 2:11-16). 

5) వివాహానికి ముందు భార్యభర్తలుగా వ్యవహరించడం  : 

తండ్రియైన దేవునియెదుట, ప్రభువైన క్రీస్తు ఎదుట, పరిశుద్ధుల ఎదుట, సమాజము ఎదుట నిబంధన చేసుకోకుండానే మేము జతపరచబడ్డాము అనే తప్పుడు భావనలోనే నేడు అనేకమంది ఉన్నారు. ఆ ఆలోచనతోనే వివాహానికి ముందు తప్పుడు కార్యకలాపాలు చేస్తున్నారు. ఇలాంటివి క్రైస్తవుడికి తగదు. 

వివాహము కాకుండా ఒకరికొకరు ముట్టుట జారత్వము అవుతుంది.

 
"అయినను జారత్వములు జరుగుచున్నందున ప్రతివానికి సొంత భార్యయుండవలెను, ప్రతి స్త్రీకి సొంత భర్తయుండవలెను". (మొదటి కొరింథీయులకు  7:2)

వివాహము కాకుండా మోహపు చూపుతో చూస్తే వ్యభిచారమవుతుంది. 

"ఒక స్త్రీని మోహపుచూపుతో చూచు ప్రతివాడు అప్పుడే తన హృదయమందు ఆమెతో వ్యభిచారము చేసినవాడగును". (మత్తయి సువార్త 5:28)

జారత్వము, వ్యభిచారాము చాలా చిన్న విషయాలే కదా అని అనుకోవద్దు అవి నిన్ను నీ దేవునికి దూరం చేస్తాయి. కాబట్టి ఆలోచన చేసి నీ జీవితాన్ని సరి చేసుకోవాలని మా మనవి.

మీ ఆత్మీయులు...

“వివాహము” (పార్ట్ - 01) - ఇక్కడ క్లిక్ చేయుము
“వివాహము” (పార్ట్ - 02) - ఇక్కడ క్లిక్ చేయుము
త్వరలో... "వివాహము" (పార్ట్ - 04)

“వివాహము” (పార్ట్ - 02) Wedlock

“వివాహము” (పార్ట్ - 02) Wedlock

 సహోదరీ, సహోదరులకు మన ప్రభువైన యేసు నామములో వందనములు. 

మునుపు వ్రాయబడిన అంశములో వివాహము అనగా ఏమిటి?, వివాహము ఎందుకు? మరియు వివాహం ఎవరెవరికి? అనే విషయాలను గూర్చి గ్రంధానుసారమైన ఆధారాలతో  వివాహము పార్ట్ 01 నేర్చుకోగలిగాము. అవి మీ దైవిక జీవితమునకు ఉపయోగపడుతున్నాయని మన ప్రభువునందు విశ్వసిస్తున్నాము. ఇప్పుడు ఈ అంశములో అనగా వివాహము పార్ట్ 02 లో  వివాహములో ప్రాముఖ్యమైన విషయాలను గూర్చి ఆలోచన చేద్దాము.

వివాహములో ప్రాముఖ్యమైన విషయాలు :

1. మధ్యవర్తి
2. ప్రధానము
3. పెండ్లికుమార్తె అలంకరణ
4. వస్త్రధారణ
5. నిబంధన
6. సాక్ష్యులు
7. విందు
8. విందు ప్రధాని

9. పాన్పు

పైన తెలుపబడిన ప్రాముఖ్యతలను గూర్చి క్లుప్తంగా నేర్చుకుందాము.

 I) దేవునియెడల భక్తి, నమ్మకం కలిగిన మధ్యవర్తి :

స్త్రీ, పురుషుడు ఇద్దరు వ్యక్తులు వివాహమనే బంధం ద్వారా ఒక్కటి కావడానికి వారివురు ఉంటే సరిపోదు కానీ వారివురు కుటుంబాలు మధ్య దైవికమైన ఒప్పందం జరగాలి. అలా జరగాలంటే రెండు కుటుంబాల మధ్య వారధిగా ఒక మధ్యవర్తి అవసరం ఎంతైనా ఉంది. ఆ మధ్యవర్తి లోకానుసారుడిగా కాకుండా దేవునియెడల భయభక్తులు కలిగి, రెండు కుటుంబాల అభిప్రాయాలను చాకచక్యంగా ఒకరివి మరొకరికి యదార్ధంగా తెలియజేస్తూ వివాహమును దేవునికి మహిమకరంగా జరిపించాలి.  అలా జరగబడిన వివాహము గూర్చి గ్రంధములో వ్రాయబడినది.

 
"అబ్రాహాము బహు కాలము గడిచిన వృద్ధుడై యుండెను. అన్ని విషయములలోను యెహోవా అబ్రాహామును ఆశీర్వదించెను.౹ అప్పుడు అబ్రాహాము తనకు కలిగిన సమస్తమును ఏలుచుండిన తన యింటి పెద్దదాసు నితో నీ చెయ్యి నా తొడక్రింద పెట్టుము;౹ నేను ఎవరి మధ్య కాపురమున్నానో ఆ కనానీయుల కుమార్తెలలో ఒక దానిని నా కుమారునికి పెండ్లిచేయక నా స్వదేశమందున్న నా బంధువులయొద్దకు వెళ్లి ఇస్సాకను నా కుమారునికి భార్యను తెచ్చునట్లు ఆకాశముయొక్క దేవుడును భూమియొక్క దేవుడునైన యెహోవా తోడని నీ చేత ప్రమాణము చేయించెదననెను.౹ ఆ దాసుడు — ఈ దేశమునకు నా వెంట వచ్చుటకు ఒకవేళ ఆ స్త్రీ ఇష్టపడని యెడల నీవు బయలుదేరి వచ్చిన ఆ దేశమునకు నేను నీ కుమారుని తీసికొని పోవలెనా అని అడుగగా అబ్రాహాము– అక్కడికి నా కుమారుని తీసికొని పోకూడదు సుమీ.౹ నా తండ్రి యింటనుండియు నేను పుట్టిన దేశమునుండియు నన్ను తెచ్చి నాతో మాటలాడి– నీ సంతానమునకు ఈ దేశము నిచ్చెదనని ప్రమాణముచేసి నాతో చెప్పిన పరలోకపు దేవుడగు యెహోవా తన దూతను నీకు ముందుగా పంపును; అక్కడనుండి నీవు నా కుమారునికి భార్యను తీసికొనివచ్చెదవు.౹ అయితే నీ వెంట వచ్చుటకు ఆ స్త్రీ ఇష్టపడని యెడల ఈ ప్రమాణము నుండి విడుదల పొందెదవుగాని నీవు నా కుమారుని అక్కడికి తీసికొని పోకూడదని అతనితో చెప్పెను.౹ ఆ దాసుడు తన యజమానుడగు అబ్రాహాము తొడక్రింద తన చెయ్యి పెట్టి యీ సంగతి విషయమై ప్రమాణము చేసెను.౹" (ఆది. కాం. 24:1-9). 

అబ్రాహాము తన కుమారుడైన ఇస్సాకు వివాహం చేయదలచిన వాడైనప్పుడు తన ఇంట సమస్తమును ఏలుచుండిన నమ్మకమైన వ్యక్తి ఎలియాజరును అప్పగించుట. ఎలియాజరు అబ్రాహామునకు నమ్మకమైన వ్యక్తే కాదు దేవునినయెడల భయభక్తులు కలవాడు కూడా. ఒంటెలను సైతము మ్రోకరింపజేసి దేవునికి ప్రార్థించాడంటే అక్కడే ఆయన భక్తి ఏమిటో అర్థమగుతున్నది. అతడు ఎంతో చక్కగా గొప్ప మధ్యవర్తిగా వ్యవహరించి రిబ్కాను మాత్రమే కాదు ఆమె ఇంటివారందరిని ఒప్పించి సమాధానము కలిగి ఆమెను తీసుకువచ్చినట్టుగా చూడగలము. (ఆది 24వ అధ్యాయము అంతా చడవగలరు)

ఈనాటి కాలములో క్రైస్తవులమని చెప్పుకొనుచూ మధ్యవర్తి మరియు ఇరువురు కుటుంబాల ప్రమేయం లేకుండా తమ వివాహానికి తామే అన్నిటిని చూసుకుంటున్నవారున్నారు. అయితే మధ్యవర్తి లేకుండా వివాహం జరగబడిన కుటుంబాలు నేడు సంతోషంగా లేవా అనే ప్రశ్న మీ మదిలో మెదలవచ్చు. కానీ అలా జరగడం దైవిక నియమం ప్రకారం జరిగే వివాహం అనిపించుకోదు. అపోస్తుల బోధలో ఇటువంటి సొంత నిర్ణయాలకు తావులేదు. 

దేవునితో మనలను సమాధానపరచడానికి యేసుక్రీస్తు శరీరధారిగా ఈ లోకమునకు వచ్చి ఎంతో గొప్పగా మధ్యవర్తి పాత్ర పోషించి దేవునితో మనలను ఏకము చేసెను.

దేవుడొక్కడే, దేవునికిని నరులకును మధ్య వర్తియు ఒక్కడే; ఆయన క్రీస్తుయేసను నరుడు.  (1 మొదటి తిమోతికి 2:5)

పై వచనము ఆధారంగా మధ్యవర్తి చాలా అవసరమని, అతడు దేవునియెడల భయభక్తులు కలవాడై ఉండాలని అర్థమగుతున్నది.

ప్రతి తల్లితండ్రి ముఖ్యముగా గమనించాల్సిన విషయమేమిటంటే మీ బిడ్డల వివాహ విషయములో మీరే బాధ్యత తీసుకుని దేవుని చిత్తములో ఉన్న  మధ్యవర్తిని ఏర్పాటు చేసుకోవాలి ఎలాగయితే ఇస్సాకు విషయములో అబ్రాహామే చొరవ తీసుకుని ఎలియాజరుని పంపినట్టుగా. వివాహము తల్లితండ్రుల బాధ్యతే కానీ పిల్లలు తమంతట తాము అత్యాసక్తి చూపుట వాక్య విరుద్ధమని ఇస్సాకు రిబ్కాల వివాహము ద్వారా మనకు తెలియాలి. 

II). ప్రధానము :

ప్రధానం అనగా పెండ్లి చేసుకొంటానని ఇరువురు కుటుంబాలు కలిసి పరిశుద్దుల యెదుట, సమాజము యెదుట చేసుకునే ఒక ఒప్పందము మాత్రమే కానీ వివాహం కాదు. కేవలం, ప్రధానములో ఇరుగురు కుటుంబాలు ఒకచోటికి చేరి, వారి పిల్లల వివాహల కోసం సంప్రదింపులు చేసుకొనుటకు, పెండ్లి కుమారుని ఇంటివారు పెండ్లి కుమార్తెను ప్రధానం చేసుకొనుటకు కుటుంబ సభ్యులను మరియు మధ్యవర్తిని పెట్టి, వారి ఆర్థిక పరిస్థితి బట్టి పెండ్లి కుమార్తెకు బహుమతులు ఇవ్వడం వంటివి చేస్తారు. 

ప్రధానములో ఏమి జరుగును? :

1). పెండ్లి కుమార్తె పెండ్లి కుమారుడితో తన భవిష్యత్ జీవితానికి సిద్ధపడటం :

ఇస్సాకునకు రిబ్కాను ప్రధానం చేసిన తరువాత (ఆది. కాం. 24:50-53) రిబ్కా తెలియపరిచిన మాట   "ఆమె సహోదరుడును ఆమె తల్లియు– ఈ చిన్నదాని పదిదినములైనను మాయొద్ద ఉండనిమ్ము, ఆ తరువాత ఆమె వెళ్లవచ్చుననిరి.౹ అప్పుడతడు– యెహోవా నా ప్రయాణమును సఫలము చేసెను గనుక నాకు తడవు కానీయక నన్ను పంపించుడి, నా యజమానుని యొద్దకు వెళ్లెదనని చెప్పి నప్పుడు వారు– ఆ చిన్న దానిని పిలిచి, ఆమె యేమనునో తెలిసికొందమని చెప్పుకొని రిబ్కాను పిలిచి– ఈ మనుష్యునితోకూడ వెళ్లెదవా అని ఆమె నడిగినప్పుడు —వెళ్లెదననెను.౹" (ఆది. కాం.24:55-58) ఆమె తన స్వజనమును, తన తండ్రి ఇంటిని విడిచుటలో సిద్ధపడునట్టుగా చూడగలం. 

2). ప్రధానముతో జీవితకాల బంధము నిర్ణయించబడును :

"నీవు నిత్యము నాకుండునట్లుగా నేను నీతినిబట్టి తీర్పుతీర్చుటవలనను, దయాదాక్షిణ్యములు చూపుటవలనను నిన్ను ప్రధానము చేసికొందును.౹ నీవు యెహోవాను ఎరుగునట్లు నేను నమ్మకమునుబట్టి నిన్ను ప్రధానము చేసికొందును.౹" (హోషేయా. 2:19-20)

అయితే ప్రధానం అనంతరం పెండ్లి కుమారుడు తనకు ప్రధానము చేయబడిన ఆమెను వివాహం చేసుకొనుటకు ఎక్కువ సమయం తీసుకోకూడదు.

"ఒకడు స్త్రీని ప్రధానము చేసికొని ఆమెను ఇంకనుపరిగ్రహింపకమునుపే యుద్ధములో చనిపోయినయెడల వేరొకడు ఆమెను పరిగ్రహించును గనుక అట్టివాడును తన యింటికి తిరిగి వెళ్లవచ్చును.౹" (ద్వితీయో. 20:7).

NOTE: (ప్రధానము గూర్చి లోతైన సంగతులను మరియొక్క అంశము ద్వారా మీముందు ఉంచుతాము)

III). పెండ్లి కుమార్తె అలంకరణ: 

పెండ్లి కుమార్తె తన భర్తకొరకు అనగా తన రాజు కొరకు అలంకరింపబడాలి. రాజుకు నచ్చినవిధముగా ఆమె సిద్ధము చేయబడాలి.

కుమారీ, ఆలకించుము ఆలోచించి చెవియొగ్గుము నీ స్వజనమును నీ తండ్రి యింటిని మరువుము ఈ రాజు నీ ప్రభువు అతడు నీ సౌందర్యమును కోరినవాడు అతనికి నమస్కరించుము. 
విచిత్రమైన పనిగల వస్త్రములను ధరించుకొని రాజు నొద్దకు ఆమె తీసికొని రాబడుచున్నది ఆమెను వెంబడించు ఆమె చెలికత్తెలైన కన్యకలు నీయొద్దకు తీసికొని రాబడుచున్నారు. (కీర్తనల 45:10-11)

"మరియు ఆమె ధరించుకొనుటకు ప్రకాశములును నిర్మలములునైన సన్నపు నారబట్టలు ఆమెకియ్యబడెను; అవి పరిశుద్ధుల నీతిక్రియలు.౹" (ప్రకటన. 19:8)

"మరియు నేను నూతనమైన యెరూషలేము అను ఆ పరిశుద్ధపట్టణము తన భర్తకొరకు అలంకరింపబడిన పెండ్లికుమార్తెవలె సిద్ధపడి పరలోకమందున్న దేవుని యొద్దనుండి దిగి వచ్చుట చూచితిని.౹" (ప్రకటన. 21:2)

"అంతట ఆ కడపటి యేడు తెగుళ్లతో నిండిన యేడు పాత్రలను పట్టుకొనియున్న యేడుగురు దేవదూతలలో ఒకడు వచ్చి– ఇటు రమ్ము, పెండ్లికుమార్తెను, అనగా గొఱ్ఱెపిల్లయొక్క భార్యను నీకు చూపెదనని నాతో చెప్పి,౹" (ప్రకటన. 21:9).

IV). అతిధి వస్త్రధారణ : 

వివాహానికి వచ్చువారు సంతోషముతో పెండ్లివస్త్రములను ధరించుకుని నూతన వధూవరులను చూడరావాలి.

 "రాజు కూర్చున్నవారిని చూడ లోపలికి వచ్చి, అక్కడ పెండ్లివస్త్రము ధరించుకొనని యొకని చూచి –స్నేహితుడా, పెండ్లి వస్త్రములేక ఇక్కడి కేలాగు వచ్చితివని అడుగగా వాడు మౌనియైయుండెను. అంతట రాజు వీని కాళ్లు చేతులు కట్టి వెలుపటి చీకటిలోనికి త్రోసివేయుడి; అక్కడ ఏడ్పును పండ్లు కొరుకుటయు ఉండునని పరిచారకులతో చెప్పెను." (మత్తయి. 22:11-13).

V). నిబంధన : 

 వివాహములో అత్యంత ప్రాముఖ్యమైనది నిబంధన. నిబంధన అనగా ఒప్పందము, ఒడంబడిక మరియు ప్రమాణము. అది ఎన్నటికీ మార్చుకోనిది ఎందుకనగా ఇది మనుష్యుల మధ్య మాత్రమే జరిగేది కాదు పరమతండ్రి, సంఘము (క్రీస్తు+శరీరము) యెదుట చేసుకునేది. ఊరికే ఎవరో ఒకరు పక్కనుండి అందిస్తే అవే మాటలు నువు కంఠస్థ పద్యము లాగా చెప్పేస్తే చాలు అనుకుంటున్నావేమో వివాహములో చేసుకునే నిబంధన మరణము ఎడబాయువరకు ఒకరికొకరు దైవిక కుటుంబంగా కట్టబడుతూ అన్ని విషయములలో కట్టుబడి ఉంటానని దేవుని యెదుట ఒప్పుకోవడం. ఎన్ని వచ్చినా, ఏది ఎదురైనా దేవుని నియమానికి విధేయులమై ఉంటామని చేసుకునే ప్రమాణము. ఇది నువు మీరితే వివాహానికి వచ్చేవారు సాక్షులుగా నిలబడతారో లేదో కానీ ఖచ్చితముగా దేవుడు ఇందుకు సాక్షిగా ఉంటాడు.

 "అది ఎందుకని మీ రడుగగా, యౌవన కాలమందు నీవు పెండ్లి చేసికొని అన్యాయముగా విసర్జించిన నీ భార్య పక్షమున యెహోవా సాక్షియాయెను, అది నీకు తోటిదై నీవు చేసిన నిబంధనకు పాత్రురాలు గదా, నీ పెండ్లి భార్య గదా.౹ కొంచెముగానైనను దైవాత్మనొందినవారిలో ఎవరును ఈలాగున చేయలేదు; ఒకడు చేసినను ఏమి జరిగెను? దేవునిచేత సంతతి నొందవలెనని అతడు యత్నము చేసెను గదా; కాగా మిమ్మును మీరే జాగ్రత్త చేసికొని, యౌవనమున పెండ్లిచేసికొనిన మీ భార్యల విషయములో విశ్వాసఘాతకులుగా ఉండకుడి.౹ భార్యను పరిత్యజించుట నాకు అసహ్యమైన క్రియ యని ఇశ్రాయేలీయుల దేవుడగు యెహోవా సెలవిచ్చుచున్నాడు. మరియు ఒకడు తన వస్త్రములను బలాత్కారముతో నింపుట నా కసహ్యమని సైన్యములకు అధిపతియగు యెహోవా సెలవిచ్చుచున్నాడు; కాబట్టి మీ మనస్సులను కాచుకొనుడి, విశ్వాసఘాతకులు కాకుడి." (మలాకి 2:14-16)

"మనుష్యులు తమకంటె గొప్పవానితోడు అని ప్రమాణము చేతురు; వారి ప్రతి వివాదములోను వివాదాంశమును పరిష్కారము చేయునది ప్రమాణమే.౹" (హెబ్రే. 6:16)

"దావీదు కీర్తన. యెహోవా, నీ గుడారములో అతిథిగా ఉండదగిన వాడెవడు? నీ పరిశుద్ధపర్వతముమీద నివసింపదగిన వాడెవడు? యథార్థమైన ప్రవర్తన గలిగి నీతి ననుసరించుచు హృదయపూర్వకముగా నిజము పలుకువాడే. అట్టివాడు నాలుకతో కొండెములాడడు, తన చెలి కానికి కీడుచేయడు తన పొరుగువానిమీద నింద మోపడు అతని దృష్టికి నీచుడు అసహ్యుడు అతడు యెహోవాయందు భయభక్తులు గలవారిని సన్మానించును అతడు ప్రమాణము చేయగా నష్టము కలిగినను మాట తప్పడు." (కీర్తనల 15:1-4)

VI). సాక్ష్యులు : 

ఈ లోకములో మనం ఏ చిన్న పని చేసినా దానికి సాక్షి ఉండేలా చూసుకుంటాము ఎందుకంటే మన మాట ఎవరు నమ్మకపోయిన సాక్షి మాటనుబట్టి నమ్ముతారని. న్యాయస్థానాలు కూడా సాక్షి లేనిదే తీర్పును వెలువడించరు. వివాహము పరమతండ్రి యొక్క ప్రణాళిక మరి అంత గొప్ప ప్రణాళికకు సాక్ష్యులు అవసరమై యున్నారు కదా!
 
"ఈ ధర్మశాస్త్ర వాక్యములు మోషే గ్రంథమందు సాంతముగా వ్రాయుట ముగించిన తరువాత మోషే యెహోవా నిబంధనమందసమును మోయు లేవీయులను చూచి ఆజ్ఞాపించినదేమనగా– మీరు ఈ ధర్మశాస్త్ర గ్రంథమును తీసికొని మీ దేవుడైన యెహోవా నిబంధనమందసపు ప్రక్కన ఉంచుడి.౹ అది అక్కడ నీమీద సాక్ష్యార్థముగా ఉండును.౹ నీ తిరుగుబాటును నీ మూర్ఖత్వమును నేనెరుగుదును. నేడు నేను ఇంక సజీవుడనై మీతో ఉండగానే, ఇదిగో మీరు యెహోవామీద తిరుగుబాటుచేసితిరి.౹ నేను చనిపోయిన తరువాత మరి నిశ్చయముగా తిరుగుబాటు చేయుదురుకదా. మీ గోత్రముల పెద్దలనందరిని మీ నాయకులను నాయొద్దకు పోగు చేయుడి. ఆకాశమును భూమిని వారిమీద సాక్షులుగా పెట్టి నేను ఈ మాటలను వారి వినికిడిలో చెప్పెదను.౹" (ద్వితీయో. 31:24-28)

VII). విందు మరియు విందు ప్రధాని : 

వివాహానికి వచ్చినవారిని సంతృప్తి పరచడానికి విందును ఏర్పాటు చేయాలి. దాని బాధ్యతలు చూడడానికి విందు ప్రధాని అవసరమై యున్నాడు. విందు ప్రాముఖ్యం కదా అని  అందరూ గొప్పగా మాట్లాడుకోవాలని అప్పు చేసి మరీ పెట్టాలని గ్రంధము చెప్పుటలేదు కానీ నీ స్తోమతకు తగినట్టుగా నీకు ఉన్నంతలో ఎవరికి లోటు లేకుండా ఉండేలా చూసుకుంటే చాలు. 

 "పరలోకరాజ్యము, తన కుమారునికి పెండ్లి విందుచేసిన యొక రాజును పోలియున్నది. ఆ పెండ్లి విందుకు పిలువబడినవారిని రప్పించుటకు అతడు తన దాసులను పంపినప్పుడు వారు రానొల్లక పోయిరి. కాగా అతడు– ఇదిగో నా విందు సిద్ధపరచియున్నాను; ఎద్దు లును క్రొవ్విన పశువులును వధింపబడినవి; అంతయు సిద్ధముగా ఉన్నది; పెండ్లి విందుకు రండని పిలువబడిన వారితో చెప్పుడని వేరే దాసులను పంపెను గాని వారు లక్ష్యము చేయక, ఒకడు తన పొలమునకును మరియొకడు తన వర్తకమునకును వెళ్లిరి. తక్కినవారు అతని దాసులను పట్టుకొని అవమానపరచి చంపిరి. … గనుక రాజమార్గములకు పోయి మీకు కనబడు వారినందరిని పెండ్లి విందుకు పిలువుడని తన దాసులతో చెప్పెను." (మత్తయి. 22:2-6;9)

"యేసు తల్లి అక్కడ ఉండెను; యేసును ఆయన శిష్యులును ఆ వివాహమునకు పిలువ బడిరి.౹ ద్రాక్షారసమైపోయినప్పుడు యేసు తల్లి– వారికి ద్రాక్షారసము లేదని ఆయనతో చెప్పగా౹ యేసు ఆమెతో– అమ్మా, నాతో నీకేమి (పని)? నా సమయ మింకను రాలేదనెను.౹ ఆయన తల్లి పరిచారకులను చూచి —ఆయన మీతో చెప్పునది చేయుడనెను.౹ యూదుల శుద్ధీకరణాచారప్రకారము రెండేసి మూడేసి తూములు పట్టు ఆరు రాతిబానలు అక్కడ ఉంచబడియుండెను.౹ యేసు– ఆ బానలు నీళ్లతో నింపుడని వారితో చెప్పగా వారు వాటిని అంచులమట్టుకు నింపిరి.౹ అప్పుడాయన వారితో– మీరిప్పుడు ముంచి, విందు ప్రధానియొద్దకు తీసికొనిపొండని చెప్పగా, వారు తీసికొనిపోయిరి.౹ ఆ ద్రాక్షారసము ఎక్కడనుండి వచ్చెనో ఆ నీళ్లు ముంచి తీసికొనిపోయిన పరిచారకులకే తెలిసినదిగాని విందు ప్రధానికి తెలియక పోయెను గనుక ద్రాక్షారసమైన ఆ నీళ్లు రుచిచూచినప్పుడు ఆ విందు ప్రధాని పెండ్లికుమారుని పిలిచి౹ –ప్రతివాడును మొదట మంచి ద్రాక్షారసమును పోసి, జనులు మత్తుగా ఉన్నప్పుడు జబ్బురసము పోయును; నీవైతే ఇదివరకును మంచి ద్రాక్షారసము ఉంచుకొని యున్నావని అతనితో చెప్పెను.౹ గలిలయలోని కానాలో, యేసు ఈ మొదటి సూచకక్రియను చేసి తన మహిమను బయలుపరచెను; అందువలన ఆయన శిష్యులు ఆయనయందు విశ్వాసముంచిరి." (యోహాను. 2:2-11)

VIII). పాన్పు : 

పాన్పు అంటే దేవుడు, సంఘము మరియు సమాజము సమక్షంలో జతచేయబడిన వారు వివాహ అనంతరం కలుసుకొనుట లేక కూడుకొనుట. 

ఈ విషయమును గూర్చి  నేటి కాలపు యవనస్తులు ఏమనుకుంటున్నారో ఈ విషయములో వారి ఆలోచనలు ఎంతటి పాపానికి దారి తీస్తున్నాయో దేవునికి విరోధముగా ఎంతటి ఘోరమైన దుష్కార్యములు చేస్తున్నారో ప్రత్యేకముగా చెప్పనక్కర్లేదు. ఈ లోకపు ఆలోచనలతో బ్రతికేవారి పరిస్థితి అలా ఉందంటే ఏమి మాట్లాడలేము కానీ క్రైస్తవులమని చెప్పుకునే యవనస్తులు కూడా వివాహానికి  ముందే తమ కోరికలను నెరవేర్చుకుంటూ దేవుని నామాన్ని ఘోరంగా అవమానపరుస్తూ వారి నాశనాన్ని వారే కొనితెచ్చుకొంటున్నారు. 

వివాహము చేసుకునేవారు పవిత్రంగా ఉండాలి.వారి పాన్పు కలుషితం కాకుండా, నిష్కళంకంగా ఉండాలి. ఇరువురూ ఒకరియెడల ఒకరు సంతోషన్నీ వ్యక్తపరుస్తూ, నిర్మలమైన మనసాక్షితో ముందుకు కొనసాగబడాలి. ఈ లోకపు చట్టాలు ఏమి చెవుతున్నాయో క్రైస్తవుడికి అనవసరం. నీ చట్టం అనగా పరిశుద్ధ గ్రంధము ఏమి చెప్తుందో దానికి నీవు లోబడాల్సిందే కానీ ఏవేవో కహానీలు చెప్తూ నీ తప్పుని కప్పిపుచ్చుకుంటే నీవు క్రైస్తవుడవి కాదు.

 "వివాహము అన్ని విషయములలో ఘనమైనదిగాను, పానుపు నిష్కల్మషమైనదిగాను ఉండవలెను; వేశ్యా సంగులకును వ్యభిచారులకును దేవుడు తీర్పు తీర్చును.౹" (హెబ్రే. 13:4).

పైన తెలుపబడిన ప్రాముఖ్యతలు అన్ని కలిస్తేనే అది దైవిక వివాహమనబడతాది. ఇవన్నీ నేటి కాలములో ఎక్కడ జరుగుతున్నాయి ఇవి సాధ్యపడేవి కాదు అని నిన్ను నీవు సమర్ధించుకుని నీ సొంత జ్ఞానముతో లోకాన్ని ఆశ్రయించి వివాహాన్ని జరిగిస్తే నీవు క్రైస్తవుడవి కాదు. తెలియక నియమాలను తప్పి  వారి వివాహాన్నీ జరిగించి వారి నిమిత్తము కాదు గానీ తెలిసి అలా జరిగించేవారు దేవుని శిక్షకు పాత్రులవుతారు. 

కాబట్టి వివాహము కాని వారు ఇప్పటికైనా మేల్కొని పైన వ్రాయబడినవాటిని గ్రంధపరిశీలన చేసి మీ వివాహ విషయములో ఇకనైనా జాగ్రత్త కలిగియుండాలని అలాగే తల్లితండ్రులు వారి పిల్లల విషయములో జాగ్రత్త వహించి పూర్తి బాధ్యత వారే తీసుకుని లేఖనానుసారంగా ముందుకు కొనసాగాలని మా మనవి.

మీ ఆత్మీయులు...

“వివాహము” (పార్ట్ - 01) - ఇక్కడ క్లిక్ చేయుము
“వివాహము” (పార్ట్ - 03) - ఇక్కడ క్లిక్ చేయుము

“వివాహము” (పార్ట్ - 01) Wedlock

“వివాహము” (పార్ట్ - 01)

పరిశుద్ధులుగా ఉండుటకు పిలువబడిన ప్రియులందరికీ మన ప్రభువైన యేసుక్రీస్తు నామములో వందనములు. 

            "వివాహము అన్ని విషయములలో ఘనమైనదిగాను, పానుపు నిష్కల్మషమైనదిగాను ఉండవలెను” (హెబ్రె. 13:4). వివాహము అనే విషయముపై నేటి కాలములో అనేకులు సరైన అవగాహనా మరియు లేఖనానుసారమైన జ్ఞానములేక తప్పిదము చేస్తూ లోకానుసారమైన జ్ఞానము చొప్పున మరియు వారి స్వనీతిని ఆధారము చేసుకొంటూ  ఈ కార్యక్రమమును తప్పుడుగా జరిగిస్తూ పరమదేవుడు ఏర్పాటు చేసిన వివాహం అనే గొప్ప వ్యవస్థను  తప్పుదారి పట్టిస్తున్నారు. ఈ  వివాహం అనే అంశమును నాలుగు భాగాలుగా నేర్చుకొందాం ఇది మొదటి భాగము.  

    వివాహ వ్యవస్థ గూర్చి యెరిగి దాని విషయములో లోకజ్ఞానాన్ని అనుసరించే వారి నిమిత్తము ఏమి చేయలేము గాని తెలియక అపార్ధం చేసుకొంటున్న వారు తమ జీవితాలు ఇకనైనా సరిచేసుకోవాలని ఈ  అంశము యొక్క ముఖ్య ఉద్దేశ్యము. 

I. వివాహము అనగా ఏమిటి ? 

భిన్నత్వములో ఉన్న ఇద్దరు వ్యక్తులు(స్త్రీ & పురుషుడు) ఏకత్వమగుటకు దేవునిచే జతపరచబడుటకు జరుగు దైవకార్యమును వివాహము అందురు.

⟹ గ్రీక్ లో - γάμος - gamos - gam'-os (G1060, G1062)

⟹ ఇంగ్లీష్  లో  marriage, wedding, wedlock 

భిన్నత్వము నుండి ఏకత్వము అనగా ఏమిటి ? 

వరుడు, వధువు వివాహానంతరము హృదయము, మనసు, మనసాక్షి లలో భిన్నత్వము నుండి ఏకత్వమగుట.అనగా కోరికలలో, ఆలోచనలలో, ప్రణాళికలలో, నిర్ణయాలలో, కార్యాచరణలలో, అలవాట్లలో,  అనుభూతులలో భిన్నత్వము నుండి ఏకత్వమగుట.

➾ మీలో ఇద్దరు తాము వేడుకొను దేనినిగూర్చియైనను భూమిమీద ఏకీభవించినయెడల అది పరలోకమందున్న నాతండ్రివలన వారికి దొరకునని మీతో చెప్పుచున్నాను. (మత్తయి సువార్త  18: 19)

➾ ప్రతివానికి సొంతభార్య యుండవలెను, ప్రతి స్త్రీకి సొంతభర్త యుండవలెను. (1 కోరింథి. 7:2)

 

II. వివాహం ఎందుకు? 

𝗔). పురుషుడు ఒంటరిగా ఉండకూడదని :

పరమదేవుడు ఆదిలో వివాహ వ్యవస్థను ఏర్పాటు చేయకమునుపే నరజాతి కొరకు భూమ్యాకాశములను, వృక్షజాలము, జలచరములను, ఆకాశ పక్షులను, పశువులను, పురుగులను, జంతువులను  సృజించెను. (ఆది.1:1-23. cf). 

➾ అటు తరువాత, "దేవుడు– మన స్వరూపమందు మన పోలికె చొప్పున నరులను చేయుదము; వారు సముద్రపు చేపలను ఆకాశపక్షులను పశువులను సమస్త భూమిని భూమిమీద ప్రాకు ప్రతి జంతువును ఏలుదురుగాకనియు పలికెను.౹ దేవుడు తన స్వరూపమందు నరుని సృజించెను; దేవుని స్వరూపమందు వాని సృజించెను; స్త్రీనిగాను పురుషునిగాను వారిని సృజించెను. (ఆది. 1:26-27). 

నరుని నిర్మాణముతో, దేవుని సృష్టి నిర్మాణం కార్యక్రమం ముగిసింది. దేవుడు తన సృష్టి యావత్తును గురించి మాట్లాడినప్పుడు అది మంచిదని చెప్పెను. (ఆది. 1:4,10,12,19,21,25,31). అయినప్పటికీ ఆయన ఒక లోటును కనుగొనెను అదేమనగా, "మరియు దేవుడైన యెహోవా– నరుడు ఒంటరిగా నుండుట మంచిది కాదు; వానికి సాటియైన సహాయమును వానికొరకు చేయుదుననుకొనెను. (ఆది. 2:18).

● సాటియైన సహాయం అనగా జీవిత భాగస్వామి అని అర్ధం.

● సృష్టి యావత్తులో నరునికి సాటియైన సహాయం లేదని/అతను ఒంటరిగా ఉండుట మంచిది కాదని యెరిగిన దేవుడు సాటియైన సహాయమును పురుషునికొరకు చేయుదుననుకొనెను. ఐతే  వివాహ ఆలోచన బయటకు రాలేదు.

➾ "అప్పుడు ఆదాము సమస్త పశువులకును ఆకాశపక్షులకును సమస్త భూజంతువులకును పేరులు పెట్టెను. అయినను ఆదామునకు సాటియైన సహాయము అతనికి లేక పోయెను.౹ అప్పుడు దేవుడైన యెహోవా ఆదామునకు గాఢనిద్ర కలుగజేసి అతడు నిద్రించినప్పుడు అతని ప్రక్క టెముకలలో ఒక దానిని తీసి ఆ చోటును మాంసముతో పూడ్చి వేసెను.౹ తరువాత దేవుడైన యెహోవా తాను ఆదాము నుండి తీసిన ప్రక్కటెముకను స్త్రీనిగా నిర్మించి ఆమెను ఆదాము నొద్దకు తీసికొనివచ్చెను.౹ అప్పుడు ఆదాము ఇట్లనెను — నా యెముకలలో ఒక యెముక నా మాంసములో మాంసము ఇది నరునిలోనుండి తీయబడెను గనుక నారి అనబడును. కాబట్టి పురుషుడు తన తండ్రిని తన తల్లిని విడిచి తన భార్యను హత్తుకొనును; వారు ఏక శరీరమైయుందురు." (ఆది. 2:20-24) 

● దేవుడే ఆదాము నుండి తీసిన ప్రక్కటెముకను స్త్రీనిగా నిర్మించి( మొట్టమొదటగా ఏదెను తోటలో జరిగిన ఆపరేషన్) ఆమెను అతని యొద్దకు తీసుకొని వచ్చెను. కానీ ఆమె యొద్దకు అతన్ని తీసుకుపోలేదు.

● స్త్రీయే  పురుషుని కొరకని  గమనించవలసిన అవసరత ఎంతైనా ఉంది. (1 కొరింథి. 11:8-9. cf.)

● పురుషుని కొరకై స్త్రీ నిర్మింపబడినదని స్త్రీ కొరకు పురుషుడు కాదని పరిశుద్ధ గ్రంథము ఖండితముగా చెప్పుతుందని విశ్వాసముతో రూఢిగా నమ్మవలసిన అవసరత ఉన్నది . 

● వివాహపు  వ్యవస్థాపకుడు పరిశుద్ధ పరమదేవుడే గాని మనిషి కాదు. 

● కేవలం దేవుడే పెద్దగా లేదా మధ్యవర్తిగా ఆదాము మరియు అవ్వ ను నిబంధన మేర జత పరుచుటం చూడగలం.

(గమనిక) : ఆదాము/అవ్వకు జననం, బాల్యం, యవ్వనం దశలు యొక్క అనుభవం లేదు.

 ఆదాము కి తల్లి, తండ్రి కలవాడు కాదు. కానీ ఈ మాటలు తో వివాహం వ్యవస్థ తల్లితండ్రులు గల ఈ తాత్కాలిక లోకములో శాశ్వతంగా ఉద్దేశించబడినట్టుగా చూడగలం. 

● వివాహం ద్వారా పురుషుడు తన తల్లిని/తండ్రిని విడిచి తన భార్యను హత్తుకొనుట చేత వారిద్దరూ ఏక శరీరమైన్నారు. 

 

𝗕). జారత్వం జరగకూడదని : 

"జారత్వం" అనగా అవివాహితులు శృంగార కార్యకలాపాలకు పాల్పడడం. గ్రీక్ భాషలో porneia అని ఇంగ్లీష్ లో Fornication (or) Sexual Immorality. వివాహం కానీ స్త్రీ పురుషులు మధ్య మరియు వివాహమైన పురుషుడు/స్త్రీ - - వివాహం కానీ పురుషుడు/స్త్రీ మధ్య జరిగే శృంగారపు ఆలోచనలు/చూపులు/కోరికలు/నిర్ణయాలు జరుగుటయే జారత్వం. 

● జారత్వం దేవుని చిత్తం కాదు. (1 దెస్స. 4:3-5)

● జారత్వం మనుషుల హృదయములో నుండి పుట్టును. (మార్కు. 7:21).

● జారత్వం జరుగకుండా ఉండాలంటే దైవిక వివాహమే పరిష్కారం.

● కేవలం వివాహపు పరిధిలోనే శృంగార కార్యకలాపాలనేవి దేవునికి అంగీకార యోగ్యమైనవి. దాని వెలుపల కనీసం పురుషుడు/స్త్రీ ను ఏ స్త్రీను/పురుషుడును మోహపు చూపుతో చూడకూడదని (మత్తయి. 5:27-28 cf.) మరియు వారి పానుపు నిష్కల్మషమైనదిగాను ఉండవలెనని (హెబ్రే. 13:4 cf). ఈ వివాహ వ్యవస్థను దేవుడే ప్రారంభించడము జరిగింది.

● వివాహ నిబంధనలో బంధింపబడిన స్త్రీ, పురుషులు మాత్రమే భార్యభర్తలౌతారు. (ఆది. 2:25). కాబట్టి అది జారత్వం అనబడదు.

● స్త్రీ/పురుషులు వివాహ బంధముచే బంధింపబడకుండా ఇరుగురు కలసి సహజీవనం చేసిన, వివాహమునకు ముందు శారీరకంగా కలసిన, దైవ నిబంధన ప్రవేశం లేకమునుపే, పరిశుద్ధులు అనగా సంఘము యొక్క యెదుట జత చేయబడకుండానే తమకుతాము  భార్యభర్తలుగా ఊహించుకొని, తల్లితండ్రులు మరియు పెద్దలు ప్రమేయం లేకుండా తమ స్వబుద్ధిని ఆధారము చేసుకొంటూ తమ కోరికలు తీర్చుకొనుట జారత్వమే  అగునుకదా! ఇలా చేయువారు దేవుని దృష్టికి పాపం చేయువారు కానీ పరిశుద్ధులు కాలేరు సుమా. 

నా ప్రియ యవ్వనస్తుడా ఇంత నిష్ఠగా బ్రతకగలరా? అని సందేహం నీకు ఉండునేమో గాని సుందరుడు, రూపవంతుడును మరియు యవ్వనస్తుడైన యోసేపు నీకు కలిగే ఆలోచనలకు గొప్ప ఉదాహరణ. (యోసేపు అంశము కొరకు క్లిక్ చేయు)

➾ "స్త్రీని ముట్టకుండుట పురుషునికి మేలు.౹ అయినను జారత్వములు జరుగు చున్నందున ప్రతివానికి సొంతభార్య యుండవలెను, ప్రతి స్త్రీకి సొంతభర్త యుండవలెను." (1 కోరింథి. 7:1-2).

➾ "జారత్వమునకు దూరముగా పారిపోవుడి. మనుష్యుడుచేయు ప్రతి పాపమును దేహమునకు వెలుపల ఉన్నది గాని జారత్వము చేయువాడు తన సొంత శరీరమునకు హానికరముగా పాపము చేయుచున్నాడు. (1కోరింథి. 6:18).

𝗖). మానవజాతి విస్తరణ మరియు దైవకుటుంబ నిర్మాణం కొరకు :

➾ "దేవుడు వారిని ఆశీర్వదించెను; ఎట్లనగా– మీరు ఫలించి అభివృద్ధిపొంది విస్తరించి భూమిని నిండించి దానిని లోపరచుకొనుడి; సముద్రపు చేపలను ఆకాశపక్షులను భూమిమీద ప్రాకు ప్రతి జీవిని ఏలుడని దేవుడు వారితో చెప్పెను.౹" (ఆది. 1:28). 

➾ "మరియు యావద్భూమిమీద కాపురముండుటకు ఆయన యొకనినుండి ప్రతి జాతి మనుష్యులను సృష్టించి, వారు ఒకవేళ దేవునిని తడవులాడి కనుగొందురేమో యని, తన్ను వెదకునిమిత్తము నిర్ణయకాలమును వారి నివాసస్థలముయొక్క పొలిమేరలను ఏర్పరచెను. ఆయన మనలో ఎవనికిని దూరముగా ఉండువాడు కాడు.౹" (అపో.కార్య. 17:26).

● యావద్భూమిమీద కాపురముండుటకు, ఫలించి అభివృద్ధి చెందుటకు విస్తరించి భూమిని నిండించి దానిని లోపరచుకొనుటకు ఈ కుటుంబ వ్యవస్థను దేవుడే ఏర్పాటు చేశారు. 

● ఇహలోక సంబంధమైన వాటి కొరకు వివాహం కాదు.

 

𝐃). మేలు కలుగుటకు/దైవ చిత్తముగా నడిపింపబడుటకు :

➾ "దేవుడు ఏకాంగులను సంసారులుగా చేయువాడు. ..." (కీర్తన. 68:6).

➾ "భార్య దొరికినవానికి మేలు దొరికెను అట్టివాడు యెహోవావలన అనుగ్రహము పొందినవాడు." (సామెతలు. 18:22).

➾ "..... సుబుద్ధిగల భార్య యెహోవాయొక్క దానము." (సామెతలు. 19:14).

 ➾ "ఇద్దరి కష్టముచేత ఉభయులకు మంచిఫలముకలుగును గనుక ఒంటిగాడైయుండుటకంటె ఇద్దరు కూడి యుండుట మేలు.౹ వారు పడిపోయినను ఒకడు తనతోడివానిని లేవనెత్తును; అయితే ఒంటరిగాడు పడిపోయినయెడల వానికి శ్రమయే కలుగును, వాని లేవనెత్తువాడు లేక పోవును.౹ ఇద్దరు కలిసి పండుకొనినయెడల వారికి వెట్ట కలుగును; ఒంటరిగానికి వెట్ట ఏలాగు పుట్టును? ఒంటరియగు నొకనిమీద మరియొకడు పడినయెడల ఇద్దరు కూడి వాని నెదిరింప గలరు, మూడు పేటల త్రాడు త్వరగా తెగిపోదు గదా?" (ప్రసంగి. 4:9-12).

 

III. వివాహము ఎవరికి?

పరిశుద్ధ గ్రంథము భిన్నత్వముగల  ఇద్దరు వ్యక్తులకు  అనగా పురుషుడు  స్త్రీ మాత్రమే  వివాహమనే బంధము చేత జతపరచబడాలని తెలియజేస్తుంది. 

⟿ పురుషుడు + పురుషుడు = ✖️ 

⟿ స్త్రీ + స్త్రీ = ✖️

⟿ పురుషుడు + స్త్రీ = ✔

️        ➦ కాబట్టి పురుషుడు తన తండ్రిని తన తల్లిని విడిచి తన భార్యను హత్తుకొనును; వారు ఏక శరీరమైయుందురు. (ఆదికాండము. 2:24)

➦ ఆయన– సృజించినవాడు ఆదినుండి వారిని పురుషునిగాను స్త్రీనిగాను సృజించెననియు ఇందు నిమిత్తము పురుషుడు తలిదండ్రులను విడిచి తన భార్యను హత్తుకొనును, వారిద్ద రును ఏకశరీరముగా ఉందురని చెప్పెననియు మీరు చదువలేదా? కాబట్టి వారికను ఇద్దరుకాక ఏకశరీరముగా ఉన్నారు గనుక దేవుడు జతపరచినవారిని మను ష్యుడు వేరుపరచ కూడదని చెప్పెను. (మత్తయి సువార్త. 19: 4-6)

➦ సృష్ట్యాదినుండి (దేవుడు) వారిని పురుషునిగాను స్త్రీనిగాను కలుగ జేసెను. ఈ హేతువుచేత పురుషుడు తన తలిదండ్రులను విడిచి పెట్టి తన భార్యను హత్తుకొనును; వారిద్దరు ఏకశరీరమై యుందురు, గనుక వారిక ఇద్దరుగా నుండక యేకశరీరముగా నుందురు. కాబట్టి దేవుడు జతపరచిన వారిని మనుష్యుడు వేరుపరచ కూడదని వారితో చెప్పెను. (మార్కు సువార్త 10:6-9)

(ముఖ్య గమనిక :) వివాహమనేది నిన్ను, నీ కుటుంబాన్ని, నీ తోటి పరిశుద్ధులను క్రీస్తునకు మరియు  దేవునికి దగ్గర చేయబడుటకే  గాని నీకు జత చేయబడిన వారి సొంత  ఆలోచనలకు లోబడి సంఘానికి మరియు దేవునికి దూరం అగుటకు మాత్రం వివాహ వ్యవస్థ  ఏర్పాటు చేయబడలేదు .  

కాబట్టి సహోదరి/సహోదరుడా.. పైన తెలుపబడిన మాటలను బట్టి  దేవుడు ఏర్పాటు చేసిన ఇంత గొప్ప వివాహం వ్యవస్థ గూర్చి నీ ఆలోచన ఏమైయున్నదో గ్రహించుకో.

NOTE : నీ గురి నిత్యత్వమే  అయ్యిఉండాలి గాని  వివాహం కాదు.  వివాహం చేసుకోవద్దని మా ఉద్దేశ్యము కాదు గాని నీ వివాహం నిన్ను నిత్యత్వమునకు  దూరము చేయకూడదని మా ప్రేమ పూర్వకమైన హెచ్చరిక. (1 కొరింథి. 7:1 cf) నీవు వివాహం చేసుకొనినను, చేసికొనక పోయినను నిత్యత్వం పొందాలనేది దేవుని చిత్తము.

మీ ఆత్మీయులు...

“వివాహము” (పార్ట్ - 02) - ఇక్కడ క్లిక్ చేయుము
“వివాహము” (పార్ట్ - 03) - ఇక్కడ క్లిక్ చేయుము